މިދިޔަ އަހަރުގެ ޖުލައިމަހު ތުރުކީއަށް ގެންނަންއުޅެ ނާކާމިޔާބުވި ބަޣާވާތަށްފަހު އެ ގައުމުގައި އިއުލާނުކޮށްފައިވާ ކުއްލި ނުރައްކަލުގެ ހާލަތު އިތުރު ތިންމަސް ދުވަހަށް ދިގު ދެންމުމަށް އެގައުމުގެ ގާނޫނުހަދާ މަޖިލީހުން ރުހުން ދީފިއެވެ.

ބޮޑުވަޒީރު ބިނާލީ ޔިލްދްރިމް އިސްނަންގަވައިގެން ހުށަހެޅުއްވި މި ހުށަހެޅުމަށް ވެރިކަން ކުރާ ޖަސްޓިސް އެންޑް ޑިވެލޮޕްމަންޓް ޕާޓީއާއި އިދިކޮޅު ނޭޝަނަލިސްޓް ޕާޓީގެ ތާއީދުވެސް ލިބިފައިވެއެވެ.

މި ނިންމުން އައިސްފައި މިވަނީ ރައްޔިތުން ނުކުމެ ނާކާމިޔާބު ކޮށްލި ބަޣާވާތަށް އެއް އަހަރުފުރުން ފާހަގަކުރުމަށް ހަފްތާ ބަންދުގައި އެއްވުމެއް ބާއްވާފައިވަނިކޮށެވެ.

 ބަޣާވާތާ ގުޅިގެން 250 މީހުން މަރުވި އިރު 2،200 އަށްވުރެ ގިނަ މީހުން ޒަޚަމްވިއެވެ.

ބަޣާވާތާ ދެކޮޅު ހެދުމަށް އެތައް ހާސް ބަޔަކު ހޮނިހިރު ދުވަހު ބޭއްވި އެއްވުމުގައި ވާހަކަ ދައްކަވަމުން ރައީސް ރަޖަބް ތައްޔިބް އޮރްދޮޣާންވަނީ ބަޣާވާތުގައި ބައިވެރިވި ފަރާތްތަކުގެ"ބޯތަށް ޗިސްޗިސް ކޮށްލައްވާނެކަމަށް"ވިދާޅުވެ އިންޒާރު ދެއްވާފައެވެ.

"އެންމެ ފުރަތަމަ ބޯތަށް ޗިސްޗިސް ކޮށްލާނީ އެ ޣައްދާރުންގެ" މަރުގެ އަދަބު ތަންފީޒު ކުރަންޖެހޭ އެއްވެސް ގާނޫނެއް ފާސްކޮށްފިނަމަ ތަސްދީގު ކުރައްވާނެކަމުގެ ޔަގީންކަން ދެއްވަމުން އޮރްދޮޣާން ވިދާޅުވިއެވެ.

"މިއީ މިއީ ގާނޫނުގެ ބާރު ހިނގާ ދައުލަތެއް. ގާނޫނު ހަދާ މަޖިލީހުން ފާސްވެ އަޅުގަނޑާ ހަމައަށް އަތުވެއްޖެނަމަ އަޅަނގަނޑު އޭގައި ސޮއިކުރާނަން"އޮރްދޮޣާން ވިދާޅުވިއެވެ.

ރައީސް އޮރްދޮޣާން ވަނީ ހަތިޔާރާއެކު ބަޣާވާތް ރޭވި ފަރާތްތަކާ ކުރިމަތިލީ ރައްޔިތުންނަށް ތައުރީފް ކުރައްވާފައެވެ.

މިދިޔަ 2016 ވަނަ އަހަރުގެ ޖުލައި މަހުގެ 15 ވަނަ ދުވަހު ތުރުކީއަށް ގެންނަން އުޅުނު ބަޣާވާތަށްފަހު ޖުލައި މަހުގެ 20 ވަނަ ދުވަހު އިއުލާނުކުރި ކުއްލި ނުރައްކަލުގެ ހާލަތު ހަތަރު ފަހަރެއްގެ މަތިން ވަނީ އިތުރުކޮށްފައެވެ.

ތުރުކީއިން ގަބޫލުކުރާ ގޮތުގައި ބަޣާވަތުގެ މުގުލުގައި ހުންނެވީ އެމެރިކާއަށް އަރުވާލެއްވިގެން އުޅުއްވާ ތުރުކީގެ ދީނީ އިލްމުވެރިޔާ ފަތުހުﷲ ގޫލެން އެވެ.

ތުރުކީގެ ޤާނޫނު އަސާސީ ބުނާގޮތުން އެ ގައުމުގައި ކުއްލި ނުރައްކަލުގެ ހާލަތު ގިނަވެގެން ހަ މަސްދުވަހުގެ މުއްދަތަކަށް އިއުލާނުކުރެވިދާނެއެވެ.