ނިއުޒިލޭންޑުގެ އެންމެ ހަގު އަދި އެންމެ މަޤްބޫލު ބޮޑުވަޒީރު- ޖަސިންޑާ އާޑެން

ނިއުޒިލޭންޑުގެ އެންމެ މަޤުބޫލު ބޮޑުވަޒީރަކު ހޮވުމަށް ނެގި ވޯޓަކުން އެ ޤައުމުގެ ބޮޑުވަޒީރު ޖަސިންޑާ އާޑެން ބޮޑު ކާމިޔާބީއެއް ހޯދައިފިއެވެ.

މިހިނގާ މޭ މަހުގެ 8 ވަނަ ދުވަހުން 16 ވަނަ ދުވަހަށް އެ ޤައުމުގައި ނެގުނު ރިސާރޗް ޕޯލެއްގެ ނަތީޖާ ދައްކާގޮތުން އުމުރުފުޅުން 39 އަހަރުގެ ޒުވާން ބޮޑުވަޒީރު ޖަސިންޑާއަށް ވަނީ 59.05 އިންސައްތަ މީހުންގެ ވޯޓު ލިބިފައެވެ، އަދި މިއީ މި ޤަރުނުގައިވެސް އެ ޤައުމުގެ ބޮޑުވަޒީރަކަށް އެންމެ ބޮޑު މަޤުބޫލުކަމެއް ލިބިގެންދިޔަ ފަހަރުކަމަށް ރޮއިޓަރސްގައި ރިޕޯޓް ކޮށްފައިވެއެވެ.

އޭގެ އިތުރުން، މިއީ މި ޕޯލް އިންތިޒާމުކުރި ފަރާތުން މިހާތަނަށް ނެގި ވޯޓުތަކުގައި ހިމެނޭ ލީޑަރަކަށް މިހާ ގިނަ ވޯޓު ލިބިގެންދިޔަ ފުރަތަމަ ފަހަރުކަމަށް ރިޕޯޓްތައް ބުނެއެވެ.

ނިއުޒިލޭންޑުގެ މި ޤަރުނުގެ އެންމެ މަޤުބޫލު ބޮޑުވަޒީރުކަން ޖަސިންޑާއަށް ލިބިފައިވާއިރު، އެ ޤައުމު ދުއް އެންމެ ހަޤު ބޮޑުވަޒީރަށް ދުނިޔޭގެ ތައުރީފުވެސް އޮހެމުންދާލެއް މަދެއް ނޫނެވެ. އެގޮތުން ނިއުޒިލޭންޑުގައި ކޮވިޑް-19 އާ ދެކޮޅަށް އަޅަމުން ގެންދާ ހަރުދަނާ ފިޔަވަޅުތަކަށް ބައިނަލްއަޤުވާމީ ދުނިޔޭގެ ސަމާލުކަންވެސް ލިބިގެން ގޮސްފައިވެއެވެ.

ކޮވިޑް-19 ފެތުރުން ކޮންޓްރޯލް ކުރުމަށް ޖަސިންޑާ ވަނީ އެ ޤައުމުގައި ލެވެލް-4 ގެ ލޮކްޑައުން އިއުލާނުކޮށް، ރައްކާތެރިކަމުގެ ފިޔަވަޅުތައް ވަރުގަދަކޮށްފައެވެ. އަދި އެއަށްފަހު ޤައުމުގެ ޙާލަތަށް ރިއާޔަތް ކުރައްވައި ލެވެލް-3 ގެ ލޮކްޑައުންއަކަށް ބަދަލު ކުރައްވައި އެކަންކަން ގާތުން ބައްލަވަމުން ގެންދެވިއެވެ. ނަތީޖާއެއްގެ ގޮތުން އެ ޤައުމުގައި ވައިރަސް ފެތުރޭ މިންވަރު ކޮންޓްރޯލް ކުރެވި، މިދިޔަ ބުރާސްފަތި ދުވަހު ވަނީ ކެފޭތަކާއި، ސިނަމާތަކުގެ އިތުރުން، މޯލްތައްވެސް ހުޅުވާލެވިފައެވެ.

ނިއުޒިލޭންޑުގައި މިހާތަނަށް 1499 ކޭސް ރިޕޯޓް ކުރެވިފައިވާއިރު، 21 މީހަކު ވަނީ ވައިރަސް ޖެހިގެން މަރުވެފައެވެ. އަދި ފާއިތުވި ހަފްތާތަކުގައި އެ ޤައުމުން ދުވާލެއްގެ މައްޗަށް ފެންނަމުންދިޔަ ކޭސްތައް ވަރަށް ބޮޑަށް ދަށްކުރެވިފައިވާކަމަށް ރޮއިޓަރސްގައި ރިޕޯޓް ކޮށްފައިވެއެވެ.

