ސައުދީ އަރަބިއްޔާގައި އިއުލާން ކޮށްފައިވާ ފުރަބަންދުގެ ހާލަތު ލުއިކުރަން ނިންމައިފި
25 މެއި 2020 | ހޯމަ 21:00ފުރަބަންދަށް ލުއި ދޭނީ އެކި ފިޔަވަހިތަކަށް ބަހާލައިގެން
ސައުދީ އަރަބިއްޔާގެ ރެސްޓޯރެންޓަކުން މީހަކު ހިދުމަތް ހޯދަނީ
ބުރާސްފަތި ދުވަހުން ފެށިގެން ސައުދީ އަރަބިއްޔާގައި އިއުލާންކޮށްފައިވާ ފުރަބަންދުގެ ހާލަތު ލުއިކުރަން ނިންމައިފިއެވެ.
ސައުދީގެ ހެލްތް މިނިސްޓަރ ތައުފީގް އަލް ރާބިއާ ވިދާޅުވެފައިވަނީ ފުރަބަންދަށް ލުއި ދޭނީ އެކި ފިޔަވަހިތަކަށް ބަހާލައިގެން ކަމަށެވެ. އަދި ވައިރަސް ފެތުރެމުންދާ މިންވަރަށް ބެލުމަށް ފަހުގައި ކަމަށެވެ.
އެގޮތުން ފުރަތަމަ ފިޔަވަހީގައި މަސައްކަތް ކުރާނީ ނާޒުކު ހާލަތްތަކުގައި ތިބޭ ކޮވިޑް-19 ބަލިމީހުންނަށް ފަރުވާދިނުމުގެ ނިޒާމް ވަރުގަދަ ކުރުމަށެވެ. ދެވަނަ ފިޔަވަހީގައި މަސައްކަތް ކުރާނީ ކޮވިޑް-19 ކުރިޔާލާ ދެނެގަތުމަށާއި އަދި ކޮވިޑް-19 އަށް ޓެސްޓް ކުރުމަށް ކަމަށް އޭނާ ވިދާޅުވި އެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ހެލްތް މިނިސްޓަރ ވިދާޅުވީ ސައުދީގައި އެންމެ ބޮޑު އިސްކަމެއް ދެނީ އިޖްތިމާއީ ގައިދުރުކަން ދެމެހެއްޓުމަށެވެ.
ސައުދީގައި ކޮވިޑް-19 ފެތުރެން ފަށާފައިވާތާ ފަސް މަސް ވެފައިވާއިރު ސައުދީގެ ގިނަ ރައްޔިތުން ވަނީ ކޮވިޑް-19 އަށާއި އިޖްތިމާއީ ގައިދުރުކަމަށް ހޭލުންތެރިވެފައެވެ.
ހެލްތް މިނިސްޓަރ ކޮވިޑް-19 ސިފަ ކުރެއްވީ އައު ތަޖުރިބާއެއް ގޮތުގަ އެވެ.
ސައުދީން މިހާތަނަށް 74,795 މީހަކު ވަނީ ކޮވިޑް-19 އަށް ޕޮޒިޓިވްވެފައެވެ. މި ވައިރަސްގެ ސަބަބުން 399 މީހަކު މިހާތަނަށް މަރުވެފައި ވާއިރު 45,668 މީހަކު ވަނީ ވައިރަހުން ސަލާމަތްވެފައެވެ.
