ގަވާއިދާ ހިލާފަށް އުޅެމުންދިޔަ ބަންގްލަދޭޝްގެ 2499 މީހުން ފުރުވާލެވިއްޖެ: ފޮރިން މިނިސްޓްރީ
19 ޖޫން 2020 | ހުކުރު 10:02ފޮނުވާލާފައިވަނީ މޯލްޑިވިއަންގެ 11 ފްލައިޓެއްގައި
ރާއްޖޭގައި ދިރިއުޅެމުންދާ ބިދޭސީންތަކެއް ފުރަންވެގެން ގޮސް އެއާޕޯޓުގައި
އެޕްރީލް މަހުގެ 21 އިން ފެށިގެން ޖޫން މަހުގެ 19ގެ ނިޔަލަށް، ލިޔެކިޔުން ނެތި ގަވާއިދާ ހިލާފަށް ރާއްޖޭގައި އުޅެމުންދާ ބަންގްލަދޭޝް މީހުންގެ ތެރެއިން 2499 މީހަކު އަނބުރާ ގައުމަށް ފޮނުވާލެވިފައިވާ ކަމަށް ފޮރިން މިނިސްޓްރީން ބުނެފި އެވެ.
މިނިސްޓްރީން ބުނީ، އެ މީހުން ފޮނުވާލާފައިވަނީ އެ ކަމަށް ހާއްސަކޮށް ގައުމީ އެއަރލައިން މޯލްޑިވިއަނުން ބޭއްވި 11 ފްލައިޓްގައިއާ، ބަންގްލަދޭޝްގެ ބިމާން އެއަރގެ ފްލައިޓެއްގެ އިތުރުން ބަންގްލަދޭޝްގެ އަސްކަރީ ދެ މަތިންދާ ބޯޓެއްގައި ކަމަށެވެ. އަދި ބަންގްލަދޭޝްގެ ބައެއް ރައްޔިތުން އަނބުރާ ގައުމަށް ދިޔުމަށް ބޭނުންކުރި މޯލްޑިވިއަންގެ ރިޕަޓްރިއޭޝަން ފްލައިޓެއް މެދުވެރިކޮށް ކަމަށް ފޮރިން މިނިސްޓްރީން މައުލޫމާތުދެއެވެ.
ބަންގްލަދޭޝް މީހުން އަނބުރާ ގައުމަށް ފޮނުވާލުމުގެ މަސައްކަތް ފެށުނީ، ރާއްޖޭގައި މަސައްކަތްކުރާ ބަންގްލަދޭޝްގެ އާބާދީގެ ތެރޭގައި ހަލުވިކަމާއި އެކު ކޮވިޑް-19 ފެތުރެން ފެށުމުންނެވެ. ހާއްސަކޮށް ތޮއްޖެހިގެން ދިރިއުޅޭ ބިދޭސީންގެ ތެރެއިން ޕޮޒިޓިވްވާ ކޭސްތަކުގެ އަދަދު ވަނީ ގިނަވެފައެވެ.
ތޮއްޖެހުން ކުޑަކުރުމުގެ ގޮތުން ސަރުކާރުން ކުރަމުންދާ މަސައްކަތުގެ ތެރެއިން ބައެއް ބިދޭސީން ވަނީ ސަރުކާރުން ގާއިމްކޮށްފައިވާ ފެސިލިޓީސްތަކަށް ބަދަލުކޮށްފައެވެ.
ހެލްތް މިނިސްޓްރީގެ ތަފާސް ހިސާބުތައް ދައްކާގޮތުން ބަންގްލަދޭޝްގެ 1100ށް ވުރެ ގިނަ މީހުން ވަނީ ޕޮޒިޓިވްވެފައެވެ. ބިދޭސީން ގާނޫނީ އިމުގެ ތެރެއަށް ވެއްދުމަށް އިކޮނޮމިކް މިނިސްޓްރީން ދަނީ މަސައްކަތްތަކެއްވެސް ކުރަމުންނެވެ. ނަމަވެސް ކޮވިޑުގެ ނުރައްކާ ބޮޑުވުމުން އެކަންތައްވަނީ މަޑުޖައްސާލާފައެވެ.
