ނިރްބަޔާ ފަދަ ކޭސްއެއް ތިލަވުމުގެ ކުރިން، ރޭޕްކުރާ މީހުންނަށް އަދަބު ދޭންޖެހޭ: އިދިކޮޅު
27 ޖޫން 2020 | ހޮނިހިރު 16:46ދެ މީހުން ދޫކޮށްލުމަކީ ބަލައިގަނެވޭނެ ކަމެއް ނޫން: އިދިކޮޅު
ރޭޕާއި ދެކޮޅަށް މާލޭގައި ބޭއްވި އިހްތިޖާޖެއްގެ ތެރެއިން
އިންޑިއާގެ ވެރިރަށް ދިއްލީގައި 2012 ވަނަ އަހަރު ރޭޕްކޮށް މަރާލީ ނިރްބަޔާ ފަދަ ކޭސްއެއްް ރާއްޖޭގައި ތިލަވުމުގެ ކުރިން, ޖިންސީ ގޯނާކުރާ މީހުންނާ މެދު ފިޔަވަޅު އެޅުމަށް އިދިކޮޅު ޕްރޮގްރެސިވް ކޯލިޝަނުން ގޮވާލައިފިއެވެ.
ހުޅުމާލޭ ފަޅުގައި އަޅާފައި އޮތް ސަފާރީއެއްގައި ހުރި އަންހެނަކަށް ޖިންސީ ގޯނާ ކުރުމާއި ގުޅިގެން އެކަން ހަރުކަށި އިބާރާތުން ކުށްވެރިކޮށް އެ ކޯލިޝަނުން ހޮނިހިރު ދުވަހުގެރޭ ނެރުނު ބަޔާނެއްގައި ބުނީ، އެ އަންހެން މީހާއަށް ޖިންސީ ގޯނާކުރި ކަމަށް ތުހުމަތު ކުރެވޭ ދެމީހުން ބަންދުކުރުމަށް އެކަށީގެންވާ ސަބަބެއް ނެތް ކަމަށް ބުނެ ފުލުހުންގެ އިދާރާއިން އެ ދެމީހުން ދޫކޮށްލުމަކީ އެއްވެސް ގޮތަކަށް ބަލައިގަނެވޭނެ ކަމެއްނޫން ކަމަށެވެ.
އިދިކޮޅުން ބުނީ، ރޭޕް ކުރުންފަދަ ބޮޑެތި ކުށްތަކަށް އަރައިގަންނަ ފަރާތްތަކަކީ އެންމެ ނުބައި މުޖުރިމުން ކަމުގައި ވީހިނދު، ގާނޫނުލް އުގޫބާތުގައި އެފަދަ ފަރާތްތަކަށް ދިނުމަށް ކަނޑައަޅާފައިވާ އެންމެ ހަރުކަށި އަދަބު އެފަރާތްތަކަށް ދޭން ޖެހޭނެ ކަމަށެވެ. އެކަމުގައި ވަކި އާއިލާއަކަށް ނުވަތަ މަގާމަކަށް ނުވަތަ ވަކި ފަރާތަކަށް ބެލުމެއްނެތި، ގާނޫނު ތަންފީޒު ކުރަން ޕްރޮގްރެސިވް ކޯލިޝަނުން ވަނީ ގޮވާލާފައެވެ. އެފަދަ ލާއިންސާނީ، އަނިޔާވެރި އަމަލު ހިންގާ މީހުންނަކީ އެއްގޮތަކަށްވެސް މުޖްތަމައުގެ ތެރެއަށް ދޫކުރެވިފައި ތިބެގެންވާނެ ބައެއް ނޫނެވެ.
ފަހަކަށް އައިސް ރާއްޖޭގައި ރޭޕްގެ ޝިކާރައަކަށްވާ މީހުންގެ އަދަދު އިތުރުވަމުންދާކަން ފާހަގަކުރަމުން އިދިކޮޅުން ވަނީ އެކަމާ ކަންބޮޑުވުން ފާޅުކޮށްފައެވެ. އަދި އެފަދަ ކަންކަން ހުއްޓުވޭނީ ކަމާބެހޭ ހުރިހާ ފަރާތްތަކުން، އެގޮތުން ސަރުކާރާއި ތަހުގީގީ އިދާރާތަކާއި ޝަރުއީ ދާއިރާއާއި ހައްގުތައް ހިމާޔަތްކުރާ މުއައްސަސާތަކުން ވެސް, ފުރިހަމަ ޒިންމާ އަދާކޮށްގެން ކަމަށް އިދިކޮޅުން ނެރުނު ބަޔާނުގައި ބުންޏެވެ.
އިދިކޮޅުގެ ބަޔާން ނިންމާލަަމުން އެ ކޯލިޝަނުން ވަނީ އެއްވެސް ތަފާތު ކުރުމެއް އޮޅުވާލުމެއްނެތި، ޖިންސީ ގޯނާ ލިބުނު ފަރާތުގެ ހައްގުތައް ހިމާޔަތްކޮށްދީ އިންސާފު ހޯދައިދިނުމަށާއި، އެކަން ކުރިބަޔަކަށް ގާނޫނުގައިވާ އެންމެ ހަރުކަށި ފިޔަވަޅު އެޅުމަށް ރައީސް އިބްރާހިމް މުހައްމަދު ސޯލިހުގެ އިތުރުން ސަރުކާރުގެ އިދާރާތަކަށް ގޮވާލާފައެވެ. އެ އަމަލު ހިންގާފައިވާ ފަރާތްތަކުގެ ހަގީގަތް ރައްޔިތުންނަށް ހާމަ ކޮށްދިނުމަށްވެސް ޕީޕިއެމް/ޕީއެންސީން ގޮވާލިއެވެ.
