މާލެސިޓީގައި އިއުލާންކޮށްފައިވާ ލޮކްޑައުންގެ ދެވަނަ ފޭސްގައި ދިން ލުއިތަކުގައި އަމަލުކުރަނީ އުސޫލާ އެއްގޮތަށްތޯ ބަލާ މޮނިޓަރ ކުރާނެ ކަމަށް މާލެ ސިޓީ ކައުންސިލުން ބުނެފިއެވެ.

މާލެސިޓީ ކައުންސިލުން ބުނީ ފުލުހުންނާ ގުޅިގެން ކުރާ މަސައްކަތުގައި ފިހަރާތަކަށް ޒިޔާރަތް ކުރާނެ ކަމަށާއި، ފިހަރާތަކުގެ ބޭރުގައި އެންމެ ގިނަ ވެގެން ފިހާރައަށް ވަދެވޭނެ މީހުން އަދަދު ފެންނާނެހެން ސްޓިޖަހާފައި ހުންނަން ޖެހޭ ކަމަށެވެ. ކައުންސިލުން ބުނީ ސްޓިކަރ ޖަހާފައި ހުރިތޯއާއި ފިހާރައިގެ ބޮޑު މިނަށް ބަލައި މީހުން ޚިދުމަތް ހޯދުމަށް ވައްދާ މިންވަރު ބަލާ މޮނިޓަރި ކުރާނެ ކަމަށެވެ.

ދެވަނަ ފޭސްގައި ބޮޑެތި ލުއިތަކެއް ދިންކަމުގައިވީ ނަމަވެސް އުސޫލާ އެއްގޮތަށް އަމަލު ކުރުމަށް ކައުންސިލުން ވަނީ އިލްތިމާސްކޮށްފައެވެ. އެގޮތުން އިޖްތިމާއީ ގައިދުކަން ދެމެހެއްޓުމާއި، ވިޔަފާރި ކުރުމަށް ފިހަރާތަކަށް ވަންނަ ކަސްޓަމަރުންނަށް މާސްކް އެޅުމަށް ބާރު އެޅުމާއި، ސެނެޓައިޒް ކުރެވޭ ގޮތަށް އިންތިޒާމްތައް ހަމަޖައްސަން ޖެހެއެވެ. އަދި ވިޔަފާރިތަކުގައި ޚިދުމަތްދޭން ތިބޭ މުވައްޒަފުން ވެސް ރައްކާތެރިކަމުގެ ފިޔަޅުއަޅުމަށް އެޗްޕީއޭއިން އިލްތިމާސްކުރެއެވެ.

15 ޖޫން 2020 އިން ފެށިގެން، ޢާންމު ޞިއްޙަތުގެ ކުއްލި ނުރައްކަލުގެ ޙާލަތަށް ރިޢާޔަތްކޮށް ލުއި ދިނުމުން، އިތުރު ހުއްދައެއް ނުނަގާ، ވިޔަފާރިކުރުމަށް ހުޅުވާލެވޭނެ ކަމަށް ވެސް އިކޮނަމިކް މިނިސްޓްރީން ބުނެއެވެ.

އިކޮނަމިކް މިނިސްޓްރީން ބުނީ ވިޔަފާރިކުރުމުގެ ހުއްދަ ލިބޭ ހުރިހާ ފަރާތްތަކުންވެސް، ހެލްތް ޕްރޮޓެކްޝަން އެޖެންސީން ކަނޑައަޅާ އުޞޫލުތަކާއި އެއްގޮތަށް ޢަމަލުކުރުމަށް އެދޭ ކަމަށެވެ. އަދި އެއްވެސް މަޢުލޫމާތެއް އޮޅުންފިލުވަން ބޭނުންވާނަމަ 1691 އަށް ގުޅުމަށް ވަނީ އެދިފައެވެ.