މަސައްކަތްތެރިންގެ ހައްގުގައި ޓީމްގެ މެމްބަރުން ސިލްސިލާ މުޒާހަރާތަކަށް
20 ޖޫން 2020 | ހޮނިހިރު 13:10ބިލް އޮތީ ކޮމިޓީ މަރުހަލާގައި
ވަޒީފާއާ ބެހޭ ގާނޫނަށް ހުށައަޅާފައިވާ އިސްލާހުތަކާއި ދެކޮޅަށް ރަށެއްގައި މުޒާހަރާކުރަނީ
ވަޒީފާއާ ބެހޭ ގާނޫނަށް ހުށައަޅާފައިވާ އިސްލާހުތަކާއި ދެކޮޅަށް ރާއްޖޭގެ އެކި ކަންކޮޅުތަކުގައި، މަސައްކަތްތެރިން ސިލްސިލާ މުޒާހަރާތަކެއް ކުރަން ފަށައިފިއެވެ.
ޓޫރިޒަމް އެމްޕްލޯއިސް އެސޯސިއޭޝަން އޮފް މޯލްޑިވްސް (ޓީމް) އިން ބުނީ، ހުކުރު ދުވަހުން ފެށިގެން ރާއްޖޭގެ އެކި ސަރަހައްދުތަކުގައި މުޒާހަރާ ކުރަމުންދާ ކަމަށެވެ. އެގޮތުން ފުވައްމުލަކު، ހއ. ދިއްދޫގެ އިތުރުން ބާރަށުގައި ދަނީ މުޒާހަރާތައް ކުރަމުންނެވެ.
މުޒާހަރާގެ ބައިވެރިން ތިބީ އެމީހުންގެ ޝުއޫރުތައް ފާޅުކުރުމުގެ ގޮތުން އެކި ކަހަލަ ބޯޑުތައް ހިފައިގެންނެވެ. މީގެ ތެރެއިން ގިނަ އަދަދެއްގެ ބައިވެރިންނަކީ ފަތުރުވެރިކަމުގެ ސިނާއަތުގައި ހަރަކާތްތެރިވަމުންދާ ފަރާތްތަކެވެ. ވަޒީފާއާ ބެހޭ ގާނޫނަށް އިސްލާހު ގެނައުމުގެ ބިލް އިތުރަށް ދިރާސާކުރުމަށް އިޖުތިމާއީ ކޮމިޓީއަށް ވަނީ ފޮނުވާފައެވެ.
ޓީމްގެ ކަންބޮޑުވުމަކީ ގާނޫނުގެ 21 ވަނަ މާއްދާ އަށް ހުށައަޅާފައިވާ އިސްލާހުތަކާއި، ސާވިސް ޗާޖަށް ގެންނަ ބަދަލުތަކުގެ އިތުރުން ޕްރޮބޭޝަން އަދި ސިކް ލީވަށް ގެންނަން ހުށައެޅި އިސްލާހުތަކެވެ.
ރާއްޖެ.އެމްވީއާ ވާހަކަދައްކަމުން ޓީމްގެ ސެކްރެޓަރީ ޖެނެރަލް މައުރޫފް ޒާކިރް ވިދާޅުވީ، އިސްލާހުތަކަށް ބަދަލެއް ނުގެންނަހާ ހިނދަކު މުޒާހަރާ ކުރިޔަށްދާނެ ކަމަށެވެ. އަދި އެ އިސްލާހުތަކަކީ މަޖިލީހަށް ހުށައެޅުމުގެ ކުރިން އެއްވެސް ވަރަކަށް ޓީމްއާ މަޝްވަރާ ކުރެވިގެން ހުށައެޅިފައިވާ އިސްލާހުތަކެއް ނޫން ކަމަށް ވިދާޅުވިއެވެ.
ޓީމުން ބުނީ، ބިލުގައި ހުރި ކަންބޮޑުވުންތަކާއި ގުޅޭ ގޮތުން އިކޮނޮމިކް މިނިސްޓްރީއާ މަޝްވަރާ ކުރެވެނު ކަމަށާއި، އެކަމަކު އެއްވެސް ކަހަލަ ކުރިއެރުމެއް ބޭއްވުނު ބައްދަލުވުންތަކުން ލިބިފައިނުވާ ކަމަށެވެ. ވަޒީފާއާ ބެހޭ ގާނޫނަށް ގެންނަ އިސްލާހުގެ ސަބަބުން މުވައްޒަފުންގެ ގިނަ ހައްގުތަކެއްް ގެއްލޭނެތީވެ ޓީމުން ވަނީ ކަންބޮޑުވުން ފާޅުކޮށްފައެވެ.
ސަރުކާރުގެ ފަރާތުން ކެނދިކުޅުދޫ ދާއިރާގެ މެމްބަރު އަހުމަދު އިސާ ގާނޫނަށް ހުށަހެޅުއްވި އިސްލާހުގައި ބުނެފައިވަނީ މީގެ ކުރިން މި ގާނޫނުގައި އޮތް ވަޒީފާގެ ޕްރޮބޭޝަން މުއްދަތު ތިންމަސް ދުވަހުގެ ބަދަލުގައި ހަތް މަސް ދުވަހަށް އިތުރު ކުރުމަށެވެ.
ވަޒީފާއާ ބެހޭ ގާނޫނަށް ހުށަހަޅާފައިވާ އިތުރު އިސްލާހުތަކުގެ ތެރޭގައި ވަޒީފާގެ އެއްބަސްވުން ފެށޭ ތާރީހާއި، އުޖޫރަ ދެވޭ މިންގަނޑާއި އުޖޫރަ ހިސާބު ކުރެވޭނެ ގޮތާއި، އުޖޫރަ ދިނުމަށް ކަނޑައަޅާ މުއްދަތުތަކާއި ޗުއްޓީ ލިބޭނެ ގޮތާއި، މުވައްޒަފުންގެ އަހުލާގާއި ގުޅޭ ގޮތުން އެ މުވައްޒަފަކަށް ފިޔަވަޅު އެޅިދާނެ އުސޫލުތައް އުނިކުރުން ހިމެނޭއިރު މުވައްޒަފު ބަލިވެގެން ސަލާމް ބުނާ އުސޫލަށްވެސް ވަނީ އިސްލާހު ހުށަހަޅާފައެވެ.
އެގޮތުން، މެޑިކަލް ސެޓްފިކެޓް ވަޒީފާއަށް ނިކުންނަ ދުވަހު ހުށަހެޅުމުން މެނުވީ، އެ މުވައްޒަފަކަށް ސަލާމުގެ ޗުއްޓީ ދިނުން ވަޒީފާ ދޭ ފަރާތުގެ މައްޗަށް ލާޒިމު ވެގެން ނުވާ ކަމަށް އިސްލާހުގައި ވެއެވެ.
މި އިސްލާހުތަކާއި ގުޅިގެން އާއްމުންގެ ފާޑުކިޔުން ވަނީ އިންތިހާއަށް އިތުރުވެފައެވެ. އެ އިސްލާހުތައް ފާސްވެގެން ދާނީ ރައްޔިތުންގެ ހިޔާލާ މަޝްވާރާ އެކު ކަމަށް އީސަ ވަނީ މީގެކުރިން ވިދާޅުވެފައެވެ.
