ފިތުރު އީދު ނަމާދުވެސް ގޭގައި ކުރުމަށް ނިންމައިފި
18 މެއި 2020 | ހޯމަ 09:28ގޭގައި ވެސް އީދު ނަމާދު ކުރާނީ މިސްކިތުގައި އީދު ނަމާދު ކުރާ ގޮތަށް
ފައިލް ފޮޓޯ: މިއަހަރު ފިޔަވައި ކޮންމެ އަހަރަކު ވެސް ބޮޑު ޖަމާއަތުގައި އީދު ނަމާދު ކުރޭ
މިއަހަރުގެ ފިޠުރރު ޢީދު ނަމާދު ވެސް ޖަމާޢަތުގައި ކުރުމުގެ ބަދަލުގައި ގޭގައި ކުރާ ގޮތައް މިނިސްޓްރީ އޮފް އިސްލާމިކް އެފެއަރޒުން ނިންމައިފިއެވެ.
އިސްލާމިކް މިނިސްޓްރީން ބުނީ ޢީދު ނަމާދުގެ ބޮޑު ޖަމާޢަތް ޤާއިމުކުރުމަކީ އިސްލާމް ދީނުގެ ވަރަށް މަތިވެރި ޝިޢާރެއް ކަމަށެވެ. އެހެން ނަމަވެސް މިއަދު މުޅިދުނިޔެއަށް ކުރިމަތިވެފާމިވާ، ނުރައްކާތެރި ޢާލަމީ ވަބާއިން ރައްކާތެރިވުމަށްޓަކައި، ގެއިން ބޭރަށް ނުކުމެ، ގިނަ މީހުން އެއްތަނަކަށް އެއްވެއުޅުން މަނާވެ، މިސްކިތުގެ ޖަމާޢަތް ހުއްޓާލެވި، ގޭގައި މަޑުކުރަން ޖެހިފައިވާ ކަމަށް މިނިސްޓްރީން ބުނެއެވެ.
މިފަދަ، ޝަރުއީ ޢުޛުރެއްގެ ސަބަބުން، އީދު ނަމާދުގެ ޢާންމު ބޮޑު ޖަމާޢަތް ޤާއިމު ނުކުރެވޭ ފަދަ ޙާލަތެއް މެދުވެރިވެއްޖެނަމަ، ފަރުދީ ގޮތުން ގޭގައި ތިބެ އެ ޝިޢާރު ޤާއިމުކުރުން ޝަރުޢުވެގެން ވާ ކަމަށެވެ.
އެގޮތުން ޝަރުޢީ ޢުޛުރެއްގެ ސަބަބުން ޢީދުގެ ބޮޑު ޖަމާޢަތް ފާއިތުވެއްޖެނަމަ، އަނަސްގެފާނު ގޭގައި އަހުލުންނާއެކު ޖަމާޢަތުގައި ޢީދު ނަމާދު ކުރައްވާކަމަށް ޞައްޙަ ރިވާޔަތްތަކުން ވާރިދުވެ އައިސްފައިވާ ކަމަށް އިސްލާމިކް މިނިސްޓްރީން ބުނެއެވެ.
އެފަދަ ޙާލަތުގައި ގޭގައި ޢީދު ނަމާދު ކުރާނީ މައިދާނުގައި ނުވަތަ މިސްކިތުގައި ވެސް ޢީދު ނަމާދު ކުރާ ފަދައިންނެވެ. ނަމަވެސް ޢީދު ނަމާދުގެ ޚުޠުބާއަކީ ޙާކިމާގެ އަމުރަށް ބޮޑު ޖަމާޢަތެއްގައި ކިޔުމަށް އޮންނަ ސުންނަތެއް ކަމުން ގޭގައި ޢީދު ނަމާދު ކުރާއިރު ޚުޠުބާ ދިނުމެއް ނޯންނާނެ ކަމަށް މިނިސްޓްރީން ބުނެއެވެ.
ޢީދު ނަމާދު ކުރާނީ ބަންގި ގޮވުމާއި ޤަމަތް ދިނުމަކާ ނުލައެވެ. ގޭގައި ޢީދު ނަމާދު އެކަނި ވެސް ކުރެވޭނެ އެވެ. ނަމަވެސް ގޭގެ އަހުލުންނާއެކު ޖަމާޢަތުގައި ކުރުން އަޢުލާކަން ބޮޑުވެގެން ވެއެވެ.
ގޭގައި އީދު ނަމާދު ކުރާއިރު ޢަމަލުކުރާ ގޮތް
1- ޢީދު ނަމާދުގެ ވަގުތު ވަންނާނީ ލޮންސިއެއްގެ މިންވަރަށް (ގާތް ގަޑަކަށް އިރު އަރާ ވަގުތުން ފެށިގެން 20 މިނެޓް) އިރު އެރުމުންނެވެ.
އެންމެންގެ މަސްލަޙަތަށްޓަކައި ރާއްޖޭގައި ޢީދު ނަމާދު ކުރަން ފަށަނީ 7:30 ގައެވެ.2- ޢީދު ނަމާދުގެ ކުރިންނާއި ޢީދު ނަމާދުގެ ފަހުންވެސް ތަކްބީރު ކިޔުން ގިނަކުރުން ސުންނަތްކަން ގަދަވެގެން ވެއެވެ.
މިޙާލަތުގައި 1441 ވަނަ އަހަރުގެ ފިޠުރު އީދު ނަމާދުގެ ބޮޑު ޖަމާޢަތް ނުހެދުމަށާއި، ގޭގައި އީދު ނަމާދުކުރުމަށް ނިންމާފައި ވާތީ، އެގޮތުގެ މަތިން ޢަމަލުކުރުމަށާއި، އެކަން ރައްޔިތުންނަށް އެންގުމަށް މިނިސްޓްރީން ވަނީ އެދިފަ އެވެ.
ޢީދު ނަމާދުގެ ބޮޑު ޖަމާޢަތް ނުހެދުނު ނަމަވެސް ގޭގައި ޢީދު ނަމާދު ކުރުމަށާއި، ގިނަގިނައިން ތަކުބީރުކިޔައި، ދުޢާކޮށް، ޝަރުޢީ ހަމަތަކުގެ މަތިން ރައްކާތެރިކަމާއެކު، ގޭގެ އަހުލުންނާއެކު އީދު އުފާ ފާޅުކުރުމަށް ހުރިހާ ރައްޔިތުންނަށް އިސްލާމް މިނިސްޓްރީން ވަނީ ނަޞޭޙަތްތެރި ވެފައެވެ.
