މއ. ކިނާރާ ހައުސް ބަލާ ފާސްކުރަނީ ޚާއްސަ އޮޕަރޭޝަންއެއްގެ ދަށުން: ފުލުހުން
އިތުރު މަޢުލޫމާތެއް ހާމަ ކުރެވެން ނެތް ކަމަށް ފުލުހުން ވިދާޅުވި
މއ. ކިނާރާ ހައުސް ބަލައި ފާސްކުރުމަށް އެ ސަރަޙައްދުގައި ފުލުހުން ހަރަކާތްތެރިވަނީ
މއ. ކިނާރާ ހައުސް ބަލައި ފާސްކޮށް، އެސަޙައްދުގައި ފުލުހުން ހަރަކާތްތެރިވަމުންދަނީ ފުލުހުން ހިންގަމުންދާ ޚާއްސަ އޮޕަރޭޝަންއެއްގެ ދަށުން ކަމަށް ފުލުހުން ބުނެފިއެވެ.
މއ. ކިނާރާ ހައުސްއަށް ފުލުހުން ވަދެ، އެ ގެ ހުންނަ ސަރަޙައްދު ބަންދުކޮށްގެން ހޯމަ ދުވަހުގެރޭ ފުލުހުން ހިންގަމުންދާ ހަރަކާތާއި ގުޅޭގޮތުން ރާއްޖެއެމްވީއިން ސުވާލުކުރުމުން، ފުލުހުންގެ މީޑީއާ އޮފިޝަލް ވިދާޅުވީ ފުލުހުން ޚާއްސަ އޮޕަރޭޝަނެއް ހިންގަމުންދާ ކަމަށާއި، މިވަގުތު ހާމަކުރެވެން އޮތީ އެވަރަށް ކަމަށެވެ.
މައްޗަންގޮޅީގައި ފުލުހުން ގެއެއް ބަލައި ފާސްކުރަމުންދާއިރު، ފުލުހުން ކުރި ޓްވީޓެއްގައި ބުނެފައިވަނީ، ހޯމަ ދުވަހުގެ ރެއިން ފެށިގެން، މާލެތެރެ ބެލެހެއްޓުމުގައި އިތުރު ފުލުހުން ހަރަކާތްތެރިވަމުން ދާނެ ކަމަށާއި، މި އޮޕަރޭޝަންގައި މީހުންނާއި ސުވާލުކޮށް، ބަލައި ފާސްކޮށް، ސާމްޕަލް ހޯދާނެ ކަމަށެވެ.
ފުލުހުން ޚާއްސަ އޮޕަރޭޝަން އެއް ފަށައި، މާލެތެރެ ބެލެހެއްޓުމަށް އިތުރު ފުލުހުން ނެރެފައިވާއިރު، މާލެތެރެ ބެލެހެއްޓުމަށް ނެރެފައިވާ އިތުރު ފުލުހުންގެ ތެރޭގައި ތަޖުރިބާ ނެތް، ފުލުހުންގެ ޚިދުމަތަށް އައު ފަރާތްތައް ގިނަކަން ފާހަގަކުރެވެއެވެ.
ފުލުހުން މިފަދަ އޮޕަރޭޝަންއެއްފަށައި، މީހުންނާއި ތަންތަން ބަލައި ފާސްކުރަން ފަށާފައި މިވަނީ މަޝްޙޫރު ބްލޮގަރ އަދި އެކްޓިވިސްޓް ޔާމީން ރަޝީދު، ހޮނިހިރު ދުވަހުގެރޭ އަނިޔާވެރި ގޮތަކަށް މަރާލާފައި ވަނިކޮށެވެ. އެ ޖަރީމާއާއި ގުޅިގެން މިހާތަނަށް އެއްވެސް މީހަކު ހައްޔަރުކުރިކަން ފުލުހުން ހާމަކޮށްފައެއް ނުވެއެވެ.
