އެމްއެމްޕީއާރސީގެ ޚިޔާނާތުގެ ފައިސާ ލިބުނު ސަރުކާރުގެ އިސްވެރިންގެ މައްސަލަތައް ނުބަލަން ނިންމައި ޕްރޮސިކިއުޓަރ ޖެނެރަލް ހުސައިން ޝަމީމް އިރުޝާދުދިން ކަމަށް ބުނާ ވާހަކަ އަކީ ދޮގެއް ކަމަށް އެ އޮފީހުން ބުނެފިއެވެ.
''އެމްއެމްޕީއާރުސީގެ ހިޔާނާތުގެ ފައިސާ ލިބުނު ސަރުކާރުގެ އިސްވެރިން މައްސަލަތައް ނުބަލަން ނިންމައިފި" މިސުރުހީގެ ދަށުން ރާއްޖޭގެ ނޫހެއްގައި ޖެހި ޚަބަރު ކުށްވެރިކޮށް ޕީޖީ އޮފީހުން ވަނީ ބަޔާނެއް ނެރިފައެވެ. އެގޮތުން އެމްއެމްޕީއާރްސީ ހިޔާނާތުގެ ފައިސާ ލިބުނު މީހުންގެ ތެރޭގައި ހިމެނޭ މިއަދުގެ ސަރުކާރަށާއި ވެރިކަން ކުރާ އެމްޑީޕީގެ މަޖިލިސް މެމްބަރުންގެ މައްސަލަތައް ނުބަލަން ޕްރޮސިކިއުޓަރ ޖެނެރަލް ހުސެއިން ޝަމީމް، އެ މައްސަލާގައި ހަރަކާތްތެރިވާ ޕީޖީ އޮފީހުގެ މުވައްޒަފުންނަށް އިރުޝާދު ދީފައިވާކަމަށް އޮތް ލިޔުމަކީ ކަނޑައެޅިގެން ދޮގެއް ކަމަށް ޕީޖީ އޮފީހުން ވަނީ ބުނެފައެވެ.
ޕީޖީ އޮފީހުން ބުނީ ރާއްޖޭގެ ގާނޫނުތައް ތަރުތީބު ވެފައިވާ ގޮތުން، ތަހުގީގު އިދާރާތަކަކީ ގާނޫނުގައި ކަނޑައަޅާފައިވާ އުސޫލުތަކާއި ހަމަތަކާ އެއްގޮތަށް މިނިވަންކަމާއި މުސްތަގިއްލުކަމާއެކު ތަހުގީގުކުރުމުގެ ބާރު ލިބިދީފައިވާ އިދާރާތައް ކަމަށެވެ. ޖިނާއީ މައްސަލަތައް ތަހުގީގު ކުރުމާމެދު ގޮތް ނިންމުމާއި، ތަހުގީގު ނުކުރުމަށް ނިންމުން ފަދަ ނިންމުންތަކަކީ ތަހުގީގު އިދާރާތަކުގެ ބާރުގެ ދާއިރާގެ ތެރޭގައި ހިމެނޭ ކަންކަން ކަމަށެވެ. އެއީ ޕްރޮސިކިއުޓަރ ޖެނެރަލް ކުރާ ކަމެއް ނޫން ކަމަށް ބަޔާނުގައި ފާހަގަކޮށްފައިވެއެވެ.
ޕީޖީ އޮފީހުން ބުނީ އެމްއެމްޕީއާރްސީގެ ހިޔާނާތުގެ މައްސަލާގައި ހިމެނޭ އެއްވެސް މީހެއްގެ ބައި ތަހުގީގު ނުކުރުމަށް، ނުވަތަ އެ މައްސަލައާ ގުޅުންހުރި އެއްވެސް މީހެއްގެ މައްސަލައެއް އެއޮފީހަށް ބަލައި ނުގަތުމަށް، ނުވަތަ އިތުރަށް ކުރިއަށް ނުގެންދިއުމަށް ޕްރޮސިކިއުޓަރ ޖެނެރަލް އެއްވެސް އިރަކު، އެއްވެސް މީހަކަށް ނުވަތަ އިދާރާއަކަށް ވިޔަސް އަންގަވާފައެއް ނުވަތަ އިރުޝާދު ދީފައިނުވާ ކަމަށެވެ.
