ޖުމްހޫރީ ޕާޓީގެ ލީޑަރު ގާސިމް އިބްރާހިމް ހައްޔަރުކޮށްފައި ހުރީ ގާނޫނާ ހިލާފަށް ކަމަށް ކަނޑައަޅައި ދިނުމަށް، ކްރިމިނަލް ކޯޓަށް ހުށަހަޅައިފި އެވެ.

ގާސިމްގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ ހިސާން ހުސައިން ވިދާޅުވީ މި މައްސަލަ ކްރިމިނަލް ކޯޓަށް ހުށަހެޅީ، ރައްޔިތުންގެ މަޖިލީހުގެ އިމްތިޔާޒުގެ ގާނޫނުގައި ބުނެފައިވާ އިޖުރާއަތްތަކާ ހިލާފަށް ގާސިމް ބަންދުކޮށްފައި ހުރުމުން ކަމަށެވެ.

އިމްތިޔާޒުގެ ގާނޫނުގެ 13 ވަނަ މާއްދާގައި ބުނެފައިވާ ގޮތުގައި ޖިނާއީ ކުށެއްގެ ކުށުގެ ވެށިން ފިޔަވައި، ރައްޔިތުންގެ މަޖިލީހުގެ މެމްބަރަކު ހައްޔަރުކުރަން ޖެހޭނީ ޕްރޮސިކިއުޓާ ޖެނެރަލް މެދުވެރިކޮށް ކޯޓް އަމުރެއް ހޯދައިގެން ކަމަށެވެ. ނަމަވެސް ގާސިމް ހައްޔަރުކޮށްފައިވަނީ ޕްރޮސިކިއުޓާ ޖެނެރަލްގެ ދައުރެެއް ނެތި ފުލުހުން އަމިއްލަ އަށް ކޯޓް އަމުރެއް ހޯދައިގެންނެވެ.

އެހެންވެ އިދިކޮޅު ފަރާތްތަކުން ބުނަމުންދަނީ ގާސިމް ހުންނެވީ ގާނޫނާ ހިލާފު ބަންދެއްގައި ކަމަށާއި އެއީ ރަހީނު ކުރުން ކަމަށެވެ.

ކްރިމިނަލް ކޯޓަށް ހުށަހެޅި މައްސަލައިގެ އިތުރުން ގާސިމް ވަގުތުން މިނިވަން ކުރުމަށް ފުލުހުންނަށް ވެސް މިއަދު ވަނީ ހުށަހަޅައިފަ އެވެ. އަދި ގާސިމް ބަންދުގައިފައިވަނީ ގާނޫނާ ހިލާފަށް ކަމަށާއި އެހެންވެ އެ މައްސަލަ ބަލައި ދިނުމަށް އެޗްއާރުސީއެމް އަށް ވެސް މިއަދު ވަނީ ހުށަހަޅަ އެވެ.

މަޖިލީހުގެ ނައިބު ރައީސް މޫސާ މަނިކުގެ އިތުބާރު ނެތްކަމުގެ މައްސަލަ ހުށަހަޅާފައި ވަނިކޮށް، ގާސިމް ހައްޔަރުކުރީ މަޖިލީހުގެ މެމްބަރުންނަށް ރިޝްވަތު ދޭން އުޅުނުކަމުގެ ތުހްމަތުގަ އެވެ.

ޖުމްހޫރީ ޕާޓީގެ ލީޑަރު ޤާސިމް އިބްރާހިމް ކޯޓު އަމުރެއްގެ ދަށުން ހައްޔަރުކުރީ ބުރާސްފަތި ދުވަހުގެ ރޭ އިރާކޮޅުގެ ވަގުތެއްގައެވެ. އަދި ޤާސިމްގެ ބަންދާއި މެދު ގޮތެއް ނިންމުމަށް ހުކުރު ދުވަހު ކްރިމިނަލް ކޯޓަށް ހާޒިރުކޮށްފައިވާއިރު، ކޯޓުން ވަނީ ޤާސިމްގެ މައްޗަށް ތުހުމަތުކުރޭ މައްސަލަތަކާއި ގުޅޭގޮތުން ހެކި ހޯދުމަށް 6 ދުވަހުގެ ބަންދުގެ މުއްދަތެއްޖަހައިފަ އެވެ.

ދޫނިދޫ ޖަލުގައި ހައްޔަރުކޮށްފައި ހުރި ޖުމްހޫރީ ޕާޓީގެ ލީޑަރު ގާސިމް އިބްރާހީމް ހައްޔަރުކުރުމަށް ކްރިމިނަލް ކޯޓުން ނެރުނު އަމުރު އިސްތިއުނާފު ކުރުމަށް ކްރިމިނަލް ކޯޓަށް ހުށަހެޅި މައްސަލަ ބަލައި ނުގަނ ވަނީ ބޭރުކޮށްލާފައެވެ.

ގާސިމް އިބްރާހީމްގެ ގާނޫނީ ވަކީލުންގެ ޓީމުން އާދީއްތަ ދުވަހު ނެރުނު ނޫސްބަޔާނެއްގައި ބުނެފައިވަނީ ރައްޔިތުންގެ މަޖިލީހުގެ މެމްބަރަކު ހައްޔަރުކުރެވޭނީ ފުލުހުން އެކަމަށް އެދި ޕްރޮސެކިއުޓަރ ޖެނެރަލަށް ހުށަހެޅުމުން، އެފަދަ އަމުރެއް ނެރެދިނުމަށް އެދި ސުޕީރިއާ ކޯޓަކަށް ޕީޖީ ހުށަހެޅުމުން ކަމަށް ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ގާނޫނުގައި ބަޔާންކޮށްފައިވާ ކަމަށެވެ. ގާނޫނުގައި މިގޮތަށް ބަޔާންކޮށްފައި ވަނިކޮށް، މަޖިލީހުގެ މާމިގިލީ ދާއިރާގެ މެމްބަރު ގާސިމް އިބްރާހީމް ހައްޔަރުކުރުމުގެ އަމުރު 6 އޭޕްރީލް 2017 ގައި ކްރިމިނަލް ކޯޓުން ނެރެފައިވަނީ ފުލުހުންގެ މުއައްސަސާގެ އެދުމަކަށް ކަމަށް ވަކީލުންގެ ބަޔާނުގައި ވަނީ ބުނެފައެވެ.