ސްޕެއިންގައި ކޮވިޑް-19 ޖެހިގެން ބުރާސްފަތި ދުވަހު މަރުވި މީހުންގެ އަދަދު މައްޗަށް ދިޔުމާއެކު ވައިރަސް ގެ ދެ ވަނަ ވޭވެއް އަތުވެދާނެ ކަމުގެ އިންޒާރު ކަމާބެހޭ ފަރާތް ތަކުންދީފި އެވެ.

މިއީ ސްޕެއިންގައި މެއި މަހުގެ 8 ވަނަ ދުވަހުގެ ފަހުން ދުވާލެއްގެ މައްޗަށް މަރުވި މީހުންގެ އަދަދު 200 ށް ވުރެ މައްޗަށް އެރި ފުރަތަމަ ދުވަހެވެ. ބުރާސްފަތި ދުވަހު 217 މީހުން މަރުވެފައި ވާއިރު އޭގެ ކުރީ ދުވަހު މަރުވެފައިވަނީ 184 މީހުންނެވެ. މަރުވާ މީހުންގެ އަދަދު މައްޗަށް ގޮސްފައިމިވަނީ ސްޕެއިންގައި މުޅި އާބާދީއަށް އަމާޒުކޮށް ކުރިޔަށް ގެންދިޔަ އެންޓިބޮޑީ ޓެސްޓުގެ ޕްރިލިމިނަރީ ރިޒަލްޓްގައި އާބާދީގެ 5 އިންސައްތައަށް ވައިރަސް ގެ އަސަރު ކޮށްފައިވާކަން ހާމަވެފައި ވަނިކޮށެވެ.

މަރުވި މީހުންގެ އަދަދުތައް މައްޗަށްދިޔަ ސަބަބެއް ނޭންގޭކަމަށާއި އެކަން ބަލަމުންދާ ކަމަށް ސްޕެއިންގެ ހެލްތު އެމަރޖެންސީގެ ވެރިޔާ ފެރްނާންޑޯ ސިމޮން ވަނީ ވިދާޅުވެފަ އެވެ. މަރުވި މީހުންގެ ދެބައި ކުޅަ އެއް ބައި މީހުން މަރުވެފައިވަނީ އެއް ސަރަހައްދަކުންނެވެ.

ސްޕެއިންގައި މަރުވި މީހުންގެ އަދަދު ވަނީ 27،321 ށް އަރާފަ އެވެ. ސްޕެއިންގައި ކުރިޔަށް ގެންދިޔަ އެންޓިބޮޑީ ޓެސްޓް ކުރިޔަށް ގެންގޮސްފައިވަނީ 60،000 މީހުންގެ މެދުގަ އެވެ. އެޓެސްޓްގެ ނަތީޖާ ދައްކާގޮތުން އެގައުމުގެ 2.3 މިލިއަން މީހުންނަށް ވާނީ ވައިރަސް ޖެހިފަ އެވެ.

ޕްރިލިމިނަރީ ނަތީޖާއިން ދެއްކި 5 އިންސައްތަ އަކީ ސްޕެއިންގެ މުޅި އާބާދީ ކަމަށްވާ 47 މިލިއަން މީހުންގެ ތެރެއިން ހަރޑް އިމިޔުނިޓީ ލިބޭ މިންވަރު ދަށް އިންސައްތަ އެކެވެ. އޭގެ މާނައަކީ ވައިރަސް އިން ރައްކާތެރިވުމަށް އަޅަންޖެހޭ ފިޔަވަޅުތައް ރަނގަޅަށް ނާޅައިފިނަމަ ދެ ވަނަ ވޭވްގެ އަސަރު މުޅި ގައުމަށް ކޮށްފާނެކަން ކަމަށް ސިމޮން ވިދާޅުވި އެވެ.

ސްޕެއިން އަކީ ދުނިޔޭގައި ދެ ވަނަ އަށް އެންމެ ގިނަ އަދަދެއްގެ މީހުންނަށް ވައިރަސް ޖެހިފައިވާ ގައުމެވެ. ސްޕެއިންގައި ވައިރަސް ޖެހިގެން ދުވާލަކު މަރުވާ އަދަދުތައް ފާއިތުވި ހަ ހަފްތާގައި ވަނީ ދަށަށްދާން ފަށާފަ އެވެ. އޭޕްރީލް މަހުގެ ކުރީކޮޅު އެގައުމުގައި ދުވާލެއްގެ މައްޗަށް 950 މީހުން ވަނީ މަރުވެފަ އެވެ. ވައިރަސް ފެތުރޭ މިންވަރު ކޮންޓްރޯލް ކުރެވެން ފެށުމާއެކު އެގައުމުގައި އަޅާފައިވާ ލޮކްޑައުންގެ ފިޔަވަޅުތަކަށް ވަނީ ލުއި ދޭން ފަށާފަ އެވެ.