ދައުލަތުގެ ބައެއް މުއައްސަސާތަކުން ދޭންޖެހޭ މައުލޫމާތު ދޫނުކުރާކަން ފާހަގަކުރެވޭ ކަމަށާއި، އިތުރަށް ލަސްނުކޮށް އެމައުލޫމާތު ފުރިހަމައަށް ދޫކުރުމަށް އިންފޮމޭޝަން ކޮމިޝަނަރުގެ އޮފީސް (އައިކޮމް) އިން އިލްތިމާސް ކޮށްފިއެވެ.

އައިކޮމްއިން ބުނީ މޭ މަހުގެ 31 ވަނަ ދުވަހުން ފެށިގެން ޖޫން 11 ވަނަ ދުވަހުގެ ނިޔަލަށް ކޮންމެހެން ކުރަންޖެހޭ މަސައްކަތްތައް ކުރުމަށް ސަރުކާރުގެ އިދާރާތައް ހުޅުވުމަށާއި އިދާރާތަކުން ކުރާނެ މަސައްކަތްތައް، ވަޒީރު ނުވަތަ އެ އިދާރާއެއްގެ އެންމެ އިސްވެރިޔަކު ކަނޑައަޅާ ގޮތަކަށް ކުރިއަށް ގެންދިއުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ނިންމަވާފައިވާތީ، ކޮންމެހެން ކުރަންޖެހޭ މަސައްކަތުގެ ތެރޭގައި ގާނޫނުގެ އަސާސީގެ 29 ވަނަ މާއްދާއިން ރައްޔިތުންނަށް ކަށަވަރުކޮށް ދީފައިވާ މައުލޫމާތު ހޯދައި ލިބިގަތުމުގެ ހައްގާ ގުޅުން ހުރި މަސައްކަތްތައް ހިމެނުމަކީ މުހިންމު ކަމެއް ކަމަށެވެ.

އައިކޮމްއިން ބުނީ މިހާރު ކުރިމަތިވެފައިވާ ސިއްހީ ކުއްލި ހާލަތެއްގައި ގޮންޖެހުންތައް ހުންނާނެ ކަމަށެވެ. ނަމަވެސް، ހެޔޮ ހިންގުމުގެ ނިޒާމެއްގެ އަދި ނަޒާހަތްތެރި ދައުލަތެއްގެ އެންމެ މުހިންމު ސިފައަކީ ހާމަކަން ބޮޑުވުމާއި، މައުލޫމާތު ދިނުމާއި އިދާރާތަކުގައި ހުރި މައުލޫމާތަށް ރައްޔިތުނަށް ވާސިލުވުން ކަމަށެވެ. އެހެން ނޫން ނަމަ، ނިންމާ ނިންމުންތަކާއި ކުރާ ޚަރަދާ މެދު ރައްޔިތުންގެ އިތުބާރެއް ނޯންނާނެ ކަމަށް އައިކޮމްއިން ބުނެއެވެ.

ހިޔާނާތާއި ފަސާދައިގެން ދޮރުތައް ބަންދެއް ނުވާނެކަން ފާހަގަކުރައްވައި އައިކޮމްއިން ބުނީ ހާއްސަކޮށް މިފަދަ ކުއްލި ހާލަތެއްގައި ދައުލަތުގެ އިދާރާތަކާއި ވެރިންނަށް ލިބޭނެ އެންމެ ބޮޑު ރައުސުލްމާލަކަށް ވާނީ ރައްޔިތުންގެ އިތުބާރު ކަމަށެވެ. އައިކޮމްއިން ބުނީ އެކަން ހާސިލު ވާނީ ހާމަކަން ބޮޑުވެ، އަދި ރައްޔިތުންނަށް، ރައްޔިތުންނަށް ރައްޔިތުންގެ މައުލޫމާތަށް ވާސިލުވެވިގެން ކަމަށެވެ. އެއީ މައުލޫމާތު ހޯދަށް ހުށަހަޅާ މައްސަލަތަކަށް ވީހާ އަވަހަށް އިޖާބަ ދިނުން ކަމަށް އައިކޮމްއިން ވަނީ ފާހަގަކޮށްފައެވެ.

އައިކޮމްއިން ބުނީ ހުރިހާ މުއައްސަސާތަކަކުން ވެސް މި މަގަށް ކަންކަން ކޮށްދިނުމަށް ޚާއްސަ ސަމާލުކަމެއް ދިނުމަށް އެދޭ ކަމަށާއި، މައުލޫމާތު ހޯދުމަށް ހުށަހަޅާފައި ހުރި ބައެއް މައްސަލަތަކާއި، މައުލޫމާތު ދޫކުރުމަށް ނިންމަވާފައިވާ ބައެއް މައްސަލަތަކުގެ މައުލޫމާތު ބައެއް ދޫނުކުރާކަން ފާހަގަކުރެވޭތީ، އިތުރަށް ލަސްނުކޮށް އެ މައުލޫމާތު ފުރިހަމައަށް ދޫކުރެއްވުމަށް ވަނީ އިލްތިމާސް ކޮށްފައެވެ.