ކްލައިމެޓް އިމަރޖެންސީއެއް ރައްޔިތުން މަޖިލީހުން ފާސްކޮށްފައި ވަނީ ޖޯކަކަށް ނޫންކަމަށާއި، ކްލައިމެޓް އިމަރޖެންސީއަށް ހުރިހާ ފަރާތްތަކުން އިޙުތިރާމު ކުރުމަށް ރައްޔިތުންގެ މަޖިލީހުގެ ފޭދޫ ދާއިރާގެ މެންބަރު މުޙައްމަދު ނިހާދު ގޮވާލައްވައިފި އެވެ.

ނިހާދު މިގޮތަކަށް ގޮވާލެއްވީ، އައްޑޫ ސިޓީއަށް މިހާރު ކުރަމުންދާ މޫސުމީ ވިއްސާރަގައި ރާއްޖޭގެެ ރަށްތަކަށް ވަކިން ޚާއްޞަކޮށް، އައްޑޫ ސިޓީއަށާއި އައްޑޫ ސިޓީ ފޭދުއަށް ލިބެމުންދާ ގެއްލުންތަކާއި ގުޅިގެން، ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާއަށް ކުއްލި މައްސަލައެއް ހުށަހެޅުއްވުމަށް ފަހު، އެމައްސަލައަށް ބަހުޘް ކުރައްވަމުން ނެވެ.

ނިހާދު ވިދާޅުވީ، މިހާރު ހިނގަމުންދާ 19 ވަނަ ރައްޔިތުންގެ މަޖިލީހުން ކްލައިމެޓް އިމަރމަޖެންސީއެއް އިޢުލާނު ކޮށްފައިވާނެ ކަމަށެވެ. އަދި މިކަމާބެހޭ ގޮތުން އެކިއެކި ފޯރަމްތަކުގައި ވާހަކަދައްކަމުންދާ ކަމަށެވެ.

ނިހާދު ވިދާޅުވީ، ސިޓީ ކައުންސިލްތަކެކޭ އެއްފަދައިން ހުރިހާ ކައުންސިލްތަކަކުން ވެސް އެ ދާއިރާއެއްގެ ޑިޒާސްޓަރ މެނޭޖްމަންޓް ޕްލޭނެއް އެކުލަވާލައި، އެ ޑިޒާސްޓަރ މެނޭޖްމަންޓް ޕްލޭނުގެ ދަށުން މޫސުމަށް އަންނަ ބަދަލުތައް ދެނަގަތުން މުހިންމު ކަމަށެވެ. އެގޮތުން ވިއްސާރަ މޫސުން އަންނަންވާއިރަށް ތައްޔާރުވެ، ފެންބޮޑުވާ ރަށްތަކުން ފެން ހިންދުމަށްޓަކައި ރަނގަޅު ނިމާޒެއް ޤާއިމުކޮށް، ރައްޔިތުންނާއި، ގެދޮރާއި، މުދާ ސަލާމަތްކުރަންޖެހޭ މަސައްކަތްތައް މިހާރުން މިހާރަށް ފަށައިގަންނަން ޖެހޭ ކަމަށެވެ.

ނިހާދު ވިދާޅުވީ، މިހާރު ކުރަމުންދާ މޫސުމީ ވިއްސާރައިގައި، ފޭދޫން އެކަނިވެސް 544 ގެއަށް ފެންވަދެ، ބޮޑެތި ގެއްލުންތަކެއް ވެފައިވާ ކަމަށެވެ.

ނިހާދު ވިދާޅުވީ، ފެން ހިންދުމަށްޓަކައި ފޭދޫގައި ހޮޅިލައިނެއް މީގެކުރިން އޮތް އެޅި ކަމަށެވެ. އެހެންނަމަވެސް، މީގެކުރިން އެ ހޮޅިތަކުން ފެން ބޭރުވާ މިންވަރަށް މިހާރު އެހޮޅިތަކުން ފެން ބޭރުނުވާކަމަށް ވެސް ނިހާދު ވިދާޅުވި އެވެ.

