އިންކަމް ސަޕޯޓް އެލަވަންސަށް ކުރިމަތި ލެެވޭނެ ސުންގަޑިތައް އިއުލާނު ކޮށްފި
އިންކަމް ސަޕޯޓްއެއްގެ ގޮތުގައި ލިބޭނީ 5000 ރުފިޔާ
ރިސޯޓެއްގެ މުވައްޒަފެއް: އެންމެ ބޮޑަށް އަސަރުކޮށްފައިވަނީ ޓޫރިޒަމް ދާއިރާގައި މަސައްކަތް ކުރާ ފަރާތްތަކަށް
ކޮވިޑް-19ގެ ޙާލަތާއި ގުޅިގެން ވަޒީފާ އަށް ނުރަނގަޅު އަސަރުކޮށްފައިވާ ފަރާތްތަކަށް ސަރުކާރުން ދޭ ''އިންކަމް ޓެކްސް އެލަވެންސް'' އަށް ކުރިމަތި ލެވޭނެ ސުންގަޑި ޢާންމުކޮށްފި އެވެ.
އިންކަމް ސަޕޯޓް އެލަވަންސްގެ ގޮތުގައި ދޭން ކަނޑައަޅާފައި ވަނީ 5000ރ އެވެ. މި ފައިސާ ލިބޭ ފަރާތްތަކުގެ ތެރޭގައި ހިމެނެނީ 1 މާރޗް 2020 ވަނަ ދުވަހާ ހަމައަށް ވަޒީފާގައި ދެމިތިބި ފަރާތްތަކާއި، 1 މާރޗް 2020 ވަނަ ދުވަހާ ހަމައަށް އަމިއްލަ މަސައްކަތުން ޢާމްދަނީ ހޯދަމުން އައިސްފައިވާ ފަރާތްތަކާއި، އަދި އެހެނިހެން ގޮތްގޮތުން ޢާމްދަނީ ލިބެމުން އައި ފަރާތްތަކެވެ.
އިކޮނޮމިކް މިނިސްޓްރީން ވަނީ އެލަވަންސް އަށް އެދި ހުށަނާޅާ ފަރާތްތަކަށް ސުންގަޑިއެއް ކަނޑައާޅާފަ އެވެ. އެގޮތުން 1 މާރޗް އިން 30 އެޕްރީލްގެ ނިޔަލަށް ޢާމްދަނީ އަށް ނުރަނގަޅު ކޮށްފައިވާ ފަރާތަތަކުން މެއި މަހުގެ 30 ގެ ކުރިން ފޯމް ހުށައަޅަން ޖެހެއެވެ. 1 މެއި އިން 31 މެއި ގެ ނިޔަލަށް ޢާމްދަނީ އަށް ނުރަނގަޅު އަސަރުކޮށްފައިވާ ފަރާތްތަކުން ޖޫންމަހުގެ ހަތްވަނަ ދުވަހުގެ ކުރިން ފޯމު ހުށައަޅަން ޖެހެ އެވެ. 1 ޖޫން އިން 30 ޖޫން ގެ ނިޔަލަށް ޢާމްދަނީ އަށް ނުރަނގަޅު އަސަރު ކޮށްފައިވާ ފަރާތްތަކަށް ފޯމު ހުށައަޅަންދީފައިވާ ސުންގަޑި އަކީ ޖުލައި މަހުގެ ހަތް ވަނަ ދުވަހު އެވެ.
ފައިސާގެ މި އެހީ ދޫކުރުމަށް ސަރުކާރުން ނިންމާފައި ވަނީ ތިން މަސް ދުވަހުގެ މުއްދަތަކަށެވެ. ވަޒީފާއެއް ހޯދައިދީފި ކަމުގައިވަނީނަމަ ވަޒީފާއަކަށް ދިއުމާއި، ސަރުކާރުން ހިންގާ ތަރައްޤީގެ ޕްރޮގުރާމެއްގައި ބައިވެރިވުމަށް މި އެލަވަންސް ލިބޭ ފަރާތްތަކަށް ވަނީ ޝަރުޠު ކޮށްފަ އެވެ.
ކޮވިޑް-19 އާ ގުޅިގެން އިޤުތިޞާދު ހުއްޓުމަކަށް އައިސްފައި ވާއިރު، ގިނަ ބަޔެއްގެ ވަޒީފާތައް ވަނީ ގެއްލިފަ އެވެ. ސަރުކާރުން ޤާއިމުކޮށްފައިވާ ޖޮބް ސެންޓަރަށް ހުށައަޅާފައިވާ މައްސަލަތަކަށް ބަލާއިރު، މިހާތަނަށް 3000ށް ވުރެ ގިނަ މީހުން ޝަކުވާ ހުށައަޅާފައި ވެއެވެ. ހުށައަޅާފައިވާ ޝަކުވާތަކުގެ ތެރޭގައި ގިނައީ މުސާރަ ނުހިނގާ ގޮތައް ޗުއްޓީއަށް ދާން މަޖުބޫރުކުރާ މައްސަލަ އެވެ.