ޕީޖީ އޮފީހުން ބުނީ މިހާތަނަށް، އެމްއެމްޕީއާރުސީ މައްސަލައާ ގުޅިގެން ހުށަހެޅި އެއްވެސް މައްސަލައެއްގައި މިހާރުގެ ޕްރޮސިކިއުޓަރ ޖެނެރަލް ދައުވާ ނުކުރަން ނިންމާފައެއް ވެސް ނުވާ ކަމަށެވެ. އަދި އޮފީހަށް ހުށަހެޅޭ މައްސަލަތަކާ ގުޅިގެން ނިންމާ އެންމެހައި ނިންމުންތަކާއި، މައްސަލަތަކާ ގުޅިގެން ޕްރޮސިކިއުޓަރ ޖެނެރަލް ދެމުންދާ އިރުޝާދުތައް ލިޔުމުން ފެންނަން ހުންނާނެ ކަމަށް ބާޔާނުގައި ވެއެވެ.
މީގެ އިތުރުން ޕީޖީ އޮފީހުން ބުނީ މިނިވަން ނޫސްވެރިކަމުގެ މައިގަނޑު އެއް ބަހާއަކީ ދެފަރާތުގެ ބަސް ހިމަނައިގެން، ތެދު ޚަބަރުތައް ޝާއިއު ކުރުން ކަމަށެވެ. ނަމަވެސް، ޕްރޮސިކިއުޓަރ ޖެނެރަލްއަށް ނިސްބަތްކޮށް، ޕްރޮސިކިއުޓަރ ޖެނެރަލްއާއި، ޕްރޮސިކިއުޓަރ ޖެނެރަލްގެ އޮފީހާމެދު އާންމުންގެ މެދުގައި އިތުބާރު ގެއްލޭ ގޮތަށް މީޑިއާއެއްގެ ވެބްސައިޓުގައި ގައި ދޮގު ލިޔުމެއް ޝާއިއު ކުރިއިރު، އެލިޔުމާ ގުޅޭގޮތުން ޕީޖީގެ ބަހެއް ހޯދާފައިނުވާ ކަމަށެވެ. އަދި ބަހެއް ހޯދުމަށް މަސައްކަތްކޮށްފައި ނުވާކަން ވެސް ބަޔާނުގައި ފާހަގަކޮށް ޕީޖީން ބުނީ މިއީ ނޫސްވެރިކަމުގެ އެތިކްސްއާއި، ނޫސްވެރިކަމުގެ ބެސްޓް ޕްރެކްޓިސްއާ ކަނޑައެޅިގެން ޚިލާފު އަމަލެއް ކަމަށެވެ. އެމައްސަލަ މޯލްޑިވްސް މީޑިއާ ކައުންސިލަށް ހުށަހެޅުމަށް ނިންމާފައިވާ ކަމަށް ޕީޖީ އޮފީހުން ބުނެއެވެ.
ޕީޖީ އޮފީހުން ބުނީ ޕްރޮސިކިއުޓަރ ޖެނެރަލް މަގާމުގެ ހައިސިއްޔަތުން ނިންމާ ނިންމުންތަކަކީ މިނިވަންކަމާއި މުސްތަގިއްލުކަމާއެކު، ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީއާއި، ގާނޫނާއި، ދިވެހި ރައްޔިތުންގެ ހައްގުތަކާއި މިނިވަންކަން އޭގެ ހަގީގީ މާނައިގައި ރައްކާތެރިކޮށް ނެގެހެއްޓުމަށް ނިންމާފައިވާ ނިންމުންތަކެއް ކަމަށެވެ.
އެމްއެމްޕީއާރްސީގެ ޚިޔާނާތުގެ މައްސަލައަކީ ގައުމީ މަސްލަހަތު ހިމެނޭ ޖިނާއީ ބޮޑު މައްސަލައެއްކަމުން، މި މައްސަލާގައި ވެސް އދުލު އިންސާފު ކަށަވަރުކުރުމަށް ކުރަންޖެހޭ އެންމެހައި މަސައްކަތްތައް އެއްވެސް އިސްތިސްނާއެއް ނެތި، ކުރަމުންދާނެ ކަމުގެ ޔަގީންކަން ޕީޖީ އޮފީހުގެ މިބަޔާނުގައި ބުނެފައިވެއެވެ.
