ކޮވިޑް-19 ޖެހުނު މީހުންގެ އަދަދު 4.7 މިލިއަނަށް

ދުނިޔޭގެ އެކި ކަންކޮޅުތަކުގައި ފެތުރެމުންދާ ކޮވިޑް-19ށް މުޅި ދުނިޔެއިން ޕޮޒިޓިވްވީ މީހުންގެ އަދަދު 4.7 މިލިއަނަށް ވުރެ އިތުރުވެއްޖެ އެވެ.

އެންމެ ފަހުގެ ތަފާސް ހިސާބުތައް ދައްކާގޮތުން, ވައިރަސް ޖެހުނު މީހުންގެ ޖުމުލަ ޢަދަދު އާދީއްތަ ދުވަހު ވަނީ 4,743,181 (ހަތަރު މިލިއަން ހަތް ލައްކަ ސާޅީސް ތިން ހާސް އެއްސަތޭކަ އަށްޑިހަ އެކެއް) ށް އަރާފައެވެ. މި ބަލި ޖެހުނު މީހުންގެ ތެރެއިން 1,826,254 (އެއްމިލިއަން އަށްލައްކަ ސައްބީސް ހާސް ދުއިސައްތަ ފަންސާސް ހަތަރު) މީހުން ބަލިން ފަސޭހަވެފައި ވާއިރު 313,703 ( ތިންލައްކަ ތޭރަ ހާސް ހަތްސަތޭކަ ތިން) މީހުން ވަނީ ކޮވިޑް-19 ޖެހިގެން މަރުވެފަ އެވެ.

ވައިރަސް ފެތުރެމުންދާ ޒާތަށް ބަލާއިރު، އެންމެ ގިނަ ޢަދަދަަކަށް ވައިރަސްއަށް ޕޮޒިޓިވްވީ ވެސް އަދި މަރު ވީވެސް އެމެރިކާއިންނެވެ. އެމެރިކާއިން މިހާތަނަށް އެއް މިލިއަން ފަސްލައްކަ އަށް ވުރެ ގިނަ މީހުން ވައިރަސްއަށް ޕޮޒިޓިވްވެފައި ވާއިރު، 90,113 (ނުވަދިހަ ހާސް އެއްސަތޭކަ ތޭރަ) މީހުން ވަނީ ފަރުވާދެމުން ދަނިކޮށް ޙާލު ދެރަވެގެން މަރުވެފަ އެވެ.

ދުނިޔޭގެ 218 ސަރަހައްދަކުން ވައިރަސް ފެނިފައި ވާއިރު، އެމެރިކާ ފިޔަވައި ދެން އެންމެ ގިނަ ޢަދަދެއްގެ މީހުން ވައިރަސްއަށް ޕޮޒިޓިވް ވެފައިވަނީ ޔޫރަޕުގެ ޤައުމުތަކުންނެވެ. އެގޮތުން ސްޕެއިނާއި، ރަޝިއާ އަދި ބްރެޒިލް އިން ގިނަ ޢަދަދެއްގެ މީހުން ވަނީ ކޮވިޑް-19ށް ޕޮޒިޓިވްވެފަ އެވެ.

ރަޝިއާގެ އިތުރުން އެެމެރިކާ، ސްޕެއިން، އިޓަލީ، އިނގިރޭސި ވިލާތް އަދި ބްރެޒިލް އަކީ މުޅި ދުނިޔެއިން ވައިރަސްއަށް ޕޮޒިޓިވްވި މީހުންގެ އަދަދު ދެލައްކައަކަށްވުރެ އިތުރުވެފައިވާ ޤައުމުތަކެވެ.