ބްރެޒިލްއިން ކޮވިޑް-19 ޖެހިގެން މަރުވި މީހުންގެ އަދަދު 15000ށް!
ވައިރަސް ޖެހުނު މީހުންގެ ތެރެއިން ރަނގަޅުވެފައިވަނީ 89,672 މީހުން
ބްރެޒިލްގެ ސަހަރާއެއްގެ މުވައްޒަފުން މަރުވެފައިވާ މީހުންގެ ހަށިތައް ވަޅުލުމުގެ މަސައްކަތް ކުރަނީ
ބްރެޒިލްގައި ކޮވިޑް-19 ޖެހިގެން މަރުވި މީހުންގެ އަދަދު 15،000ށް ވުރެ މައްޗަށް އަރައިފިއެވެ.
އެންމެ ފަހުގެ ތަފާސް ހިސާބުތައް ދައްކާގޮތުން ބްރެޒިލްގައި ކޮވިޑް-19 ޖެހިގެން މަރުވި މީހުންގެ އަދަދު ވަނީ 15,662ށް ވުރެވެސް އިތުރުވެފައެވެ. އަދި ވައިރަސްއަށް ޕޮޒިޓިވްވި މީހުންގެ އަދަދު އުޅެނީ 233,511ށް ވުރެ މަތީގައެވެ.
ނަމަވެސް މަރުވި މީހުންގެ އަދަދު މިއަށްވުރެ މަތިވާނެކަމަށް ލަފާ ކުރެވޭއިރު ސަބަބެއްގެ ގޮތުގައި ފާހަގަކުރަނީ އެ ޤައުމުން އެކަށީގެންވާ ވަރަށް ވައިރަސްއަށް ޓެސްޓް ނުކުރެވުމެވެ.
ބްރެޒިލް އިން ކޮވިޑް-19 ޖެހިގެން މަރުވި މީހުންގެ އަދަދު 15000 ށް ވުރެ މަތިވެފައިވާއިރު މިހާތަނަށް އެގައުމުން މި ވައިރަސް ޖެހުނު މީހުންގެ ތެރެއިން ރަނގަޅުވެފައިވަނީ 89,672 މީހުންނެވެ. އަދި މިވަގުތު 128,177 އެއްހާ މީހުންނަށް ދަނީ ފަރުވާދެމުންނެެވެ.
ބްރެޒިލްގެ ޙާލަތު ގޯސްވަމުން އަންނައިރު، ބްރެޒިލްގެ ރައީސް ޖެއަރ ބޮލްސޮނާރޯ ވިދާޅުވަމުން ގެންދަވަނީ މި ވައިރަސްއަކީ އާދައިގެ ރޯގާއެއް ކަމަށެވެ. ބޮލްސޮނާރޯ ގެންދަވަނީ އޭނާގެ މުޝީރުންންނާއި، ސައިންސްވެރިން ދެއްވާ އިރުޝާދުތަކަށް އިންކާރު ކުރައްވާ ގޮންޖައްސަވަމުންނެވެ.
