ނައިބު ރައީސް، އިސްލާމިކް މިނިސްޓްރީން ކުރަމުންދާ މަސައްކަތްތަކާ ބެހޭ ގޮތުން މަޝްވަރާ ކުރައްވައިފި

ނައިބު ރައީސް ފައިސަލް ނަސީމް، މިނިސްޓަރ އޮފް އިސްލާކިމް އެފެއަރޒް ޑރ އަޙްމަދު ޒާހިރާއި އެ މިނިސްޓްރީގެ އިސްވެރިންނާ ބައްދަލުކުރައްވައި ކޮވިޑް-19ގެ މި ހާލަތުގައި މަސައްކަތްތައް ކުރިޔަށްގެންދާ ގޮތްތަކާ ބެހޭގޮތުން މަޝްވަރާކުރައްވައިފި އެވެ.

އޮންލައިންކޮށް ބޭއްވި މި މަޝްވަރާ ބައްދަލުވުމުގައި ނައިބު ރައީސް ވަނީ، ޤުރުއާނާ ބެހޭ މަރުކަޒުގެ ކަންކަން ހަރުދަނާކޮށް އެތަނުގެ ޚިދުމަތް ފުޅާކުރުމަށް ގެންނަން ޖެހޭ ހެޔޮ ބަދަލުތައް ގެނައުމުގެ މަސައްކަތް ވީހާވެސް އަވަސް ސްޕީޑެއްގައި ކުރިޔަށް ގެންދެވުމަށް އެދިވަޑައިގެންފައި ވެއެވެ. އަދި މިސްކިތްތައް ބިނާކުރުން ފަދަ ކަންކަމުގައި އިމާރާތުގެ ފެންވަރު ކަށަވަރުކުރުން ފަދަ ކަންކަމާއި ތަނުގެ ބޭނުން ހިފާ ހުރިހާ ފަރާތްތަކަށް އެންމެ ފުރިހަމައަށް ބޭނުން ހިފޭނެ ގޮތްތަކަށް ޑިޒައިން ކުރުމުގައި އިސްކަން ދިނުންފަދަ ކަންކަމަށް ޚާއްޞަ ސަމާލުކަމެއް ދެއްވުމަށް އެމަނިކުފާނު އެދިވަޑައިގެންނެވި އެވެ.

ހަމަ އެހެންމެ ކޮވިޑް-19ގެ ހާލަތަށް ފަހު މިސްކިތްތައް ހުޅުވާއިރު ސަމާލުކަން ދޭންޖެހޭ މުހިންމު ކަންކަމާއި ޤުރުއާން ޓީޗަރުން އުފެއްދުމާއި އަތޮޅުތަކުގައި ޤުރުއާން ކުލާސްތަކުގެ ކަންކަން ހަރުދަނާކޮށް ކުރިޔަށް ގެންދިއުމުގެ މުހިންމުކަން ވެސް ފާހަގަކުރެއްވި އެވެ.

މި ބައްދަލުވުމުގައި މިނިސްޓްރީގެ ފަރާތުން ބައިވެރިވެ ވަޑައިގެންނެވި ބޭފުޅުން ވަނީ އެ މިނިސްޓްރީގެ ދަށުން މިދުވަސްވަރު ކުރަމުން އަންނަ މައިގަނޑު މަސައްކަތްތައް ފާހަގަކުރައްވައި، ޚާއްޞަކޮށް މި ރަމަޟާން މަހު ދީނީ ޕްރޮގުރާމުތަކާއި ދަރުސްތައް ދިނުމަށް ކުރި އިންތިޒާމުތައް ފާހަގަކުރައްވާފަ އެވެ.

އަދި ޒަކާތުގެ ކަންކަމާއި މިއަހަރުގެ ޙައްޖާ ބެހޭ އެންމެ ފަހުގެ މަޢުލޫމާތުތައް މިނިސްޓްރީގެ އޮފިޝަލުން ވަނީ ޙިއްޞާކުރައްވާފަ އެވެ. މީގެ އިތުރުން ޤުރުއާނާ ބެހޭ މަރުކަޒުން ކުރިޔަށް ގެންދާ ކޯސްތަކާއި ރަށްރަށުގައި ކުރިޔަށްގެންދާ ޤުރުއާން ކުލާސްތަކާ ބެހޭގޮތުންނާއި ޤުރުއާން ޓީޗަރުން ބޭނުންވާ ވަރަށް ނުލިބުމުގެ މައްސަލައާއި މިސްކިތްތައް ބިނާކުރުމުގެ މަސައްކަތްތައް ކުރިޔަށްގެންދެވޭ ގޮތާ ބެހޭގޮތުން ވެސް މި ބައްދަލުވުމުގައި މަޝްވަރާކުރައްވާފައި ވެއެވެ.

މައިގަނޑު ގޮތެއްގައި މަޝްވަރާ ބިނާ ކުރެއްވީ ކޮވިޑް-19އާއި ގުޅިގެން އަޅާފައިވާ ފިޔަވަޅުތަކާއެކު އެ މިނިސްޓްރީގެ މަސައްކަތްތައް ކުރިޔަށްގެންދެވޭ ގޮތްތަކާއި އެކަންކަމުގައި ހުރި ދަތިތަކާ ބެހޭގޮތުން ކަމަށް ރައީސުލްޖުމްހޫރިއްޔާގެ އޮފީހުން ބުނެއެވެ.