ރައީސް ސޯލިހު އެމްޑީޕީގެ އަހަރީ ދުވަހުގެ ތަހުނިޔާ ވިދާޅުވެއްޖެ
އެމްޑީޕީ ރަސްމީކޮށް ރަޖިސްޓްރީކުރެވިފައިވަނީ 26 ޖޫން 2005 ގައި
އެމްޑީޕީގެ 14 ވަނަ އަހަރީ ދުވަހުގެ ދިދަ ނެގުމުގެ ރަސްމިއްޔާތުގެ ތެރެއިން
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ 15 ވަނަ އަހަރީ ދުވަހުގެ ތަހުނިޔާ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު އެޕާޓީގެ އެންމެހާ މެންބަރުންނަށް ވިދާޅުވެއްޖެ އެވެ.
ރައީސްގެ އިތުރުންވެސް ޕާޓީގެ މެންބަރުންވެސް ދަނީ އެޕާޓީގެ އަހަރީ ދުވަހުގެ ތަހުނިޔާ ސޯޝަލްމީޑިއާގައި ކިޔަމުންނެވެ.
އެމްޑީޕީގެ އަހަރީ ދުވަހާއި ގުޅިގެން އެޕާޓީން ނެރެފައިވާ ބަޔާންގައި ވަނީ ޕާޓީގެ ފިކުރު ސިޔާސީ ޙަރަކާތެއްގެ ގޮތުގައި ފެށިގެން ދިއުންވީ ގިނަ ޕާރޓީ އެކުލެވޭ ޑިމޮކްރެސީގެ ޙަޔާތް ދިވެހިރާއްޖޭގައި ފެށުމުގެ އަސްލެއްކަމުގައެވެ. އަދި މި ހިތްވަރާއި، މި ޢަޒުމާއި، މި ކާމިޔާބީއާއި، މި އުއްމީދު އެކުލެވިގެންވާ ދެވަނަ ސިޔާސީ ޙަރަކާތެއް ދިވެހިރާއްޖޭގައި މިއަދު ވެސް ނެތްކަމަށާއި، އެކަމުގެ ޙަޤީޤަތަކީ ޕާރޓީ ބިނާބެގެންވާ ފަލްސަފާއާއި އަސާސްތަށްކަމަށް ބަޔާނުގައި ބުނެފައިވެއެވެ.
ރާއްޖޭގެ ރައްޔިތުންގެ ސިޔާސީ، އިޖްތިމާޢީ، ފަރުދީ، އަދި އިޤްތިޞާދީ މިނިވަންކަމާއި ޙައްޤުތަކާއި އިންސާފަށް ވަކާލާތުކުރާ އެންމެ ވަރުގަދަ މުއައްސަސާކަމުގައި އެމްޑީޕީ ވެފައިވާކަން ފާހަގަކޮށް، ބަޔާނުގައި ބުނެފައިވަނީ އޭގެ ސަބަބުން މިއަދާ ހަމައަށް ވެސް ރާއްޖޭގެ އެންމެ ތާއީދު ބޮޑު، އަދި މެމްބަރުން އެންމެ ގިނަ، ފަނޑުވުމެއް ނެތް ޕާރޓީކަމުގައި އެމްޑީޕީ ވެފައިވާކަމަށެވެ. އެމްޑީޕީ އަކީ ރައްޔިތުން ބާރުވެރިކުރެވޭނޭ ގޮތަށް، އިންތިޚާބުކުރެވޭ ތަފާތު ގިނަ ގުނަންތަކުގެ މައްޗަށް އެކުލެވިގެން، މުޅި ރާއްޖެއަށް ފެތުރި، ފުޅާވެފައިވާ އެންމެ އިންތިޒާމުވެގެން ހިންގޭ ޑިމޮކްރެސީގެ ހަރަކާތްކަމަށްވެސް ބަޔާނުގައިވެއެވެ.
