ކިނބުދޫ ދާއިރާގައި ހުރި މައްސަލަތައް ރިޔާޒު ޓްވިޓާއަށް އޮއްސާލައިފި

ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު އަބްދުﷲ ރިޔާޒު އޭނާ ނިސްބަތްވާ ކިނބުދޫ ދާއިރާގެ ރަށްރަށަށް ވަޑައިގެން އެ ރަށްރަށުގައި ހުރި މައްސަލަތައް ސަރުކާރުގެ ސަމާލުކަމަށް ގެނައުމުގެ ގޮތުން ޓްވީޓާއަށް އޮއްސާލައިފި އެވެ.

ޖުމްހޫރީ ޕާޓީގެ ޕާލަމެންޓްރީ ގްރޫޕްގެ މެމްބަރު އަބްދުﷲ ރިޔާޒު ކުރައްވާފައިވާ ޓްވީޓަކުގެ ތެރޭގައި، ތ. ކަނޑޫދޫ ރިވެޓްމަންޓް ޕްރޮޖެކްޓް ވަނީ ހުއްޓިފައި ކަމަށާއި އެ ޕްރޮޖެކްޓްގެ ދަށުން ފޭކް ޖިއޮބޭގްސް ބޭނުންކޮށްގެން ސަރުކާރުން ހިންގާފައިވަނީ ޖަރީމާއެއް ކަމަށް ބެލެވޭ ކަމަށް ބުނެފައިވެ އެވެ.

މީގެ އިތުރުން ކިނބިދޫ ރަށްގިރުމަކީ ރައްޔިތުންގެ ކަންބޮޑުވުމެއް ކަމަށާއި އެކަން ހައްލުކޮށްދިނުމަށް އެންވަޔަރަމަންޓް އެންޑް އެނާޖީ މިނިސްޓަރު ތޯރިގް އިބްރާހީމަށް ރިޔާޒު ވަނީ ގޮވާލައްވާފަ އެވެ. ކިނބިދޫގެ ނަރުދަމާ ގާއިމު ކޮށްދިނުމަށް ވެސް އެދިފައި ވެއެވެ.

ހިރިލަންދޫ ފެން ތަގައްޔަރު ވެފައިވާ ކަމަށާއި ސާފު ބޯފެނާއި ނަރުދަމާ ގާއިމު ކޮށްދެވޭ ކޮންއިރަކުންތޯ ރިޔާޒު ކުރެއްވި ޓްވީޓް މިނިސްޓަރު ތޯރިގް ޓެގްކޮށް ރިޔާޒު ވަނީ ސުވާލު ކުރައްވާފަ އެވެ.

ރިޔާޒު ކުރައްވާފައިވާ އެހެން ޓްވީޓެއްގައި ވަނީ އޮމަދޫ ބަނދަރު ހެދުމަކީ މި ސަރުކާރުގެ ވައުދެއް ކަމަށާއި އެ ވައުދު ފުއްދުމަށް ހައުންސިންގ މިނިސްޓަރ ޑރ. މުހައްމަދު މުއިއްޒަށް ވަނީ ގޮވާލައްވާފަ އެވެ.

ތ. އަތޮޅުގައި ބޭނުންކުރާ ފެރީގެ ހިދްމަތް ވަނީ ހުއްޓިފަ ކަމަށާއި އެކަށީގެންވާ ފެރީގެ ހިދްމަތް ބޭނުންވާ ކަމަށް ވިދާޅުވެ ރިޔާޒު ކުރެއްވި ޓްވީޓް ޓެގްކޮށްފައި ވަނީ އިކޮނޮމިކް މިނިސްޓަރު މުހައްމަދު ސައީދު އަށާއި އެމްޓީސީސީ އަށެވެ.

މީގެ އިތުރުންވެސް ރިޔާޒު ނިސްބަތްވާ ކިނބިދޫ ދާއިރާގެ ހުރިހާ ރަށަކަށް ވަޑައިގެން އެ ހުރިހާ ރަށަކަށް ބޭނުންވާ ކަންތައްތައް ރިޔާޒު ވަނީ ވަކިވަކިން ޓްވީޓް މެދުވެކޮށް ސަރުކާރުގެ ކަމާބެހޭ މިނިސްޓަރުންނާއި އިދާރާތަކުގެ ސަމާލުކަމަށް ގެންނަވާފަ އެވެ.