ފުލުހުން ބަލާ މައްސަލައަކާ ގުޅިގެން ރާއްޖެޓީވީގެ އަޒްމޫނާއި ފައިރޫޒް ޕޮލިހަށް ހާޒިރުކޮށްފި
ސެންސިޓިވް އެންޑް ކޮންފިޑެންޝަލް މައްސަލައަކަށްވާތީ ފުލުހުންގެ އެދުމުގެ މަތިން މައުލޫމާތު ދިނުމަށް ދެ ނޫސްވެރިންވެސް ވަނީ ދެކޮޅު ހަދާފަ
ރާއްޖޭގެ ޓީވީގެ ދެ ނޫސްވެރިން ކަމަށްވާ ފައިރޫޒާއި އަޒްމޫން
ފުލުހުން ބަލަމުންދާ މައްސަލައަކާ ގުޅިގެން ރާއްޖެޓީވީގެ ސީނިއަރ ދެ ނޫސްވެރިން ކަމަށްވާ އަހުމަދު ފައިރޫޒާއި އަޒްމޫން އަހުމަދުދީދީ ފުލުހުންގެ އިދާރާ އަށް ހާޒިރުކޮށްފިއެވެ.
ފައުރޫޒާއި އަޒްމޫން ވަނީ އަންގާރަ ދުވަހު ފުލުސް އޮފީހަށް ހާޒިރުވެ ބަޔާން ދީފައެވެ. އެ ދެ ނޫސްވެރިން ވެސް ފުލުސް އޮފީހަށް ހާޒިރުވީ ގާނޫނީ ވަކީލް އަބްދުﷲ ހަސީނާއެކު އެވެ.
ފުލުހުންގެ ސެންސިޓިވް އެންޑް ކޮންފިޑެންސަލް އިންވެސްޓިގޭޝަން ޔުނިޓުން ތަހުގީގުކުރާ އެމައްސަލާގައި އެ ދެ ނޫސްވެރިންނާއި ގާނޫނީ ވަކީލު ވެސް ވަނީ އެއްޗެއް ބުނުމަށް ދެކޮޅު ހަދާފައެވެ. އެ ބޭފުޅުން އެމައްސަލާގައި އެއްޗެއް ވިދާޅުވާ ދެކޮޅު ހަދާފައި ވަނީ ފުލުހުންގެ އެދުމުގެ މަތިން އެމައްސަލައަކީ ސެންސިޓިވް އެންޑް ކޮންފިޑެންޝަލް މައްސަލައަކަށް ވާތީ އެވެ.
ފައިރޫޒް އާއި އަޒްމޫން ފުލުހަށް ހާޒިރުވުމަށް އަންގާފައި ވާއިރު ފުލުހުންގެ ދައުރު އަދާކުރުމަށް ދަތިކުރުމުގެ ދައުވާގައި ރާއްޖެ ޓީވީގެ ނޫސްވެރިޔާ މުހައްމަދު ވިސާމުގެ މައްޗަށް ބުރާސްފަތި ދުވަހު ހުކުމް އިއްވުމަށް ވަނީ ހަމަޖެހިފައެވެ. އަދި އެމައްސަލާގައި ރާއްޖެ ޓީވީގެ ކެމެރާމަން އާދަމް ޒަރީރުގެ މައްޗަށް ވެސް ފުލުހުންގެ ދައުރު އަދާކުރުމަށް ދަތިކުރުމުގެ ކުށުގެ ދައުވާ އުފުލިއިރު، މިދިޔަ ފެބްރުއަރީ 27 ވަނަ ދުވަހު 3،000ރ. އިން އޭނާ ޖޫރިމަނާކުރުމަށް ވަނީ ހުކުމް ކޮށްފައެވެ.
މީގެ އިތުރުން ގާނޫނު ތަންފީޒުކުރާ މުވައްޒަފެއްގެ މަސައްކަތަށް ގަސްތުގައި ހުރަސްއެޅުމުގެ ދައުވާގައި ވިސާމާ އެކު ރާއްޖެޓީވީގެ ނޫސްވެރިޔާ ލީވާން އަލީ ނާސިރުގެ މައްޗަށް 28،800ރ. އިން އޭނާ ޖޫރިމަނާ ކުރުމަށް ޖެނުއަރީ 24 ވަނަ ދުވަހު ހުކުމް ކޮށްފައި ވެއެވެ.
ރާއްޖެޓީވީގެ ސީއޯއޯ ހުސެއިން ފިޔާޒް މޫސާގެ މައްޗަށް އުފުލާފައިވާ އަތްލުމުގެ ކުށުގެ ދައުވާގެ ޝަރީއަތުގައި ދެން އޮތީ ޚުލާސާ ބަޔާން ހުށަހެޅުމެވެ. ނަމަވެސް، އަދި އެ އަޑުއެހުން ތާވަލުކޮށްފައެއް ނުވެއެވެ.
