މަޖިލީހުގެ ޖަލްސާތައް ފަށަން އެންއީއޯސީއާ މަޝްވަރާކޮށްފައެއް ނުވޭ: މަބްރޫކް

ރައްޔިތުންގެ މަޖިލީހުގެ ޖަލްސާތައް ފަށަން ނިންމިއިރު، އެންއީއޯސީއާ އެއްވެސް ވަރަކަށް މަޝްވަރާކޮށްފައި ނުވާކަމަށް އެ ސެންޓަރުގެ ތަރުޖަމާނު މަބްރޫކް އަޒީޒް ވިދާޅުވެއްޖެ އެވެ.

ރައްޔިތުންގެ މަޖިލީހުގެ އިދާރާއިން ވަނީ، މި އަހަރުގެ ފުރަތަމަ ދައުރުގެ 40 ވަނަ ޖަލްސާ އަންގާރަ ދުވަހު އެ މަޖިލީހުގެ ޖަލްސާކުރާ މާލަމުގައި އޮންނާނެކަން އިއުލާންކޮށްފަ އެވެ. އަދި މި ހާލަތުގައި އަމަލުކުރާނެ ގޮތުގެ އެސްއޯޕީ އެއް ވެސް އެ އިދާރާއިން ވަނީ އާންމުކޮށްފަ އެވެ.

Advertisement

ހޯމަ ދުވަހުގެ އެންއީއޯސީގެ ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެމުން މަބްރޫކް ވިދާޅުވީ، އެންއީއޯސީއާ އެއްވެސް ވާހަކައެއް ދެކެވިފައި ނުވާ ކަމަށެވެ. ނަމަވެސް، މިކަން މަޖިލީހުން ކުރައްވާނީ ކަނޑައަޅާފައިވާ ގަވައިދުގެ ތެރެއިން ކަމަށް ބެލެވޭ ކަމަށް މަބްރޫކް ވިދާޅުވި އެވެ.

މަބްރޫކް ވިދާޅުވީ، ރައްޔިތުންގެ މަޖިލީހުގެ ޖަލްސާތައް ފެށުމާއި ގުޅޭގޮތުން އެއްވެސް މުއާމަލާތެއް ކުރެވިފައިވޭތޯ ބެލުމުން، އެ އިދާރާއިން އެންމެ ފަހުން ފޯނުން ގުޅާ އޮޅުންފިލުވާފައިވަނީ، ލޮކްޑައުން އުވާލަން ނިންމާފައިވާ ތާރީހާއި ގުޅޭގޮތުން ކަމަށެވެ. ޖަލްސާތައް ބޭއްވުމުގެ މަޝްވަރާއަކަށް މިހާތަނަށް އެދިވަޑައިގެންފައި ނުވާކަމަށް ވިދާޅުވި އެވެ.

ރައްޔިތުންގެ މަޖިލީހުގެ ޖަލްސާއެއް ބާއްވަން ނިންމެވި ސަބަބު ސާފުކޮށްދެއްވަމުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ، ގާނޫނޫ އަސާސީ އިސްލާހު ކުރުމަށް މަޖިލީހުގެ ތަޅުމުގައި ޖަލްސާއެއް ނުބާއްވައި މަޑުކުރެވެން ނެތް ކަމަށެވެ. އަދި އެކަން ޑިރެކްޓަރ ޖެނެރަލް އޮފް ޕަބްލިކް ހެލްތް، މައިމޫނާ އަބޫބަކުރު، އަށް އަންގާފައިވާނެ ކަމަށް ވިދާޅުވި އެވެ.

މަޖިލީހުން އާންމުކޮށްފައިވާ އުސޫލަށް ބަލާއިރު، އެއްފަހަރާ ތަޅުމުގައި ތިބޭނީ 42 މެމްބަރުންނެވެ. އެއީ ގާތްގަނޑަކަށް މަޖިލީހުގެ ދެބައިކުޅަ އެއްބައި މެމްބަރުންނެވެ. އަދި ހުރިހާ މެމްބަރުންވެސް ޖަލްސާކުރާ މާލަމުގައި ތިއްބަވާއިރު، ފޭސް މާސްކު އެޅުމަށް ވަނީ އަންގާފަ އެވެ.

ރައްޔިތުންގެ މަޖިލީހުގެ ބައެއް މެމްބަރުން ވަނީ އެޗްޕީއޭ ގެ ހުއްދައެއް ނެތި ޖަލްސާތައް އަލުން ނުފެށޭން ކަމަށް ވިދާޅުވެފަ އ ެވެ. އަދި އެއީ ގާނޫނާ ހިލާފުކަމެއް ކަމަށް ވެސް ވިދާޅުވި އެވެ. އެގޮތުން ކުރީގެ ޑެޕިއުޓީ ޕްރޮސިކިއުޓަރ ޖެނެރަލް އަދި މިހާރުގެ ވިލިމާލޭ ދާއިރާގެ މެމްބަރު އުޝާމް ވިދާޅުވީ، މަޖިލީހަށް ހާޒިރުވެގެން ޖަލްސާ ބޭއްވޭނީ އެޗްޕީއޭގެ ހުއްދަ ލިބިގެން ކަމަށެވެ. ކެންދޫ ދާއިރާގެ މެމްބަރު އަދި މަޝްހޫރު ގާނޫނީ ވަކީލު އަލީ ހުސައިން ވިދާޅުވީ އެއީ ގާނޫނާ ހިލާފުކަމެއް ކަމުގަ އެވެ.

މި ދަނޑިވަޅުގައި މަޖިލީހުގެ ޖަލްސާތައް ބޭއްވުމަކީ ޤާނޫނާއި ހިލާފުކަމެއްތޯ ނޫސްވެރިޔަކު ސުވާލުކުރުމުން މަބްރޫކް ވިދާޅުވީ ޑިރެކްޓަރ ޖެނެރަލް އޮފް ޕަބްލިކް ހެލްތު ނެރުއްވާފައިވާ ލޮކްޑައުންގެ އަމުރުތަކުގައި އިސްތިސްނާ ހާލަތްތަކެއް ފާހަގަކޮށްފައިވާކަމަށެވެ. އަދި ކޮންމެހެން ކުރަންޖެހޭ މަސައްކަތަކަށް ނުކިމެވޭނެ ހާލަތްތައްވެސް ބަޔާންކޮށްފައިވާކަމަށް މަބްރޫކް ވިދާޅުވި އެވެ. ނަމަވެސް އެކަމުގައި ޤާނޫނީގޮތުން އޮތްގޮތް އެނގިވަޑައިނުގްނަވާކަމަށް މަބްރޫކް ވިދާޅުވި އެވެ.

އާންމު ސިއްހަތު ރައްކާތެރި ކުރުމުގެ ގާނޫނުގެ ދަށުން އިއުލާންކޮށްފައިވާ ލޮކްޑައުންގެ އުސޫލުން އިސްތިސްނާވާ ފަރާތްތަކުގެ ތެރޭގައި ރައްޔިތުންގެ މަޖިލީހުގެ މެމްބަރުން ނުހިމެނެ އެވެ. އިސްތިސްނާވާ ފަރާތްތަކުގެ ތެރޭގައި ހިމެނެނީ، ސަލާމަތީ ބާރުތަކާއި ސިއްހީ މަސައްކަތްތެރިންނާއި އެންއީއޯސީން ފާސްދޫކޮށްފައިވާ މީޑިއާތަކާއި އެހެނިހެން ފަރާތްތަކުގެ އިތުރުން ހުއްދަ ލިބިގެން މަގުތަކަށް ނިކުންނަ އާންމުންނެވެ.