ކާބޯތަކެތީގެ ބާވަތްތައް މެދު ނުކެނޑި ފޯރުކޮށްދޭނެކަމުގެ ޔަޤީންކަން ދީފި
ދެ ގައުމުގެ ދެމެދުގެ އެކުވެރި ކަމުގެ ގުޅުން ފާހަގަކުރެއްވި
އިންޑިއާ ސަފީރު ސަންޖޭ ސުދީރް ރާއްޖެ.އެމްވީ އަށް އިންޓަވިއު ދެއްވަނީ
ކޮވިޑް-19 ގެ މި ހާލަތުގައި ދިވެހި ރައްޔިތުންނަށް ބޭނުންވާ ކާބޯތަކެތީގެ އަސާސީ ބާވަތްތައް އެއްވެސް ދަތިކަމެއް ނެތި ލިބޭނެ އިންޑިއާއިން ފޯރުކޮށްދޭނެކަމުގެ ޔަޤީންކަން އިންޑިއާއިން ރާއްޖެއަށް ކަނޑައަޅުއްވާފައި ހުންނ ސަފީރު ސަންޖޭ ސުދީރް ދެއްވައިފި އެވެ.
ރާއްޖޭގައި ތިބި އިންޑިއާ މީހުން އަނބުރާ ގެންދިއުމަށް ކުރިޔަށް ގެންދާ އޮޕަރޭޝަންގެ ތެރެއިން، ރާއްޖެ.އެމްވީ އަށް ދެއްވި އިންޓަވިއުއެއްގައި ސަފީރު ވިދާޅުވީ، ރާއްޖެއާ އިންޑިއާ އަކީ ޒަމާންވީ ގާތް ގުޅުމެއް ބާއްވަމުން އަންނަ ދެ ޤައުމު ކަމަށާއި، ކޮވިޑްގެ ކަންތައްތައްކުގައި ރާއްޖެއާއެކު މަސައްކަތް ކުރަން ފުުރުސަތު ލިބިވަޑައިގަތުމަކީ ލިބޭ ވަރަށް ބޮޑު ހިތްހަމަ ޖެހުމެއް ކަމަށެވެ. އަދި ވަކިން ހާއްސަކޮށް މި ދަނޑިވަޅުގައި ރާއްޖެއަށް ބޭނުންވާ ކާބޯތަކެތީގެ އިތުރުން ބޭހުގެ ބާވާތްތައް ފޯރުކޮށްދެވުން އެއީ ލިބުނު ވަރަށް ބޮޑު އުފަލެއްގެ ގޮތުގައި ސަފީރު ފާހަނގަ ކުރެއްވިއެވެ.
އިންޑިއާ ކަނޑުގައި ހިމެނޭ ޖަޒީރާ ގައުމުތަކަށް ބޭނުންވާ ޒަރޫރީ ތަކެތި ފޯރުކޮށްދިނުމުގެ ގޮތުން އިންޑިއާއިން ވަނީ "މިޝަން ސާގަރު" ގެ ނަމުގައި ހަރަކާތެއް ފަށާފައެވެ. އެ ހަރަކާތުގެ ދަށުން ރާއްޖެއަށް 580 ޓަނުގެ ކާބޯތަކެތި އިންޑިއާއިން ހަދިޔާ ކުރިއެވެ. މިތަކެއް މިހާރު ވަނީ ރާއްޖެ ގެނެސްފައެވެ.
ކޮވިޑް-19 ގެ މި ޙާލަތުގައި، ރާއްޖެއާއެކު ގުޅިގެން މަސައްކަތް ކުރަން އިންޑިއާއިން ތައްޔާރަށް އޮތް ކަމަށް ސަފީރު ވިދާޅުވިއެވެ. އެގޮތުން މި ދަނޑިވަޅުގައި ރާއްޖެ އަސާސީ ކާބޯތަކެއްޗަށް ނުޖެހޭ ވަރަށް، މެދުކެނޑުމެއް ނެތި އެ ބާވަތްތައް އިންޑިއާއިން ފޯރުކޮށްދޭނެ ކަމުގެ ޔަޤީންކަން ސަފީރު ވަނީ ދެއްވާފަ އެވެ.
ރާއްޖޭގައި ތިބި އިންޑިއާގެ ރައްޔިތުން ފުރުވާލުމުގެ އިންތިޒާމުތައް ހަމަޖެއްސުމަށްޓަކައި، ދިވެހި ސަރުކާރުން ލިބެމުންދާ އެހީތެރިކަމަށް ސަފީރު ސަންޖޭ ވަނީ ޝުކުރު އަދާކުރައްވާފަ އެވެ.
