އެކޮޅުކޮޅުން އެލުވި ނަމަވެސް އަނިޔާވެރިކަމަށް އާނއެކޭ ނުބުނާނެ ކަމަށާއި، ސަބްސިޑީސްތައް ކަނޑާލާ ރައްޔިތުން ފޭލާލުމަށް ޔާމީން އަބްދުއް ޤައްޔޫމަށް ވޯޓުދޭންނުޖެހޭ ކަމަށް ވިދާޅުވެ، ޖުމްހޫރީ ޕާޓީގެ ލީޑަރު ޤާސިމް އިބްރާހިމް، ރައީސް އަބްދުﷲ ޔާމީންގެ ސަރުކާރަށް ވަރަށް ބޮޑަށް ފާޑުވިދާޅުވެއްޖެ އެވެ.  

ސިޔާސީ ޕާޓީތައް ގުޅިގެން ބޭއްވި ޖަލްސާގައި ވާހަކަދައްކަވަމުން ޤާސިމް އިބްރާހިމް ވިދާޅުވީ ދިވެހި ރައްޔިތުންނަށް އޭނާ ދަރަނިވެރިވެފައިވާ ކަަމަށެވެ. އެހެންކަމުން އެ ރައްޔިތުންނަށްޓަކައި މަސައްކަތްކުރުމަށް ނިކުމެ ހުންނެވި ކަމަށް ޤާސިމް ވިދާޅުވި އެވެ. އަދި ވިދާޅުވީ "ފުނޑު ފުނޑުކޮށްލި ނަމަވެސް، އެކޮޅުކޮޅުން އެލުވާލި ނަމަވެސް އަނިޔާވެރިކަމަށް ދެން އާނއެކޭ ނުބުނާނެ" ކަމަށެވެ. އެގޮތުން އެއްވެސް އިންސާނަކަށް އަނިޔާލިބުމަށް ނޭދޭ ކަމަށް ޤާސިމް ވިދާޅުވި އެވެ.

ޤާސިމް ވިދާޅުވީ، ކާޑުގެ އަގު ބޮޑުކޮށް، ކަރަންޓުގެ އަގު ބޮޑުކޮށް، ހުރިހާ އެއްޗެއްގެ އަގު ބޮޑުކުރާއިރު، ދައުލަތުގެ ބަޖެޓުގައި ފަސް ބިލިއަން ލިބުނު އިރުވެސް ރައީސް މައުމޫނުގެ ވެރިކަމުގައި ރައްޔިތުންނަށް ކާޑުގެ ސަބްސިޑީ ދެއްވާފައިވާ ކަމަށެވެ. އަދި ކުރީގެ ސަރުކާރުތަކުން ފެނުގެ ސަބްސިޑީ ވެސް ދީފައިވާ ކަމަށާއި، ނަމަވެސް މިއަދުގެ ބަޖެޓު 26 ބިލިއަން ރުފިޔާއަށް އަރާއިރު އެ ފައިސާ ކޮބައިތޯ ޤާސިމް ވަނީ ސުވާލު އުފައްދަވާފަ އެވެ.

"ބަލަ ރައްޔިތުން ފެލާލަންވީތަ، އެކަން ކުރަންތަ، ރައްޔިތުން ފެލާލަންތަ ޔާމީން އަބްދުއް ޤައްޔޫމަށް ވޯޓުދޭންޖެހެނީ. ނޫން. ނުޖެހޭނެ ދޭކަށް. ކޮބައިތޯ އިންސާފު" ޤާސިމް އިބްރާހިމް ވިދާޅުވި އެވެ.

