ކޮވިޑް-19 އަށް ޕޮޒިޓިވްވި މީހުންގެ އަދަދު 4.3 މިލިއަނަށް!
އެމެރިކާއިން މިހާތަނަށް 1,408,039 މީހުން ވައިރަސްއަށް ޕޮޒިޓިވްވެފައިވޭ
ކޮވިޑް ޖެހިފައިވާ މީހަކަށް ފަރުވާ ދިނުމަށް ހޮސްޕިޓަލަށް ގެންދަނީ
މުޅި ދުނިޔެއިން ކޮވިޑް-19 ޖެހުނު މީހުންގެ ޢަދަދު 4.3 މިލިއަނަށް އަރައިފި އެވެ.
އެންމެ ފަހުގެ ތަފާސްހިސާބުތައް ދައްކާގޮތުން, ވައިރަސް ޖެހުނު މީހުންގެ ޖުމުލަ ޢަދަދު ހޯމަދުވަހު ވަނީ 4,336,801 އަރާފަ އެވެ. އަދި ބަލީގައި މަރުވި މީހުންގެ އަދަދު 292,366 އަށް އަރާއިރު ރަނގަޅުވި މީހުންގެ އަދަދު 1,594,096 އަށް އަރަ އެވެ.
ވައިރަސް ފެތުރެމުންދާ ޒާތައް ބަލާއިރު، އެންމެ ގިނަ ޢަދަދަަކަށް ވައިރަސްއަށް ޕޮޒިޓިވްވީވެސް އަދި މަރުވީވެސް އެމެރިކާއިންނެވެ. އެމެރިކާއިން މިހާތަނަށް 1.4 މިލިއަނަށް ވުރެ ގިނަ މީހުން ވައިރަސްއަށް ޕޮޒިޓިވްވެފައިވާއިރު، 83000ށް ވުރެ ގިނަ މަރު ވަނީ ރިޕޯޓްކުރެވިފަ އެވެ. 300،000 މީހުންގެ ބަލި ވަނީ ފަސޭހަވެފަ އެވެ.
ދުނިޔޭގެ 217 ސަރަހައްދަކުން ވައިރަސް ފެނިފައިވާއިރު، އެމެރިކާ ފިޔަވައި ދެން އެންމެ ގިނަ ޢަދަދެއްގެ މީހުން ވައިރަސްއަށް ޕޮޒިޓިވްވެފައިވަނީ ޔޫރަޕުގެ ޤައުމުތަކުންނެވެ. އެގޮތުން ސްޕެއިން، ރަޝިއާ، އިޓަލީވިލާތް، ފަރަންސޭސިވިލާތް، އަދި އިނގިރޭސިވިލާތުން ވަނީ 200،000ށް ވުރެ ގިނަ ކޭސް ރިޕޯޓްކުރެވިފަ އެވެ.
ދެވަނައަށް އެންމެ ގިނައިން ކޮވިޑް-19 ގެ ކޭސްތައް ރިޕޯޓުކޮށްފައިވަނީ ސްޕެއިން އިންނެވެ. ތިން ވަނައަށް އެންމެ ގިނައިން ރިޕޯޓުކޮށްފައިވަނީ ރަޝިއާއިންނެވެ.
