މޫސުން: ކ. އަތޮޅުން ފެށިގެން އައްޑޫސިޓީ އާއި ހަމަޔަށް ނެރެފައިވާ ޔެލޯ އެލަރޓްގެ މުއްދަތު އިތުރުކޮށްފި
މި ސަރަހައްދަށް ބޯކޮށް ވާރޭވެހުމާއެކު ގުގުރުން އެކަށީގެންވޭ
އެންމެ ފަހުން ކުރި ވިއްސާރައިގައި އައްޑޫގައި ފެންބޮޑުވެފައި
ބޯކޮށް ވާރޭ ވެހޭނެ ކަމަށް ލަފާކޮށް، ކ. އަތޮޅުން ފެށިގެން އައްޑޫ ސިޓީއާއި ހަމަޔަށް ޔެލޯ އެލަރޓް ނެރެފި އެވެ.
މޫސުމާއި ބެހޭ ޤައުމީ އިދާރާއިން ކ. އަތޮޅުން ފެށިގެން އައްޑޫ ސިޓީއާއި ހަމަޔަށް ޔެލޯ އެލަރޓް ނެރެމުން ބުނެފައި ވަނީ އެ ޞަރަޙައްދުގެ ރަށްތަކަށް ބޯކޮށް ވާރޭ ވެހުމާއެކު ގުގުރުން އެކަށީގެންވާ ކަމަށެވެ. އަދި ވިލާގަނޑުގައި ގަޑިއަކު 55 މޭލަށް ވައިގަދަވެ، ޢާންމު ކޮށް ވައިގަދަ ވާއިރު ގަޑިއަކު 25 މޭލާއި 30 މޭލާއި ދެމެދު ހުންނާނެ ކަމަށެވެ.
މެޓް އޮފީހުން އެ ޞަރަޙައްދަށް ޔެލޯ އެލަރޓް ނެރެފައި ވަނީ އާދީއްތަ ދުވަހުގެ ހެނދުނު 0900ން މެންދުރު 1300ށެވެ.
މީގެކުރިން، ޅ. އަތޮޅުން އައްޑޫ ސިޓީއަށް ވަނީ 3 ފަހަރެއްގެ މަތިން ޔެލޯ އެލަރޓް ނެރެފައެވެ. މި ޞަރަޙައްދަށް ޔެލޯ އެލަރޓް އިތުރުކޮށްފައި ވަނީ ހޯމަ ދުވަހުގެ ހެނދުނު 6:00ން 9:00 އަށެވެ. މި ފަހަރު މޫސުމާއި ބެހޭ ޤައުމީ އިދާރާއިން ޔެލޯ އެލަރޓް އިތުރުކޮށްފައި ވަނީ ކ އަތޮޅުން އައްޑޫ ސިޓީއަށެވެ.
މުސުމާ ބެހޭ ޤައުމީ އިދާރާއިން ހޯމަ ދުވަހުގެ ހެނދުނު 10:00ން ރޭގަނޑު 10:00ށް މޫސުން ކުރިޔަށް ލަފާކުރާ ގޮތް ޢާންމުކޮށްފައި ވާއިރު، ރާއްޖޭގެ އެކިހިސާބަށް ވިއްސާރަކޮށް ދެކުނާއި މެދު ތެރޭގެ ބައެއް ރަށްތަކަށް ގުގުރާ، ގަދަވަޔާއެކު ބޯކޮށް ވާރޭވެހެނޭ ކަމަށް ލަފާކޮށްފައި ވެއެވެ.
ހުޅަނގާއި ހުޅަނގުއުތުރުން ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި ވައި ޖެހޭނެކަމަށާއި، ވިލާގަނޑުގައި ގަޑިއަކު ގާތްގަނޑަކަށް 50 މޭލާއި 60 މޭލާ ދެމެދުގެ ބާރުމިނަކަށް ވައިގަދަވުން އެކަށީގެންވާކަމަށް މެޓް އޮފީހުން ބުނެއެވެ. މެޓް އޮފީހުން ބުނެފައި ވަނީ ހުރިހާ ހިސާބެއްގެ ކަނޑުތައްވެސް އާންމު ގޮތެއްގައި ގަދަވާނެ ކަމަށާއި، ބައެއް ރަށްތަކަށް އުދައިގެ އަސަރު ކުރުމަކީވެސް އެކަށީގެންވާ ކަމެއްކަމަށެވެ.
ބޯކޮށް ވާރޭ ވެހި، ވައިގަދަވެ، ކަނޑުތައްވެސް ގަދަވާނެ ކަމަށް ލަފާ ކުރެވޭތީވެ، ޢާންމުކޮށް ހުރިހާ ފަރާތްތަކުން ވެސް މޫސުމަށް ވަރަށް ބޮޑަށް ސަމާލުވުމަށް މޫސުމާއި ބެހޭ ޤައުމީ އިދާރާއިން ވަނީ އިލްތިމާސް ކޮށްފައެވެ.
