ސްކޫލުތަކަށް ބޭނުންވާ އަތްދޮންނަ ސައިބޯނި ފުޅި ހޯދަން އިއުލާންކޮށްފި

ނިއު ނޯމަލް ގައި ސްކޫލުތައް ހުޅުވާލާއިރު، ޔުނިސެފްގެ އެހީގައި އެޑިއުކޭޝަން މިނިސްޓްރީން ކުރިއަށްގެންދާ "ސްކޫލް ވޮޝް ޕްރޮގްރާމް" ގެ ދަށުން ކްލާސް ރޫމްތަކަށް 12،500 (ބާރަ ހާސް ފަސް ސަތޭކަ) އަތް ދޮންނަ ސައިބޯނި ފުޅި ހޯދުމަށް އެޑިއުކޭޝަން މިނިސްޓްރީން އިއުލާން ކޮށްފި އެވެ.

އެ މިނިސްޓްރީން ކޮށްފައިވާ އިއުލާނެއްގައި ބުނީ، ޕްރޮޖެކްޓަށް ބީލަން ހުށަހެޅޭނީ އިކޮނޮމިކް މިނިސްޓްރީން ކުދި އަދި މެދު ފަންތީގެ ވިޔަފާރީގެ ގިންތިއަކުން ގިންތި އެއްގައި ރަޖިސްޓްރީ ކުރެވިފައިވާ ދިވެހި ވިޔަފާރިތަކަށް ކަމަށެވެ.

ޕްރޮޖެކްޓްގައި ބައިވެރިވާން އެދޭ ފަރާތްތަކުން، މި މަހުގެ ތިން ވަނަ ދުވަހުން ހައެއްގެ ނިޔަލަށް އީ މެއިލް މެދުވެރިކޮށް ރަޖިސްޓްރީ ކުރުމަށް އެޑިއުކޭޝަން މިނިސްޓްރީން އެދެއެވެ. ބީލަން ހުށަހެޅޭނީ އެ މުއްދަތުގައި ރަޖިސްޓްރީ ކުރާ ފަރާތްތަކަށް އެކަނި އެވެ.

މެއިލް އެޑްރެސް އަކީprocurement@moe.gov.mvއެވެ. ޕްރޮޖެކްޓާއި ބެހޭ ގޮތުން ސުވާލެއް އޮތްނަމަ ޖޫން މަހުގެ ހަތް ވަނަ ދުވަހުގެ ކުރިން މިނިސްޓްރީގެ އީމެއިލް އެޑްރެސް އަށް ފޮނުވަން ޖެހެ އެވެ. އަދި ހުށަހަޅާ ބީލަން ޖޫން މަހުގެ ނުވައެއްގެ ކުރިން ހުށައަޅަން ޖެހޭނެ ކަމަށް މިނިސްޓްރީން ކޮށްފައިވާއިއުލާނުގައިބުންޏެވެ.

ކޮވިޑް-19 އާ ގުޅިގެން ރައްކާތެރި ކަމުގެ ފިޔަވަޅެއްގެ ގޮތުން ސްކޫލުތައް ބަންދުކޮށްފައި އޮންނަތާ މަހަކަށްވުރެ ގިނަ ދުވަސްވެއްޖެ އެވެ. ސްކޫލުތައް ބަންދުކޮށްފައި އޮތް އޮތުމަށް ނިމުމެއް ގެނެސް އެންމެ އަވަހަށް ވެސް ސްކޫލްތައް ހުޅުވާލާނީ ޖޫން މަހުގެ 14 ގައި ކަމަށް ސަރުކާރުން ވަނީ ބުނެފަ އެވެ.

ރައްކާތެރިކަން ކަށަވަރު ކުރުމަށްފަހު ނޫނީ ކިޔަވައި ދިނުމަށް ސްކޫލުތައް ނުހުޅުވާނެ ކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ ވަނީ ވިދާޅުވެފައެވެ. ކޮވިޑާއި ގުޅިގެން މި އަހަރު ބޭއްވުމަށް ހަމަޖެހިފައިވާ އޯ ލެވެލް އިމްތިހާނުވެސް ވަނީ އަންނަ އަހަރަށް ފަސްކޮށްފަ އެވެ.