ނަސްލީ ތަފާތު ކުރުމާ ދެކޮޅަށް ކުރާ މަސައްކަތަށް އެހީވުމަށް 100 މިލިއަން ޑޮލަރު ޚަރަދުކުރަން ބާސްކެޓްބޯޅަ ލެޖެންޑް މައިކަލް ޖޯޑަން ނިންމައިފި އެވެ.

އެމެރިކާގެ ކަޅު ނަސްލުގެ ރައްޔިތެއް ކަމަށްވާ ޖޯޖް ފްލޮއިޑް ހައްޔަރު ކުރަން އުޅުމުގެ ތެރޭގައި ދޮން ނަސްލުގެ ފުލުހަކު ވަނީ ފްލޮއިޑްގެ ކަރަށް ކަކުލުން އަރައި މަރާލާފަ އެވެ. އެއާއެކު ގިނަ ކުޅިވަރު ތަރިން އަންނަނީ ނަސްލީ ތަފާތު ކުރުމާ ދެކޮޅަށް އަޑު އުފުލަމުންނެވެ.

ހުކުރު ދުވަހުގެރޭ ޖޯޑަން ނެރުނު ބަޔާނެއްގައި ބުނެފައިވަނީ ނަސްލީ ތަފާތުކުރުމާ ދެކޮޅަށް އެކި އޯގަނައިޒޭޝަންތަކުން ހިންގާ މަޝްރޫއުތަކަށް 100 މިލިއަން ޑޮލަރު ޚަރަދުކުރާނެ ކަމަށާއި، މި ފައިސާ ޚަރަދުކުރާނީ ކުރިއަށް އޮތް 10 އަހަރަށް ބަހާލައިގެން ކަމަށެވެ. އަދި ނަސްލީ ތަފާތުކުރުން ހުއްޓުވުމަށް ކުރަމުންދާ މަސައްކަތުގައި އެހީތެރުވެދޭން ބޭނުންވިއިރު، މި ކުރާ ހޭދައިން ގިނަ ބަޔަކަށް އިންސާފު ލިބޭނެ ކަމުގެ އުއްމީދު އެބައޮތް ކަމަށް ވެސް ޖޯޑަން ވަނީ ބުނެފައެވެ.

ނަސްލީ ތަފާތުކުރުން ހުއްޓުވުމަށް ކުރާ މަސައްކަތްތަކަށް 100 މިލިއަން ޑޮލަރު ޚަރަދު ކުރަން ޖޯޑަން ނިންމިއިރު، ރިޕޯޓުތައް ބުނާ ގޮތުގައި އުމުރުން 57 އަހަރުގެ ޖޯޑަންގެ މިލްކިއްޔާތުގައި 2.1 ބިލިއަން ޑޮލަރު އެބަހުއްޓެވެ.

ފްލޮއިޑްގެ މަރާ ގުޅިގެން އެކި ކުޅިވަރު ތަރިން އަޑު އުފުލަމުން އަންނައިރު، މީގެ ކުރިން ދުނިޔޭގެ ފުޓްބޯޅައާ ބެހޭ މައި އިދާރާ، ފީފާ އާއި އިންޓަނޭޝަނަލް އޮލިމްޕިކް ކޮމިޓީ (އައިއޯސީ) ން ވެސް ވަނީ ނަސްލީ ތަފާތުކުރުން ހުއްޓުމަށް ޝުއޫރު ފާޅުކުރި ކުޅިވަރު ކުޅުންތެރިންނަށް ތައުރީފު ކޮށްފައެވެ.

މީގެ ކުރިން ފްލޮއިޑްގެ ޖަނާޒާގެ ޚަރަދުތައް ބެލުމަށް މަޝްހޫރު ބޮކްސިން ތެޅުންތެރިޔާ ފްލޮއިޑް މޭވެދާ ނިންމިއިރު، ނަސްލީ ތަފާތުކުރުމާ ދެކޮޅަށް މަޝްހޫރު ފުޓްބޯޅަ ތަރިންގެ އިތުރުން ޓެނިސް ކުޅުންތެރިން ވެސް ވަނީ އަޑުއުފުލާފައެވެ.