ރޯދަމަސް ފެށުނުއިރުވެސް ޔަމަނުގެ 17 މިލިއަން މީހުން ބަނޑުހައިހޫނު ކަމުގައި
ކޮލެރާ ފެތުރި ބަލިމަޑުކަމެއްވެސް ޔަމަންގައި ވަނީ ފެތުރިފައި
ހާލުގައި ޖެހިފައިވާ ބައެއް: މިރޯދަމަހުވެސް ޔަމަންގެ ގިނައަދަެއްގެ ބަޔަކު ބަނޑުހައި ހޫނުކަމުގައި
މި ރޯދަމަސް ފެށިގެން ކުރިއަށް ދާއިރުވެސް ޔަމަނުގެ 17 މިލިއަން މީހުންތިބީ ބަނޑުހައިހޫނު ކަމުގައިކަމަށް އެހީދޭ ޖަމާއަތްތަކުން ބުނެފިއެވެ. އެހީދޭ ޖަމާއަތްތަކުންބުނީ ދުވާލު އެއް އިރުވެސް ކާނެ އެއްޗެއް ނެތް 17 މިލިއަން މީހުން ޔަމަނުގައި ތިބިއިރު، މިއީ މިވަގުތު ދުނިޔެއަށް ކުރިމަތިވެފައިވާ އިންސާނީ އެންމެބޮޑު ކާރިސާ ކަމަށެވެ. އަދި އެ ފަރާތްތަކަށް އެހީވުން އަވަސް ކުރުމަށްވެސް ޖަމާއަތްތަކުންވަނީ އދ އަށް ގޮވާލާފައެވެ. ބަނޑުހައި ހޫނު ކަމުގައި ދެ މިލިއަނަށް ވުރެ ގިނަ ކުޑަކުދިން އުޅެމުންދާއިރު، ކޮންމެ ދިހަ މިނެޓަކުން އެއްފަހަރު ފަސް އަހަރުން ދަށުގެ ކުޑަކުއްޖަކު ބަނޑުހައި ހޫނު ކަމުގައި މަރުވަމުން ދާކަމަށްވެސް އެހީދޭ ޖަމާއަތްތަކުން ދަނީ ބުނަމުންނެވެ. ޔަމަނުގެ ދާހިލީ ހަނގުރާމައަށް ދެ އަހަރަށް ވުރެ ގިނަ ދުވަސް ވެފައިވާއިރު އެގައުމު ވަނީ މުޅިން ސުންނާފަތި ވެފައެވެ. އަދި ކޮލެރާ ފެތުރި ޔަމަނުގައި ވަނީ ބޮޑު ބަލިމަޑުކަމެއްވެސް ފެތުރިގެން ގޮސްފައެވެ.