ނިހާދު ވިދާޅުވީ ރައްޔިތުންގެ ވަރަށް ބޮޑު އެދުމަކަށް ފޭދޫގެ ބިން މިދިޔަ ސަރުކާރުން ހިއްކި ކަމަށާއި، އެބިން ހިއްކުމުގެ ތެރޭގައި ފޭދޫގައި އޮތް ފެން ހިންދުމުގެ ނިޒާމު އޮތީ "ވަޅުލާފަ" ކަމަށެވެ. ނިހާދު ވިދާޅުވީ، އެއީ ޤަސްތުގައި ކުރިކަމެއް ކަމަށް ޤަބޫލުކުރަން ދަތި ކަމަށާއި، ނަމަވެސް އެއީ އެއްވެސް ޕްލޭނެއް ނެތި ބިން ހިންކުމުން ދިމާވި ކަމެއްކަމަށް ޤަބޫލު ކުރައްވާ ކަމަށާއި، މިއަދު އެ ފެންހިންދާ ނިޒާމުގެ ދަށުން ފެން ހިންދޭނެ 'އެއްވެސް ގޮތެއް ނެތޭ ބުންޏަސް ދޮގަކަށް ނުވާނެ' ކަމަށް ވެސް ނިހާދު ވިދާޅުވި އެވެ.

ނިހާދު ވިދާޅުވީ ބިން ހިއްކުމުގެ ތެރެއިން، ވަޅުވީ ހަމައެކަނި ފެންހިންދާ ނިޒާމު ނޫން ކަމަށާއި، ރަށްވަށާލާފައިވާ ބޮޑު ހިލަތައްވެސް ވަނީ ވަޅުލާފަ ކަމަށެވެ. އެއީ އެތައް މިލިއަން ރުފިޔާގެ ގެއްލުމެއް ކަމަށްވެސް ނިހާދު ވިދާޅުވި އެވެ.

ކުރީގެ ރައީސް ޢަބްދުﷲ ޔާމީނުގެ ވެރިކަމުގައި 2018 ވަނަ އަހަރު ޖުލައި މަހުގެ 4 ވަނަ ދުވަހު އައްޑޫ ސިޓީ ފޭދޫގައި ފެން ހިންދުމުގެ ނިޒާމު ޤާއިމުކުރުމަށް 18 މިލިއަން ރުފިޔާއަށް ސްރީލަންކާގެ ސެނޮކް ޓްރޭޑް ކޮމްބައިން ޕްރައިވެޓް ލިމިޓެޑާ ޙަވާލުކޮށްފައިވާ އިރު، މިހާތަނަށް އެ މަޝްރޫޢު ނިންމާފައެއް ނުވެއެވެ. ހޮޅިލައިންތަކެއް އެޅިނަމަވެސް ޕަމްޕް ސްޓޭޝަންތައް ޤާއިމުކޮށްފައެއް ނުވެއެވެ.

އެ މަޝްރޫޢުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ކުރީގެ އެންވަޔަރަމަންޓް މިނިސްޓަރު ޠާރިޤު އިބްރާހީމް ވިދާޅުވެފައި ވަނީ، ފޭދޫ އަކީ ޒަމާނުއްސުރެ ވެސް ފެން ބޮޑުވުމުގެ މައްސަލަ ދިމާވެފައިވާ ރަށެއް ކަމަށާއި އަދި ފެން ހިންދުމުގެ ނިޒާމު ޤާއިމުކުރެވިގެން ދާއިރު ފޭދޫގައި ދިމާވެފައިވާ ފެން ހިންދުމުގެ މައްސަލައަށް ވަަރަށް ބޮޑު ޙައްލެއް ލިބިގެންދާނެ ކަމަށެވެ. އަދި އެ މަޝްރޫއު އެއް އަހަރު ތެރޭގައި ނިމިގެންދާނެ ކަމަށްވެސް ޠާރިޢު ވިދާޅުވެފައި ވެއެވެ.