މުދަލުގެ ޒަކާތް ސަރުކާރަށް ދައްކަނީ ނިސްބަތުން މަދު ބައެއް: އިސްލާމިކް މިނިސްޓަރު
18 މެއި 2020 | ހޯމަ 17:10މުދަލު ޒަކާތް ސަރުކާރާ ހަވާލު ކުރުމަކީ އެންމެ ރަނގަޅު ގޮތް
ވިޔަފާރިވެރިން މުދަލުގެ ޒަކާތް ދެއްކުމަށް ޚާއްސަކޮށް ސަމާލުވުމަށް، އިސްލާމިކް މިނިސްޓަރު ޑރ. އަހްމަދު ޒާހިރު އަލީ އެދިފައިވޭ
މުދަލުގެ ޒަކާތް ސަރުކާރަށް ދައްކަނީ ނިސްބަތުން މަދު ބައެއް ކަމަށް އިސްލާމިކް މިނިސްޓްރީން ބުނެފި އެވެ.
ހޯމަ ދުވަހު ރާއްޖެޓެވީއަށް ދެއްވި އިންޓަވިއުއެއްގައި އިސްލާމިކް މިނިސްޓަރު ޑރ. އަހްމަދު ޒާހިރު އަލީ ވިދާޅުވީ މުދަލުގެ ޒަކާތް ބައެއް މީހުން ދައްކާ ކަމަށާއި، ބައެއް ފަރާތްތަކުން އަމިއްލަ އަމިއްލައަށް ދައްކާގެން އެކަން ކުރިއަށް ގެންދާ ކަމަށެވެ.
މުދަލު ޒަކާތް ސަރުކާރަށް ދައްކާ ވަރު މަދުކަން ފާހަގަކުރެވޭ ކަމަށާއި، ނަމަވެސް ކުރިއާ އަޅާބަލާއިރު، މުދަލުގެ ޒަކާތް ދައްކާވަރު ކޮންމެ ވެސް ވަރަކަށް އިތުރުވެފައިވާ ކަމަށް މިނިސްޓަރު ވިދާޅުވި އެވެ.
މުދަލު ޒަކާތް ސަރުކާރާ ހަވާލުކުރުމަކީ އެންމެ ރަނގަޅު ގޮތްކަން ފާހަގަކުރައްވައި މިނިސްޓަރު ޒާހިރު ވިދާޅުވީ މުދަލު ޒަކާތް ބެހެނީ ކިތައްބަޔަށްތޯ ސަރުކާރުން ޔަގީން ކުރާނެ ކަމަށެވެ.
މިނިސްޓަރު ޒާހިރު ވިދާޅުވީ މުދަލުގެ ޒަކާތް ބެހުމުގެ ކަންކަމުގައި ހޭލުންތެރިކަން އިތުރު ކުރުމަކީ ވެސް ވަރަށް މުހިންމު ކަމެއް ކަމަށެވެ. އަދި ރާއްޖޭގައި ތިބި ވިޔަފާރިވެރިން މުދަލުގެ ޒަކާތް ދެއްކުމަށް ވަރަށް ޚާޢްސަ ސަމާލުކަމެއް ދިނުމަށް މިނިސްޓަރު އެދިވަޑައިގެންނެވި އެވެ.
