ބޯކޮށް ވާރޭ ވެހޭނެ ކަމަށް ލަފާކޮށް، ބ. އަތޮޅުން ފެށިގެން އައްޑޫ ސިޓީއާއި ހަމަޔަށް ޔެލޯ އެލަރޓް ނެރެފި އެވެ.

މޫސުމާއި ބެހޭ ޤައުމީ އިދާރާއިން ބ. އަތޮޅުން ފެށިގެން އައްޑޫ ސިޓީއާއި ހަމަޔަށް ޔެލޯ އެލަރޓް ނެރެމުން ބުނެފައި ވަނީ އެ ޞަރަޙައްދުގެ ރަށްތަކަށް ބޯކޮށް ވާރޭ ވެހުމާއެކު ގުގުރުން އެކަށީގެންވާ ކަމަށެވެ. އަދި ވިލާގަނޑުގައި ގަޑިއަކު 55 މޭލާއި 60 މޭލާ ދެމެދުގެ ބާރުމިނަށް ވައިގަދަވާނެ ކަމަށެވެ. ޢާންމު ކޮށް ވައިގަދަ ވާއިރު ގަޑިއަކު 28 މޭލާއި 35 މޭލާއި ދެމެދު ހުންނާނެ ކަމަށެވެ.

މެޓް އޮފީހުން ވަނީ ހޯމަ ދުވަހުގެ ހަވީރު 17:00 ށް ބ އަތޮޅުން ފެށިގެން އައްޑޫސިޓީއާއި ހަަމަޔަށް ޔެލޯ އެލަރޓް ނެރެ، ހއ. އަތޮޅުން ފެށިގެން ބ އަތޮޅަށް ވައިޓް އެލަރޓް ނެރެފައެވެ. މޫސުމާއި ބެހޭ ގައުމީ އިދާރާއިން ވަނީ ހޯމަ ދުވަހުގެ ރޭ 2200ގެ ނިޔަލަށް ބ އަތޮޅުން ފެށިގެން އައްޑޫސިޓީއަށް ޔެލޯ އެލަރޓް ނެރެފައެވެ.

މޫސުމާ ބެހޭ ޤައުމީ އިދާރާއިން ހޯމަ ދުވަހުގެ ހެނދުނު 10:00ން ރޭގަނޑު 10:00ށް މޫސުން ކުރިޔަށް ލަފާކުރާ ގޮތް ޢާންމުކޮށްފައި ވާއިރު، ރާއްޖޭގެ އެކިހިސާބަށް ވިއްސާރަކޮށް ދެކުނާއި މެދު ތެރޭގެ ބައެއް ރަށްތަކަށް ގުގުރާ، ގަދަވަޔާއެކު ބޯކޮށް ވާރޭވެހެނޭ ކަމަށް ލަފާކޮށްފައި ވެއެވެ.

ހުޅަނގާއި ހުޅަނގުއުތުރުން ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި ވައި ޖެހޭނެކަމަށާއި، ވިލާގަނޑުގައި ގަޑިއަކު ގާތްގަނޑަކަށް 50 މޭލާއި 60 މޭލާ ދެމެދުގެ ބާރުމިނަކަށް ވައިގަދަވުން އެކަށީގެންވާކަމަށް މެޓް އޮފީހުން ބުނެއެވެ. މެޓް އޮފީހުން ބުނެފައި ވަނީ ހުރިހާ ހިސާބެއްގެ ކަނޑުތައްވެސް އާންމު ގޮތެއްގައި ގަދަވާނެ ކަމަށާއި، ބައެއް ރަށްތަކަށް އުދައިގެ އަސަރު ކުރުމަކީވެސް އެކަށީގެންވާ ކަމެއްކަމަށެވެ.

ބޯކޮށް ވާރޭ ވެހި، ވައިގަދަވެ، ކަނޑުތައްވެސް ގަދަވާނެ ކަމަށް ލަފާ ކުރެވޭތީވެ، ޢާންމުކޮށް ހުރިހާ ފަރާތްތަކުން ވެސް މޫސުމަށް ވަރަށް ބޮޑަށް ސަމާލުވުމަށް މޫސުމާއި ބެހޭ ޤައުމީ އިދާރާއިން ވަނީ އިލްތިމާސް ކޮށްފައެވެ.

މިހާރުވެސް މާލެސިޓީއާއި ރާއްޖޭގެ އެކި ކަންކޮޅުތަކަށް ދަނީ ގުގުރުމާއި އެކު ބޯކޮށް ވާރޭ ވެހެމުންނެވެ.

ރާއްޖޭގެ މޫސުމުން ގޯސްވެފައިވާއިރު އިންޑިއާގެ ބޭ އޮފް ބެންގާލްގައި އުފެދިފައިވާ ތޫފާން އަމްޕަންގެ ސަބަބުން ވެސްޓަން ބެންގާލް އާއި އޮޑީޝާ އެލާޓަށް މިހާރު ވަނީ ގެނެސްފައެވެ.

އިންޑިއާގެ މީޓިއޮރޮލޮޖިކަލް ޑިޕާޓްމެންޓުން ހާމަކޮށްފައިވާ ގޮތުން ހޯމަ ދުވަހު ތޫފާން ވަނީ ބާރު ގަދަ 'ސުޕަ ސައިކްލޯނިކް ސްޓޯމް'އަކަށް ބަދަލުވެފަ އެވެ. އަދި އަންނަ ބުދަ ދުވަހު އެ ތޫފާން ވެސްޓް ބެންގާލް އާއި ބަންގުލަދޭޝްގެ އައްސޭރިފަށަށް އަރާނެ ކަމަށް ލަފާކޮށްފައިވާއިރު ގަޑިއަކު 155 އާއި 165 ކިލޯމީޓަރާ ދެމެދުގެ ބާރު މިނުގައި ވައި ޖެހޭނެ ކަމަށް އެ ޑިޕާޓްމެންޓުން ބުނެއެވެ.

ތޫފާން އަމްޕަންގެ ސީދާ އަސަރެއް ރާއްޖެއަށް ނުކުރާނެ ކަމަށް ރާއްޖޭގެ މޫސުމާއި ބެހޭ އިދާރާއިން ވަނީ ބުނެފައެވެ. ނަމަވެސް ރާއްޖެއަށް މިހާރު ކުރަމުންދާ ވިއްސާރައިގެ ބާރު ގަދައީ ތޫފާނުގެ ނުސީދާ އަސަރުގެ ސަބަބުންނާއި މިއީ ހުޅަނގު މޫސުމަށް ވާތީ ކަމަށް މޫސުމާއި ބެހޭ އިދާރާއިން ބުނެއެވެ.