ކޮވިޑް-19 ޖެހިގެން އޮގަސްޓް މަސް އަންނަންވާއިރަށް އެމެރިކާއިން 145،000 މީހުން މަރުވާނެ ކަމަށް ލަފާކޮށްފި
މިއީ ކުރިން އެޔުނިވަރސިޓީން ހެދި ދިރާސާއަށް ވުރެ ފަސް ހާސް މީހުން އިތުރު އަދަދެއް
ނިއުޔޯކް ސިޓީގެ މަގެއްގެމަތި، ވައިރަސް ފެތުރޭތީ މަގުތައް ވަނީ ފަޅުވެފައި
އެމެރިކާގައި ކޮވިޑް-19 ޖެހިގެން އޮގަސްޓް މަސް އަންނަންވާއިރަށް 145،728 (އެއްލައްކަ ސާޅީސް ފަސް ހާސް ހަތް ސަތޭކަ އަށާވީސް) މީހުން މަރުވާނެ ކަމަށް ޔުނިވަރސިޓީ އޮފް ވޮޝިންގޓަން އިން ހެދި ދިރާސާއަކުން ދައްކައިފި އެވެ.
މިއީ ކުރިން އެޔުނިވަރސިޓީން ހެދި ދިރާސާއަށް ވުރެ ފަސް ހާސް މީހުން އިތުރު އަދަދެކެވެ. ހުކުރު ދުވަހު އިންސްޓިޓިއުޓް ފޮރ ހެލްތު މެޓްރިކްސް އެންޑް އެވަލުޔޭޝަން އެޓް ދަ ޔުނިވަރސިޓީން ހެދި ދިރާސާއިން ދައްކާފައިވަނީ އޮގަސްޓް މަސް އަންނަންވާއިރަށް 140،496 (އެއް ލައްކަ ސާޅީސް ހާސް ހަތަރު ސަތޭކަ ނުވަދިހަ ހަ) މީހުން މަރުވާނެ ކަމަށެވެ. ނަމަވެސް އަދަދުތަކަށް ބަދަލު އަންނަ ސަބަބެއް ހާމަކޮށްފަ އެއްނުވެ އެވެ.
އަންދާޒާތަކަށް ބަދަލު އައިސްފައިމިވަނީ ޓެކްސަސް އިން ވައިރަސް ޖެހިގެން ހޮސްޕިޓަލްގައި އެޑްމިޓް ކުރި މީހުންގެ އަދަދު ރިކޯޑް މިންވަރަކަށް މައްޗަށް ގޮސްފައިވަނިކޮށެވެ. އަދި އެމެރިކާގެ 22 ސްޓޭޓެއްގައި ވައިރަސް ފެތުރޭ މިންވަރު މައްޗަށް ޖެހިފައިވަނިކޮށެވެ.
ގައިންގަޔަށް އަރާ ބަލިތަކުގެ މާހިރުން ލަފާކުރާ ގޮތުގައި އެމެރިކާގައި މިހާރު ހިނގަމުންދާ މުޒާހަރާތަކާއެކު ވައިރަސް އިތުރަށް ފެތުރުމުގެ ފުރުސަތު އެބައޮތެވެ.
މިހާތަނަށް އައިއިރު އެމެރިކާއިން 2 މިލިއަން މީހުންނަށް ވަނީ ވައިރަސް ޖެހިފަ އެވެ. އަދި މަރުވެފައިވަނީ 113,061 (އެއްލައްކަ ތޭރަ ހާސް ފަސްދޮޅަސް އެކެއް) މީހުންނެވެ.
