ދެ މައްސަލައެއްގައި އިއްވާފައިވާ ދެ ޖަލުޙުކުމެއް ތަންފީޒު ކުރައްވަމުން ގެންދަވާ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު އަޙުމަދު މަޚްލޫފަށް ބޭނުންވާ އިންޖެކްޝަނެއް ނުލިބި، އެކަމުގައި ކަރެކްޝަންސްގެ އިހުމާލު ވާކަމަށް ތުޙުމަތުކޮށް، އާއިލާއިން ކަންބޮޑުވުން ފާޅުކޮށްފިއެވެ.
ރާއްޖެއެމްވީއާ ވާހަކަ ދައްކަވަމުން، މަޚްލޫފްގެ އަނބިކަނބަލުން، ނަޒްރާ ނަސީމް ވިދާޅުވީ، މަޚްލޫފްގެ ފަރުވާއަށް ބޭނުންވާ ބާރުގަދަ އިންޖެކްޝަނެއް ޖެހޭނެ ކަމާމެދު ސުވާލު އުފެދިފައިވާ ކަމަށެވެ. އެގޮތުން ވަކި މުއްދަތްތަކަކުން ޖަހަން ޖެހޭ އެ އިންޖެކްޝަންގެ ދެން ޖަހަން ޖެހޭ ޑޯޒް އާއިލާއިން އަމިއްލައަށް ހޯދުމަށް ކަރެކްޝަނުން އަންގާފައިވާ ކަމަށެވެ.
(ކަރެކްޝަންސްއިން) ވިދާޅުވީ ކަރެކްޝަންސްގެ ޑޮކްޓަރޭ ނިންމާނީ، ރާއްޖެއިން ބޭރަށްތޯ ދާނީ، އެހެންނޫނީ، މިކޮޅުގަތޯ ޖަހާނީ. މިކޮޅުގަ ޖަހަންޏާ، މި މުއައްސަސާއިންނޭ އިންޖެކްޝަން ގެނެސްގެން އޭތި ޖަހާނީ. ދެން މިއަދު އަޅުގަނޑަށް ގުޅާފަ އެންގީ، މަތީފަރާތުން އެންގިއޭ، އާއިލާއިން އެ އިންޖެކްޝަން ގެނެސްގެން، ޖަހާށޭ ބުނެފިއޭ މިހާރު
ނަޒްރާ ވިދާޅުވީ ކަރެކްޝަނުން މިގޮތަށް އެންގި ނަމަވެސް، މަޚްލޫފަށް ބޭނުންވާ އިންޖެކްޝަނަކީ، ރައްޖެއިން ލިބޭ އެއްޗެއް ނޫން ކަމަށާއި، އެއީ ރާއްޖެއިން ބޭރުން ވެސް އާންމުންނަށް ވިއްކާ އެއްޗެއް ނޫން ކަމަށެވެ. އަދި އެއީ އަގުބޮޑު އިންޖެކްޝަނެއް ކަމަށާއި، އިންޖެކްޝަން ގަތުމަށް އާސަންދަ އާއި އެހެން އިންޝުއަރެންސް ޕެކޭޖްތަކުން ކަވަރު ނުކުރާ ބަޔަށްވާ ފައިސާ ދައްކަން ވެސް އާއިލާއިން ތައްޔާރަށް ތިބިކަން ނަޒްރާ ފާހަގަ ކުރެއްވިއެވެ.
