ރައީސް ޔާމީންގެ އަރިހުން ޖާގަ ގެއްލި، ޕީޖީ ލީޑަރު ނިހާން ފަހަތު ސަފުގައި!

ޕީޕީއެމަށް މެމްބަރުންތަކެއް ގުޅުމަށް އަންގާރަ ދުވަހުގެ ރޭ ބޭއްވި ރަސްމިއްޔާތުގައި ޕީޖީ ލީޑަރު އަހުމަދު ނިހާން ހުސެއިން މަނިކު ދެ ވަނަ ގޮނޑި ބަރީގައި އިންނެވުމާއެކު ގިނަ ބައެއްގެ ފާޑުކިޔުންތައް އަމާޒުވެއްޖެ އެވެ.

ރައީސުލްޖުމްހޫރިއްޔާ ބައިވެރިވެވަޑައިގަންނަވާ ރަސްމިއްޔާތުތަކުގައި, މަޖިލީހުގެ މެޖޯރިޓީ ލީޑަރުކަން ކުރައްވާ އަހުމަދު ނިހާން ހުސެއިން މަނިކަށް އާންމު ގޮތެއްގައި ކުރީ ސަފުން ޖާގަ ލިބިގެންދެ އެވެ. އޭގެއިތުރުން ޕީޕީއެމްގެ ރަސްމިއްޔާތެއް ނަމަ، ރައީސްގެ އެންމެ އަރިހުގައި އިންނަވާ މެމްބަރުންގެ ތެރޭގައިވެސް މެމްބަރު ނިހާން ހިމެނިވަޑައިގަންނަވައެވެ. ނަމަވެސް އެންމެފަހުން ބޭއްވި ޕީޕީއެމްގެ ޖަލްސާގައި ފެނުނީ ތަފާތު މަންޒަރެކެވެ.

ޕީޕީއެމަށް މެމްބަރުންތަކެއް ގުޅުމަށް އަންގާރަ ދުވަހުގެ ރޭ ބޭއްވި ރަސްމިއްޔާތުގައި އަހުމަދު ނިހާން ހުސެއިން މަނިކަށް ރައީސް އަބްދުﷲ ޔާމީންގެ އަރިހުގައި އިންނެވުމަށް ޖަގާ ލިބިވަޑައިގެންފައެއް ނުވެއެވެ. އޭގެއިތުރުން ކުރީ ސަފުގައި އިންނެވުމަށްވެސް ނިހާނަށް ފުރުސަތެއް ނުލިބުނު އެވެ. އޭގެ ބަދަލުގައި ނިހާނަށް އިންނަވަންޖެހިވަޑައިގެންނެވީ ރައީސްގެ ގޮނޑި ބަރީގެ ފަހަތުގަ އެވެ.

ރައީސްގެ އެންމެ އަރިހުގައި ޕީޕީއެމްގެ ނަިއބް ލީޑަރު އަބްދުއް ރަހީމް އަބްދުﷲ އާއި، މިނިސްޓަރ މުހައްމަދު ސައީދު އިންނެވިއިރު، ކުރީ ސަފުގައި ދެން ތިއްބެވީވެސް ވަޒީރުންނާއި، މަޖިލީހުގެ މެމްބަރުންނެވެ. އޭގެތެރޭގައި ޖުމްހޫރީ ޕާޓީގައި ކުރިން ހުންނެވުމަށްފަހު، ޕާޓީ ބަދަލުކުރެއްވި އަހުމަދު މުބީނާއި، އެމްޑީޕީގައި އިންނެވުމަށްފަހު ޕާޓީ ބަދަލުކުރެއްވި އަބްދުﷲ ޔާމީން ރަޝީދުވެސް ހިމެނިވަޑައިގަންނަވައެވެ.

ޕީޕީއެމް ޖަލްސާގެ ކުރީ ސަފުގައި މެމްބަރު މުބީނާއި، މެމްބަރު ޔާމީން -- ފޮޓޯ: ޓުވިޓަރ

ޖަލްސާގެ ފޮޓޯތަކާއެކު ސޯޝަލް މީޑިއާގައި ގިނަ ފާޑުކިޔުންތަކެއް އަމާޒުކޮށްފައިވާއިރު، ފަހަތު ސަފުގައި ނިހާން އިންނަވަނަޖެހުނު ސަބަބާމެދު ގިނަ ބަޔަކު ސުވާލުތައް އުފައްދާފައިވެއެވެ. އެގޮތުން ނިހާން ފަހަތު ސަފުގައި އިންނަވަންޖެހުނީ ރައީސް އިތުބާރު ނުކުރައްވާތީކަމަށާއި، އޭއީ ލީކުވި އޯޑިއޯތަކުގެ ސަބަބުންކަަށް ބައެެއް ފަރާތްތަކުން ބުނެފައިވެއެވެ.

ދާދިފަހުން ވަނީ ނިހާންގެ އަޑުކަމަށް ބެލެވޭ، ބޭފުޅެއްގެ އަޑު ހިމެނޭ ގިނަ އޯޑިއޯތަކެއް އާންމުވެފައެވެ. ބައެއް އޯޑިއޯތަކުގައި ސަރުކާރަށާއި، ސަރުކާރުގެ ބައެއް މަސައްކަތްތަކަށް ވަނީ ވަރަށް ބޮޑަށް ފާޑުވިދާޅުވެފައެވެ.

ރައީސުލްޖުމްހޫރިއްޔާ ބައިވެރިވެވަޑައިގަންނަވާ ޖަލްސާތަކަކީ އާންމުކޮށް، ވަރަށް ބޮޑަށް ތައްޔާރުވުމަށްފަހު ބާއްވާ ޖަލްސާތަކަކާއި އެއްވުންތަކެކެވެ. އެގޮތުން އިށީންނާނެ ގޮނޑިތައް ހުންނަނީ ނަން ނޯޓުކުރެވި ތަރުތީބްކުރެވިފައެވެ. އެހެންކަމުން އެއީ އޮޅުމަކުންވީ ކަމެއްކަމަށްވެސް، ފާޑުކިޔާ ފަރާތްތަކުން ގަބޫލެއް ނުކުރެއެވެ.

މި ހަބަރާއި ގުޅޭގޮތުން ނިހާންގެ ބަހެއް ލިބޭގޮތް ވަނީ ނުވެފަ އެވެ.