ގާސިމް، އަބްދުﷲ ރިޔާޒު އަދި ތޮއްޔިބުގެ މައްޗަށް ވަރަށް އަވަހަށް ދައުވާ ކުރަން ކޯޓަށް ފޮނުވަނީ!

ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހީމާއި ކިނބިދޫ ދާއިރާގެ މެމްބަރު އަދި ޖުމްހޫރީ ޕާޓީގެ ނައިބު ލީޑަރު އަބްދުﷲ ރިޔާޒުގެ އިތުރުން ސޯޝަލް މީޑީއާ އެކްޓިވިސްޓް ތޮއްޔިބު ޝަހީމްގެ މައްޗަށް ދައުވާ ކުރުމަށް ވަރަށް އަވަހަކަށް ކޯޓަށް ފޮނުވާނެ ކަމުގެ މައުލޫމާތު ލިބިއްޖެ އެވެ.

އިތުބާރުހުރި ފަރާތަކުން ރައްޖެއެމްވީއަށް މައުލޫމާތު ދެމުން ބުނީ ރާއްޖޭގެ މަޝްހޫރު ވިޔަފާރިވެރިޔާ ގާސިމް އިބްރާހީމް އާއި ކުރީގެ ކޮމިޝަނަރ އޮފް ޕޮލިސް އަބްދުﷲ ރިޔާޒުގެ އިތުރުން ތޮއްޔިބު ޝަހީމްގެ މައްޗަށް ދައުވާކުރުމަށް ސަރުކާރުން ވަރަށް އަވަހަށް ބޭނުން ވާތީ އެކަން އެގޮތަށް ކުރުމަށް ޕްރޮސެކިއުޓަރ ޖެނެރަލް (ޕީޖީ) އެކަމަށް މަސައްކަތް ކުރައްވަމުން ގެންދަވާ ކަމަށެވެ.

އެގޮތުން ގާސިމްގެ މައްޗަށް ތުހުމަތު ކޮށްފައިވާ ރިޝްވަތުގެ މައްސަލަ މިހާރު ވަނީ ފުލުހުން ތަހުގީގު ކުރުމަށް ފަހު ޕީޖީގެ އޮފީހަށް ދައުވާ ކުރުމަށް ފޮނުވާފަ އެވެ. އެމައްސަލަ ދިރާސާ ކުރަމުންދާ ކަމަށް ޕީޖީ އޮފީހުން ބުރާސްފަތި ދުވަހުގެ ހެނދުނު މައުލޫމާތުދީފައިވާ އިރު، އެމައްސަލާގައި ގާސިމްގެ މައްޗަށް ދައުވާކުރުމަށް ބުރާސްފަތި ދުވަހު ކޯޓަށް ފޮނުވާނެ ކަމަށް މައުލޫމާތު ލިބިފައި ވެއެވެ.

މީގެ އިތުރުން އަބްދުﷲ ރިޔާޒުގެ މައްސަލަ ފުލުހުން ތަހުގީގު ނިންމާ ބުރާސްފަތި ދުވަހު ޕީޖީ އޮފީހަށް ހުށަހަޅާނެ ކަމަށާއި ތޮއްޔިބުގެ މައްސަލަ ވެސް ޕީޖީ އޮފީހަށް ހުށަހަޅާނެ ކަމަށް ރާއްޖެއެމްވީ އަށް މައުލޫމާތު ދިން ފަރާތުން ބުނެފައި ވެއެވެ.

ރާއްޖެ އެމްވީއާ ވާހަކަ ދެއްކި ޕީޖީގެ ވަކީލަކު ވިދާޅުވީ ސަރުކާރުން ބޭނުންވާ ގޮތަށް މިފަދަ މައްސަލަތަކުގައި ޕީޖީ އަމަލު ކުރަމުންދާތީ ޕީޖީ އޮފީހުގެ ގިނަ ގާނޫނީ ވަކީލުގެ މެދުގައި ވެސް ކަންބޮޑުވުންތައް އެބަހުރި ކަމަށެވެ.

ގާސިމާއި ރިޔާޒު އަދި ތޮއްޔިބުގެ މައްސަލައާ ގުޅިގެން ޕީޖީ އޮފީހުގެ މީޑިއާ އޮފިޝަލް ވިދާޅުވީ ގާސިމްގެ މައްސަލަ ދިރާސާކުރަމުންދާ ކަމަށާއި ރިޔާޒާއި ތޮއްޔިބުގެ މައްސަލަ ދައުވަކުރުމަށް ޕީޖީ އޮފީހަށް ހުށަހަޅާފައިވާކަން އެނގިފައިނުވާ ކަމަށެވެ. އަދި ޕީޖީ އޮފީހަށް އެ ދެ މައްސަލަ ރަސްމީކޮށް "އެންޓަރ" ވެފައި ނުވާކަން އޮފިޝަލް ވަނީ ޔަގީންކޮށްދެއްވާފަ އެވެ.