ފޮޓޮއިން ފެންނަނީ ރައީސް ސޯލިހެއް ނޫން: ހޫދު
28 ޖޫން 2020 | އާދީއްތަ 14:07ފޮޓޯގައި މަޖިލީސް ރައީސްއާ ވައްތަރު މީހަކު ފެނޭ
ރައީސް ސޯލިހު މޫދުގައި ހުންނެވި ކަމަށް ބުނެ ޓްވިޓަރ ގައި ދައުރުވަމުންދާ ފޮޓޯ
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހުންނެވި ކަމަށް ދައުރުކުރުވަމުން ގެންދާ ފޮޓޯގައި ހުންނެވި ފަރާތަކީ އެމަނިކުފާނު ނޫން ކަމަށް ރައީސް އޮފީހުގެ ތަރުޖަމާނު އިބްރާހިިމް ހޫދް ވިދާޅުވެއްޖެއެވެ.
ރައީސް ނަޝީދުގެ އިތުރުން މަޖިލިސް މެމްބަރުން ކަމަށް ބެލެވޭ ބަޔަކު މޫދުގައި ތިއްބާވާ ފޮޓޯއެއް ސޯޝަލް މީޑިއާގައި ދަނީ ދައުރުވަމުންނެވެ. އަދި ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ގައިޑްލައިންތަކާއި ދެ ރައީސުންގެ އިތުރުން ފޮޓޮއިން ފެންނަ ފަރާތްތައް ހިލާފުވެފައިވާ ކަމަށް ރާއްޖޭގެ ބައެއް މީޑިއާތަކުން ވަނީ ރިޕޯޓް ކޮށްފައެވެ. ނަމަވެސް އެ ފޮޓޯގައި ރައީސް ސޯލިހު ކަމަށް ބުނާ މީހާގެ މޫނެއް ނުފެނެއެވެ.
ފޮޓޮއިން ފެންނަނީ ރައީސް ކަމަށް ބުނެ ލިޔެފައިވާ އާޓިކަލެއް ޓްވިޓާގައި ހިއްސާ ކުރައްވަމުން ހޫދު ވިދާޅުވީ، ރައީސް ސޯލިހު މި ދަނޑިވަޅުގައި މާލެއިން ބޭރަށް ވަޑައިނުގަންނަވާ ކަމަށެވެ. އަދި އެމަނިކުފާނު ހުންނެވި ފާއިތުވެ ދިޔަ ދުވަސްތަކުގައި މާލޭގައި ކަމަށެވެ.
މި ފޮޓޯއާ ގުޅިގެން ދެކެވެމުންދާ ވާހަކަތަކާއި ގުޅިގެން، ފޮޓޯއިން ފެންނަ/ފެންނަ ކަމަށް ބުނާ އެހެން ފަރާތަކުން މިހާތަނަށް އެެއްޗެއް ވިދާޅުވެފައެއް ނުވެއެވެ.