ޕާރޓީ ވުޖޫދުވުމަށްފަހު ރާއްޖޭގެ ރައްޔިތުން ޕާރޓީގެ ރިޔާސީ ކެންޑިޑޭޓުން ދެފަހަރުގެ މަތީން ރާއްޖޭގެ ވެރިކަމަށް އިންތިޚާބުކުރައްވާފައިވާކަން ފާހަގަކޮށް، ބަޔާނުގައި ބުނެފައިވަނީ 2008 ވަނަ އަހަރު ރައީސުލްޖުމްހޫރިއްޔާކަމަށް ރައީސް މުޙައްމަދު ނަޝީދު އިންތިޚާބުކުރައްވާފައިވާއިރު، 2018 ވަނަ އަހަރު ރައީސް އިބްރާހީމް މުޙައްމަދު ޞާލިޙް އިންތިޚާބުކުރައްވާފައިވާކަމަށެވެ. އަދި އެމްޑީޕީގެ ސިޔާސަތުތަކާއި ވަޢުދުތަކުގެ ތެރެއިން ރާއްޖެއަށް ބޮޑެތި އިންގިލާބީ ހެޔޮ ބަދަލުތައް މީގެކުރިން ވެސް ގެނެސްދެއްވާފައިވާކަމާއި، އަދި މިހާރު ވެސް ގެނެސްދެއްވަމުންދާކަން ބަޔާނުގައި ފާހަގަކޮށްފައިވެއެވެ.
އެގޮތުން ޓެކްސްގެ ނިޒާމާއި، ހިލޭ ބޭސްފަރުވާ ކުރެވޭނޭ ނިޒާމާއި، އިޖްތިމާޢީ ރައްކާތެރިކަމުގެ ނިޒާމާއި، ދަތުރު ފަތުރުގެ ނިޒާމު ޤާއިމުކުރުމުގެ އިތުރަށް، ލާމަރުކަޒުކުރުމާއި، ގެސްޓް ހައުސްގެ ސިޔާސަތު ތަޢާރަފުކުރުމާއި، މަސްވެރިންނަށް ހަމަ އަގު ހޯދައިދިނުމާއި، ދަރިވަރުންނަށް އެއްދަންފަޅިއަށް ކިޔަވައިދިނުމާއި، ބޯހިޔާވެހިކަމާއި ވެށިފަހި ޕްރޮގްރާމުން ގިނަގުނަ ބަދަލުތަކެއް ގެނެސްދީފައިވާކަން ފާހަގަކޮށްފައިވެއެވެ. އަދި ހިލޭ ޑިގްރީއަށް ކިޔެވުމުގެ ފުރުސަތާއި، ރާއްޖެއިން ބޭރުން ކިޔެވުމަށް ކުޑަ އިންޓްރެސްޓްގައި ލޯނު ފަހިކޮށްދިނުމާއި، އިންސްޓިޓިޔޫޝަނަލް ރިފޯމްގެނައުން ފަދަ މުހިއްމު ބަދަލުތައް ޕާރޓީގެ ވެރިކަމުގެ ތެރެއިން ގެނެސްދީ، އަދި ގެނެސްދެމުންދާކަން އުފަލާއެކު ފާހަގަކާކަމަށް ބަޔާނުގައިވެއެވެ.
ބަޔާން ނިންމާލަމުން، ބުނެފައިވަނީ މާތް ﷲ ގެ ވާގިފުޅާއެކު ދިވެހިރައްޔިތުންގެ ޑިމޮކްރެޓިކް ޕާރޓީ އަބަދުވެސް ދެމިއޮންނާނީ ދިވެހިރާއްޖެއަށާއި ދިވެހިންނަށް ހެޔޮވެރިކަން ކޮށްދިނުމަށާއި، އިސްލާމީ އުސޫލުތަކާއި، ޑިމޮކްރެސީއާއި، އިންސާފާއި ހަމަހަމަކަން ނެގެހެއްޓުމަށް ރައްޔިތުންނާއި ބައިނަލްއަޤުވާމީ ދުނިޔެއާއެކު ސާބިތުކަމާއެކުގައެވެ.
ސިޔާސީ ޕާރޓީއެއްގެ ގޮތުގައި އެމް.ޑީ.ޕީ. ރަސްމީކޮށް ރަޖިސްޓްރީކުރެވިފައިވަނީ 26 ޖޫން 2005 ގައެވެ.