އިތުރަށް ވާހަކަދައްކަވަމުން ޤާސިމް އިބްރާހިމް ވިދާޅުވީ ކުރިން ހެދި މިސްޓޭކް ދެން ތަކުރާރުނުކުރާނެ ކަމަށާއި، ސިޔާސީ ޕާޓީތައް ތިބޭނީ އެކަތިގަނޑެއްގެ ގޮތުގައި ކަމަށެވެ. އަދި މާޒީވެ ދިޔަ ދުވަސްތަކުން އިބުރަތް ހާސިލްކުރެވެއްޖެކަމަށާއި، މޫމިނެއްގެ ގަޔަށް އެއް ހަރަކުން ދެ ފަހަރު ކައްޓެއް ނުޖަހާނެ ކަމަށް ގާސިމް ވިދާޅުވި އެވެ.

"އަހަރެމެން ދެން އެ މިސްޓޭކެއް ނަހަދާނަން އިރާދަކުރެއްވިއްޔާ. އަހަރެމެން އެކަތިގަނޑެއްގެ ގޮތުގައި، އެއް އުއްމަތެއްގެ ގޮތުގައި، އެއް ދީނެއްގެ ގޮތުގައި، އެއް ރައްޔިތެއްގެ ގޮތުގައި އަޅުގަނޑުމެން މަސައްކަތްކުރާނީ. އެއް ޤައުމެއްގެ ގޮތުގައި ބާއްވައިގެން އެކުވެރިކަމާއެކު އަޅުގަނޑުމެން މަސައްކަތްކުރާނީ" ގާސިމް ވިދާޅުވި އެވެ.

ޤާސިމް ވަނީ، ޕާޓީތަކުން ވަކިވި މެމްބަރުން އަނބުރާ ޕާޓީތަކަށް ގުޅުމަށް ގޮވަލައްވާ ގޮވާލުން ތަކުރާރުކުރައްވާފަ އެވެ. އެގޮތުން ގާސިމް ވިދާޅުވީ ރައްޔިތުންގެ ލާބައާއި މަންފާއަށްޓަކައި މެމްބަރުން މަސައްކަތްކުރަންޖެހޭ ކަމަށާއި، ރައްޔިތުންނަށް ނޫނެކޭ ބުނާ މެމްބަރުންނަށް ރައްޔިތުންވެސް ނޫނެކޭ ބުނާނެ ކަމަށެވެ. އަދި މެމްބަރުން އަނބުރާ ޕާޓީތަކާއި ގުޅިއްޖެ ނަމަ ހުރިހާ ކަމެއް ހައްލުވާނެ ކަމަށް ގާސިމް ވިދާޅުވި އެވެ.

ގާސިމް ވިދާޅުވީ، ޕީޕީއެމްގެ ޕާލިމެންޓްރީ ގުރޫޕުގެ މެމްބަރުން ވަރަށް ރަނގަޅަށް ވިސްނަންޖެހޭ ކަމަށާއި، ޕީޕީއެމްގައި އެ މެމްބަރުން ތިބި ނަމަވެސް ކުރިއަށް އޮތް ދައުރުގައި އެ މެމްބަރުންނަށް ވޯޓެއް އަދި ތާއީދެއް ވެސް ނުލިބޭނެ ކަމަށެވެ. އަދި ރައްޔިތުންގެ ތާއީދު ލިބޭނީ ގުޅިފައިވާ ސިޔާސީ ޕާޓީތަކުން ކުރާ މަސައްކަތުގައި ބައިވެރިވެގެން ކަމަށް ގާސިމް ވިދާޅުވި އެވެ.

"ކޮންބަޔަކު ވޯޓުލާނެކަމަށްތޯ ޔާމީން އަބްދުއް ޤައްޔުމްގެ ސައިޑްގައި ތިޔަ ތިއްބެވީ. ނުލާނެ ޔާމީން އަބއްދުއް ޤައްޔޫމްގެ ސައިޑްގައި ތިބި މީހުންނެއް ތިޔަ މެމްބަރުންނަށް އަލުން ވޯޓެއް. އަޅުގަނޑުމެންގެ ފަޅިޔަށް އަންނަންވީ" ގާސިމް ވިދާޅުވި އެވެ.