ރައުދާގެ މަރުގެ ހަގީގަތް ހޯދުމަށް ފުރިހަމަ ތަހުގީގެއް ކުރަންޖެހޭ: ބަންގްލަދޭޝްގެ ކުރީގެ ރައީސް
ރައުދާ މަރުވީ ރޭޕްކޮށް ނުވަތަ އަނިޔާއެއް ދިނުމުންތޯ ބަލަންޖެހޭ
ރައުދާގެ ހަށިގަނޑު ހޮނިހިރު ދުވަހު ވަނީ ވަޅުލާފަ
ބަންގްލަދޭޝްގައި ތައުލީމް ހާސިލްކުރަމުން ދިޔަ ދިވެހި މޮޑެލް ރައުދާ އާތިފްގެ މަރުގެ ފުރިހަމަ ތަހުގީގެއް ކުރަންޖެހޭ ކަމަށް އެގައުމުގެ ކުރީގެ ރައީސް ހުސެއިން މުހައްމަދު އިރުޝާދު ވިދާޅުވެއްޖެ އެވެ.
ބަންގްލަދޭޝްގެ ޖަތިޔަ ޕާޓީގެ ޗެއާމަންގެ މަގާމުގައި ހުންނެވި އިރުޝާދު ވިދާޅުވީ ރައުދާގެ މަރުގެ ހަގީގަތް ހޯދުމަށް ފުރިހަމަ ތަހުގީގެއް ކުރަންޖެހޭ ކަމަށާއި، ރައުދާ މަރުވީ ރޭޕްކޮށް ނުވަތަ އަނިޔާއެއް ދިނުމުންތޯ ބަލަންޖެހޭ ކަމަށެވެ.
ކުރީގެ ރައީސް ހުސެއިން މުހައްމަދު އިރުޝާދު
އިރުޝާދު އެފަދައިން ވިދާޅުވީ ޖަތިޔަ ޕާޓީގެ ޒުވާނުންގެ ގޮފިން އިންތިޒާމްކުރި ހަރަކާތެއްގައި ވާހަކަ ދައްކަވަމުންނެވެ.
އުމުރުން 21 އަހަރުގެ ރައުދާ ދަންޖެހިގެން މަރުވެފައި ހުއްޓާ ފެނުނީ މިދިޔަ މަހުގެ 29 ވަނަ ދުވަހު، އޭނާ ތައުލީމް ހާސިލްކުރަމުންދިޔަ ބަންގްލަދޭޝްގެ އިސްލާމީ ބޭންކް މެޑިކަލް ކޮލެޖުގެ ހޮސްޓެލްގައި އޭނާ ދިރިއުޅޭ ކޮޓަރި ތެރެއިންނެވެ.
ރައުދާ މަރުވީ ދަންޖެހިގެން ކަމަށް އޮޓޮޕްސީ ރިޕޯޓުގައި ބުނެފައިވީ ނަމަވެސް، އޮޓޮޕްސީ ހެދި، ރާޖްޝާހީ މެޑިކަލް ކޮލެޖު ހޮސްޕިޓަލުގެ ޓީމްގެ މިނިވަންކަމާ މެދު ރައުދާގެ އާއިލާއިން ވަނީ ސުވާލު އުފައްދަވާފަ އެވެ.
އޮޓޮޕްސީ ހެދި ޓީމުގައި ރައުދާ އުޅުނު ކޮލެޖުގެ މުވައްޒަފަކު ހިމެނޭތީ ރާޖްޝާހީ މެޑިކަލް ކޮލެޖުގެ ފިޒިޝަނަކު ވެސް ވަނީ އެކަމާ ސުވާލު އުފައްދަވާފަ އެވެ.
ރައުދާ މަޝްހޫރުވެރިފައިވަނީ އޭނާގެ ވިލުނޫކުލައިގެ ލޮލުގެ ރީތި ކަމަށް
ރައުދާ ޑޮކްޓަރުކަން ކިޔަވަމުންދިޔަ އިސްލާމީ ބޭންކް މެޑިކަލް ކޮލެޖުގެ މުވައްޒަފުންނާއި ދަރިވަރުން ބުނާ ގޮތުގައި ރައުދާ އަމިއްލައަށް މަރުވީ ޑިޕްރެޝަންގެ ސަބަބުންނެވެ. ނަމަވެސް، ރައުދާގެ ބައެއް އެކުވެރިން ބުނާ ގޮތުގައި ރައުދާއާ މެދު ނުރުހޭ ބަޔަކު ކޮލެޖުގައި އުޅެ އެވެ. ރައުދާގެ އާއިލާއިން ބުނާ ގޮތުގައި އޭނާގެ ޑިޕްރެޝަންގެ މައްސަލައެއް ނުހުރެ އެވެ. އަދި ރައުދާއަކީ ކިޔެވުމަށް މޮޅު ކާމިޔާބު ކުއްޖެއް ކަމަށާއި އަމިއްލައަށް މަރުވާންޖެހޭ ފަދަ އެއްވެސް ކަމެއް މެދުވެރިވެފައިނުވާ ކަމަށް ބޭރުގެ މީޑިއާތަކަށް އާއިލާއިން މައުލޫމާތު ދީފައި ވެއެވެ.
ވިލުނޫކުލައިގެ ލޮލުގެ ވެރިޔާގެ ގޮތުން ރައުދާ މަޝްހޫރުވެފައިވާ އިރު އޭނާ ވަނީ މަޝްހޫރު މެގަޒިން ވޯގް އިންޑިޔާގެ ބޭރުގަނޑުން ފެނިގެން ގޮސްފަ އެވެ. އެއީ މިފަދަ މަޝްހޫރު މަޖައްލާއަކުން ރާއްޖޭގެ މޮޑަލެއް ފެނިގެން ދިޔަ ފުރަތަމަ ފަހަރެވެ.
އޮޓޮޕްސީއަށް ފަހު، ރައުދާގެ ހަށިގަނޑު ބަންގްލަދޭޝްގެ ހޭތެމްހާ ގަބުރުސްތާނުގައި ހޮނިހިރު ދުވަހު ވަނީ ވަޅުލާފަ އެވެ. ބަންގްލަދޭޝްގެ ނޫސްތަކުގައި ބުނެފައިވާ ގޮތުގައި ފުރަތަމަ އޮޓޮޕްސީއާ މެދު ހިތްހަމަނުޖެހޭތީ އާއިލާއިން ދަނީ ދެވަނަ އޮޓޮޕްސީއެއް ހެދުމާ މެދު ވިސްނަމުންނެވެ.
