ޑައިވިނަށްދިޔަ ޓޫރިސްޓުގެ ޖެކެޓާއި ޑައިވިންގ ފުޅި ފެނިއެއްޖެ، އެކަމަކު އެމީހާ އަދި ނުފެނޭ!
ޖެކެޓާއި ޑައިވިންގ ފުޅި ފެނިފައިވަނީ ފުވައްމުލަކާ 50 މޭލު ބޭރުން
ޑައިވިނަށްފިޔަ ފަތުރުވެރިޔާ ބޭނުންކުރިކަމަށް ބެލެވޭ ޖެކެޓާއި ޑައިވިންގ ފުޅި
ފުވައްމުލަކު ޑައިވިން ޕޮއިންޓަށް ޑައިވްކުރި ފަތުރުވެރިއެއްގެ ޚަބަރެއް ނުވެގެން ހޯދަމުން ދަނިކޮށް އެމީހާ ބޭނުން ކުރިމަށް ބެލެވޭ ޖެކެޓާއި ޑައިވިންގ ފުޅިއެއް ފެނިއްޖެ އެވެ.
އެމްއެންޑީއެފްގެ މީޑިއާ އޮފިޝަލް ކެޕްޓަން އިބްރާހީމް އާޒިމް ބުދަ ދުވަހު ވިދާޅުވީ ޑައިވިނަށްދިޔަ ފަތުރުވެރިޔާ، ގެއްލިގެން ހޯދަމުންދާ ސަރަހައްދާ ކައިރިން ޑައިވިންގ ޖެކެޓަކާއި ޑައިވިންގ ފުޅިއެއް އޮޔާދަނިކޮށް ފެނިފައިވާ ކަމަށެވެ.
އާޒިމް ވިދާޅުވީ އެ ތަކެތި ފެނިފައިވަނީ، ފުވައްމުލަކު "ދަނޑިމަގު ފަންނު"އާ ގާތްގަނޑަކަށް 50 މޭލު ބޭރުން އެސަރަހައްދުން ދަތުރު ކުރަމުންދިޔަ "އުފާ" ނަމަކަށް ކިޔާ މަސްދޯންޏަކަށް ކަމަށެވެ. އަދި އެ ދޯންޏަށް އެތަކެތި ފެނިފައިވަނީ ބުދަ ދުވަހުގެ ހެނދުނު 7:50 ހާއިރުކަމަށާއި އެތަކެތި ފެނުނު ދޯނިން އެތަކެތި ފުލުހުންނާ ހަވާލުކޮށްފައިވާކަމަށް ފުލުހުންނާ ހަވާލާދީ އެމްއެންޑީއެފުން ބުނެއެވެ.
އާޒިމް ވިދާޅުވީ އެތަކެތި ފެނިފައިވީ ނަމަވެސް ޑައިވިނަށްދިޔަ މީހާ އަދިވެސް ނުފެންނަ ކަމަށެވެ.
ހޯދަމުންދާއިރު އަދި ވެސް އެމީހާ ނުފެންނަ ކަމަށް އެމްއެންޑީއެފުން ބުނެފި އެވެ.
ޑައިވިނަށްދިޔަ ފަތުރުވެރިޔަކު ގެއްލިގެން އެމްއެންޑީއެފްގެ ސަދަން އޭރިއާއަށް އެ ހާދިސާ ރިޕޯޓް ކޮށްފައިވަނީ އާދިއްތަ ދުވަހު އިރުއޮއްސި 6:00 ޖަހާއެހާކަން ހާއިރު ކަމަށް އެމްއެންޑީއެފުން ބުނެއެވެ.
ގެއްލުނު ޓޫރިސްޓް ހޯދުމުގެ މަސައްތުގައި އެމްއެންޑީއެފްގެ ކޯސްޓްގާޑްގެ ސަދަން އޭރިއާގެ ޑައިވަރުން ހަރަކާތްތެރިވަމުން ދާ ކަމަށް އޮފިޝަލް ވިދާޅުވިއެވެ. ގެއްލުނު މީހަކީ އުމުރުން 45 އަހަރުގެ ފިރިހެނެއް ކަމަށާއި އޭނާ ޑައިވްއަށް ދިޔައީ (ޕްރިންސް އޯލްޑްރޭ) ނަމަކަށް ކިޔާ ސަފާރީއެއްގައި ކަމަށް އޮފިޝަލް ވިދާޅުވެފައި ވެއެވެ.