އެއީ އާއިލާއިން އަމިއްލައަށް އެގޮތަށް ގެނެވޭނެ ކަހަލަ އިންޖެކްޝަނެއް ނޫން. އެއަށްވުރެ މާ ބާރުގަދަ އިންޖެކްޝަނެއް އެއީ. އެހެންވީމާ އަޅުގަނޑު އެދެނީ (އިންޖެކްޝަން ޖަހަން) ރާއްޖެއިން ބޭރަށްދާން ހުއްދަ، އެބޭފުޅުންނަށް ނުދެއްވުނު ކަމުގައި ވިޔަސް، މިކޮޅަށް އެ އިންޖެކްޝަން ގެނެސްގެން، އެބޭފުޅުން އެ ޖަހައިދިނުން.....އެބޭފުޅުން އެ އިންޖެކްޝަން ގެނެސް، ދީފި ކަމަށް ވަންޏާމު، އެއަށް ދޭންޖެހޭ ލާރިއާ، އެކަންކަން އަޅުގަނޑު ކުރާނަން
ނަޒްރާ ވިދާޅުވީ، މަޚްލޫފަކީ ކަރެކްޝަންގެ ބެލުމުގެ ދަށުގައި ހުރި ޤައިދީއަކަށް ވުމުން، އޭނާއަށް ކޮށްދޭންޖެހޭ މިފަދަ ކަންކަން ކުރަން ޖެހޭނީ ދަޢުލަތުން ކަމަށް އާއިލާއިން ޤަބޫލު ކުރާ ކަމަށާއި، އަދި އަމިއްލައަށް އެތެރެކުރާ ވެކްސިނާއި އިންޖެކްޝަން ޖަހައި ނުދޭނެ ކަމަށް ހޮސްޕިޓަލްތަކުން ބުނެފައި ވާތީ، އެ އިންޖެކްޝަން އާންމު ފަރާތްތަކަށް ވިއްކި ނަމަވެސް އާއިލާއިން އެ އިންޖެކްޝަން ރާއްޖެ އެތެރެކޮށްގެން ވާނެ ފައިދާއެއް ނެތްކަން ނަޒްރާ ފާހަގަ ކުރެއްވިއެވެ.
މަޚްލޫފަށް ބޭނުންވާ މުހިއްމު އިންޖެކްޝަން ލިބުމާ މެދު ސުވާލު އުފެދިފައިވާއިރު، މަޚްލޫފްގެ ޤާނޫނީ ވަކިލުންގެ ޓީމުގައި ހިމެނިވަޑައިގަންނަވާ އިމްތިޔާޒް ފަޙުމީ ވިދާޅުވީ، މަހްލޫފުގެ ޤާނޫނީ ވަކީލުން އޭނާއާ އެކަހެރި ބައްދަލުވުމަށް އެދިފައިވާތާ ދެ މަސްވެފައިވާ ކަމަށާއި، ކަރެކްޝަންގެ އިސްވެރިން ހުއްދަނުދީގެން އެ ޙައްޤު އަދިވެސް މަޚްލުފަށް ދީފައި ނުވާ ކަމަށެވެ.
މީގެ ދެ މަސްކުރިން މަޚްލޫފްގެ ވަކީލުން، އޭނާއާ އެކު އެކަހެރި ބައްދަލުވުމަށް އެދިފައިވަނީ، އެ ޓިމާއި، އިމްތިޔާޒް ފަޙުމީ އާއި ހިސާން ޙުސައިން އާއި ފައްޔާޒް އިސްމާއިލް ގުޅިވަޑައިގަތުމާ ގުޅިގެންނެވެ.
މި ކަންކަމާ ގުޅިގެން، ކަރެކްޝަންގެ ބަހެއް ހޯދުމަށް، ކަރެކްޝަންގެ މީޑިއާ އޮފިޝަލަށް ގުޅާލުމުން، ފޯނަށް ޖަވާބު ނުދެއްވާތީ، މިކަމާ ގުޅޭ ގޮތުން އެފަރާތުގެ ބަހެއް ވަނީ ލިބޭގޮތް ނުވެފައެވެ.
މަޚްލޫފްގެ މައްޗަށް ކޮށްފައިވާ އެއް ޖަލުޙުކުމް މިހާރު ތަންފީޒުކޮށް ނިމިފައިވާއިރު، އަންނަ ޖޫން މަހު ދެވަނަ ޙުކުމް ވެސް ތަންފީޒުކޮށް ނިމޭނެއެވެ. ޙުކުމް ތަންފީޒުކޮށް ނިމެން ކައިރިވެފައިވާއިރު ވެސް، އޭނާގެ މައްސަލަތަކުގެ އިސްތިޢުނާފު މައްސަލަ އަދިވެސް އޮތީ ހައިކޯޓުގައި މަޑުޖެހިފައެވެ.
