އޭއެސް ރޯމާއަށް ބަދަލުވާން ޗެލްސީއަށް ކުޅެމުން އަންނަ ސްޕެއިންގެ ފޯވާޑް ޕެޑްރޯ ރޮޑްރިގޭޒް އެއްބަސްވެއްޖެއެވެ.

ޗެލްސީއާއެކު އުމުރުން 32 އަހަރުގެ ޕެޑްރޯ ހަދާފައިވާ އެއްބަސްވުން މި މަހު ހަމަވާނެއެވެ. އެކަމަކު ކޮރޯނާވައިރަސް (ކޮވިޑް-19) އާ ގުޅިގެން ސީޒަން ދިގުލައިގެންދާތީވެ، ޕެޑްރޯ ވަނީ މި ސީޒަން ނިމެންދެން ޗެލްސީގައި މަޑުކުރަން ނިންމާ އެއްބަސްވުން އާކޮށްފައެވެ.

އެހެންކަމުން މި ސީޒަން ނިމުމުން ހިލޭ ޓްރާންސްފާއެއްގެ ދަށުން ޕެޑްރޯ ޗެލްސީ ދޫކޮށްލާއިރު، ރޯމާއަށް ބަދަލުވާން ޕެޑްރޯ މިހާރު ނިންމާފައިވާ ކަމަށް ސްކައި ސްޕޯޓްސްއިން ވަނީ ރިޕޯޓުކޮށްފައެވެ. ސްކައި ސްޕޯޓްސްއިން ހާމަކުރި ގޮތުގައި ޕެޑްރޯ ވަނީ ރޯމާއާއެކު ދެ އަހަރު ދުވަހުގެ އެއްބަސްވުމެއްގައި ސޮއިކުރަން އެއްބަސްވެފައެވެ. އަދި މި އެއްބަސްވުމުގެ ދަށުން ހަފުތާއަކު 50،000 ޕައުންޑުގެ މުސާރައެއް އޭނާއަށް ލިބޭނެ ކަމަށް ވެސް ވަނީ ރިޕޯޓުކޮށްފައެވެ.

2015 ވަނަ އަހަރު ބާސެލޯނާ ދޫކޮށް ޗެލްސީއަށް ބަދަލުވި ޕެޑްރޯ މި ސީޒަން ނިމުމުން އެޓީމު ދޫކޮށްލާއިރު، އޭނާ ވަނީ އެޓީމަށް މިހާތަނަށް ކުޅުނު 202 މެޗުގައި 43 ލަނޑު ކާމިޔާބުކޮށްފައެވެ. އަދި އޭނާ ވަނީ ޗެލްސީއާއެކު އިނގިރޭސި ޕްރިމިއާ ލީގާއި، އެފްއޭ ކަޕްގެ އިތުރުން ޔުއެފާ ޔޫރޮޕާ ލީގު ކާމިޔާބުކޮށްފައެވެ.

މީގެ ކުރިން ބާސާގައިވެސް ގިނަ ކާމިޔާބީތަކެއް ހޯދި ޕެޑްރޯ ވަނީ މިހާތަނަށް ސްޕެއިންގެ ގައުމީ ޓީމަށް 65 މެޗު ކުޅެދީ 17 ލަނޑު ކާމިޔާބުކޮށްފައެވެ. އަދި ވަނީ ސްޕެއިންއާއެކު ފީފާ ވޯލްޑް ކަޕްގެ އިތުރުން ޔޫރޯ ފުޓްބޯޅަ މުބާރާތްވެސް ކާމިޔާބުކޮށްފައެވެ.