ސިޔާސީ ނިޒާމަކީ ވާދަވެރިންނާއެކު ހިންގަންޖެހޭ ނިޒާމެއް، މަޖިލިސް ހިންގަން ބޭނުމީ މައިނޯރިޓީ އާއެކު: ރައީސް ނަޝީދު
މަޖިލީހުގެ ނިޒާމު ހިފެހެއްޓުމަށް ކުރަންޖެހޭ ކަންކަން ކުރަންޖެހޭ ކަމަށް ދެކެވަޑައިގަންނަވާ ކަމަށް ރައީސް ނަޝީދު ވިދާޅުވި
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ރައްޔިތުންގެ މަޖިލީހުގެ މަސައްކަތްތައް ކުރިޔަށް ގެންދަން ބޭނުންފުޅުވަނީ މަޖިލީހުގައި ހިމެނޭ ބައިމަދު ޕާޓީތަކާއެކު ކަމަށާއި ސިޔާސީ ނިޒާމަކީ ވާދަވެރިންނާއެކު ހިންގަންޖެހޭ ނިޒާމެއް ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެ އެވެ.
އިދިކޮޅު ޕީޕީއެމް/ޕީއެންސީ ކޯލިޝަނުން ވަނީ ރައްޔިތުންގެ މަޖިލީހުގެ ޖަލްސާތައް ބޮއިކޮޓް ކޮށްފަ އެވެ. އެއީ ކުރީ ކައުންސިލަރުންގެ ދައުރު ދަންމާލުމަށް ޤާނޫނު އަސާސީއަށް ބަދަލު ގެނައުމަށް ބޭއްވި ޖަލްސާގައި ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެންބަރު އަޙްމަދު ޝިޔާމުގެ ނަން އިއްވާ ތަޅުމުން ނެރެން އުޅުމުގެ ތެރޭގައި ހިންގި ހަމަނުޖެހުންތަކަށް ފަހުގަ އެވެ. އެކަމުގައި އެމްޑީޕީގެ މެންބަރުން ޝިޔާމަށް ޙަމަލާދިން ކަމަށް ތުހުމަތުކޮށް މައްސަލަ ތަޙުޤީޤުކުރަން ފުލުހުންނަށް ވެސް ވަނީ ހުށަހަޅާފަ އެވެ. އެކަމާއި ގުޅިގެން އިދިކޮޅު މެންބަރުން ޖަލްސާތަކަށް ވަޑައިނުގަންނަވާއިރު، އެ މެންބަރުން ހުށަހަޅުއްވާފައިވާ ޤަރާރުތަކާއި ބިލުތަކުގެ މަސައްކަތްތައް އަންނަނީ ޖަލްސާތަކަށް އެޖެންޑާ ކުރަމުންނެވެ.
އެގޮތުން އަންގާރަ ދުވަހުގެ ޖަލްސާގައި ފެލިދޫ ދާއިރާގެ ޕީއެންސީ މެންބަރ ފަޒުލް ރަޝީދު ހުށަހަޅުއްވާފައިވާ ޤަރާރެއް އެޖެންޑާކޮށްފައިވެ އެވެ. ނަމަވެސް ފަޒުލް ޖަލްސާއަށް ވަޑައިނުގަންނަވާތީ އާއި އަދި އެޕާޓީގެ އެހެން މެންބަރަކުވެސް ޖަލްސާއަށް ވަޑައިނުގަންނަވާތީ އެ ޤަރާރު ހުށަހަޅާ ބަހުޘް ކުރިޔަށް ގެންދަވާފައެއް ނުވެއެވެ. އެކަމާއި ގުޅޭގޮތުން ވާހަކަ ދައްކަވަމުން އަންގާރަ ދުވަހުގެ ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވީ އިދިކޮޅު ޕާޓީތަކުގެ މަޖިލިސް މެންބަރުން މަޖިލީހަށް ވަޑައިނުގެންނެވި ނަމަވެސް އެކަން ފާހަގަ ނުވަނީ އެއީ ކުރިން ވެސް އެ މެންބަރުން އެހާ ގިނައިން މަޖިލީހަށް ވަޑައިނުގަންނަވާތީ ކަމަށް ވެދާނެ ކަމަށެވެ.
ބުދަ ދުވަހުގެ ޖަލްސާ ފަށްޓަވަމުން ރައީސް ނަޝީދު ވިދާޅުވީ މަޖިލިސް ހިންގަން ބޭނުންފުޅުވަނީ ބައި މަދު ޕާޓީތަކާއެކުގައި ކަމަށެވެ. އަދި އެޕާޓީތަކަށް ލިބިދޭ ޙައްޤުތަކާއެކު ކަމަށާއި މަޖިލީހުގެ ނިޒާމު ހިފެހެއްޓުމަށް ކަންކަން ކުރަންޖެހޭ ކަމަށް ދެކެވަޑައިގަންނަވާ ކަމަށް ރައީސް ނަޝީދު ވިދާޅުވި އެވެ. އެހެންނަމަވެސް އެއީ ތާ އަބަދު އެކަން އޮންނަ ގޮތްކަމަށް ދެކިވަޑައިނުގަންނަވާ ކަމަށް ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ ޕާޓީތައް އެކުގައި މަސައްކަތް ކުރުމަކީ ނުވަތަ ވާދަވެރި ކަމާއެކީގައި މަސައްކަތްކުރުމަކީ ރާއްޖޭގެ ކުރިއެރުމަށާއި ތަރައްޤީއަށް ކޮންމެހެން ބޭނުންކަމެއްގެ ގޮތުގައި ދެކެވަޑައިގަންނަވާ ކަމަށެވެ. އަދި މިއީ'އެއް ޕާޓީ' ޤައުމެއް ނޫން ކަމަށާއި ރާއްޖޭގައި މަލްޓި ޕާޓީ ޑިމޮކްރަސީ ތަޢާރަފު ކުރެވުނު ފަހުން ހައެއްކަ އިންތިޚާބު ކުރިޔަށް ގެންގޮސްފައިވާ ކަމަށެވެ.
ރައްޔިތުންގެ މަޖިލީހުގައި 87 މެންބަރުން ތިއްބަވާއިރު ވެރިކަން ހިންގާ މައި ޕާޓީ އެމްޑީޕީގެ 65 މެންބަރުން މަޖިލީހުގައި ތިއްބަވަ އެވެ. އިދިކޮޅު ޕީޕީއެމް ޕީއެންސީ އަށް ނިޞްބަތްވެ ވަޑައިގަންނަވާ 9 މެންބަރުން ތިއްބަވައެވެ.