ޖަސިންޑާ އާޑެންއަކީ ޤަރުނުގެ އެންމެ މަޤުބޫލު ބޮޑުވަޒީރު ގޮތުގައި އެ ޤައުމުގެ ރައްޔިތުން ސިފަ ކުރާއިރު، މީގެ ކުރިންވެސް ޖަސިންޑާ ވަނީ އެކި ގޮތްގޮތުން އެ ޤައުމުގެ ރައްޔިތުންގެ ލޯބި ހޯދާފައެވެ. އެގޮތުން ޖަސިންޑާގެ ލީޑަރޝިޕްގެ ދަށުން އެ ޤައުމު ދުއް އެންމެ ކަޅު އެއް ދުވަސް ކަމަށްވާ "ކްރައިސް ޗަރޗް ހަމަލާ" ގެ ދުވަހު ޖަސިންޑާ އެ ޤައުމުގައި އުޅޭ މުސްލިމުންނާ ބެހެއްޓެވި ގާތްކަމާއި އެކަމުގައި އެޅުއްވި އަވަސް ފިޔަވަޅުތަކަކީ ދުނިޔޭގެ ބޮޑެތި ޤައުމުތަކުންވެސް ފާހަގަކުރި ކަމެކެވެ.

އެ ހަމަލާ އަކީ ސީދާ ''ޓެރަރިސްޓް'' ހަމަލާއެއްގެ ގޮތުގައި އެންމެ ފުރަތަމަ ސިފަކުރެވީވެސް އެކަމަނާއެވެ. ހަމަލާގައި ބިކަވި އާއިލާތަކަށް އިހުތިރާމް އަދާކުރެއްވުމުގެ ގޮތުން މުސްލިމުންގެ އާދައާ އެއްގޮތަށް ހެދުންތުރުކުރައްވައި އިސްތަށިފުޅު ނިވާކުރެއްވިއެވެ. އެކަމަނާ ވަނީ މި ހަމަލާގައި ބިކަވި އާއިލާތަކާއިއެކު ގިނަ ވަގުތުތަކެއް ހޭދަކުރައްވައި، އާއިލާތަކަށް ހިތްވަރު ދެއްވާފައެވެ. ހަމަލާގެ ދެ ދުވަސް ފަހުން މާރޗް މަހުގެ 17 ވަނަ ދުވަހު ބޮޑުވަޒީރު އާރޑަން ވަނީ ނިއުޒިލޭންޑްގައި ބަޑި ގެންގުޅުމުގެ އުސޫލަށް ބަދަލު ގެންނަވާފައެވެ. މިފަދަ އެތައް ކަމަކުން ތަފާތު އެކި ދީންތަކުގެ މީހުންގެ ލޯތްބާއި ޤަދަރުވެސް އެކަމަނާއަށް އޮހިގެން ދިޔައެވެ.

އޭގެ އިތުރުން، ނިއުޒިލޭންޑްގެ ގައުމީ ޓީވީން އެ ޤައުމުގައި ބޮޑު ޖަމާޢަތުގައި ކުރި ހުކުރު ނަމާދު ވަގުތުން ދުރަށް ދައްކާފައިވާއިރު، މިއީ އެގައުމުގެ ތާރީހުގައިވެސް ހުކުރު ނަމާދު ލައިވްކުރި ފުރަތަމަ ފަހަރެވެ. އަދި ހުކުރު ނަމާދު ފެށުމުގެ ކުރިން ބޮޑުވަޒީރު އާރޑަން ޤައުމާއި މުޚާތަބު ކުރައްވާ ވާހަކަފުޅު ދެއްކެވިއިރު، އެކަމަނާގެ ވާހަކަފުޅު ފެއްޓެވީ ރަސޫލާ ﷺ ހަދީޘްފުޅެއްގެ އިނގިރޭސި ތަރުޖަމާއިންނެވެ. މިކަންކަމުންވެސް އެކަމަނާއަށް މީހުން ކުރި ޤަދަރާއި އިޙުތިރާމް އެތައް ގުނައަކަށް އިތުރުވެގެން ދިޔައެވެ.

ޖަސިންޑާ އާޑެން ނިއުޒިލެންޑްގެ ބޮޑުވަޒީރުކަމާއި ހަވާލުވެވަޑައިގަތީ 2017 ވަނަ އަހަރުގެ އޮކްޓޯބަރު މަހުއެވެ. އެކަމަނާއަކީ 1856 ވަނަ އަހަރުގެ ފަހުން އެޤައުމުގެ ބޮޑުވަޒީރުކަމާ ހަވާލުވެ ވަޑައިގެންނެވި އެންމެ ޒުވާން ބޭފުޅާއެވެ.