އިންޑިއާއިން 270 ބިލިއަން ޑޮލަރުގެ އިކޮނޮމިކް ޕެކޭޖެއް އިއުލާނުކޮށްފި
ބުދަ ދުވަހަކީ އިންޑިއާ ލޮކްޑައުން ކުރިތާ 50 ދުވަސް ފުރޭ ދުވަސް
އިންޑިއާގެ ބޮޑު ވަޒީރު ނަރެންދްރާ މޯދީ: އެ ގައުމު ލޮކްޑައުން ކޮށްފައިވާތާ 50 ދުވަސްވާން ވަނީ ގާތްވެފައި
ކޮވިޑް-19ގެ ސަބަބުން އަސަރުކޮށްފައިވާ އިންޑިއާގެ ވިޔަފާރިތަކަށާއި މަސައްކަތްތެރިންނަށް އެހީތެރިވުމުގެ ގޮތުން 270 ބިލިއަން ޑޮލަރުގެ އިކޮނޮމިކް ޕެކޭޖެއް އިއުލާނުކޮށްފި އެވެ.
މިކަން އިއުލާނުކުރައްވަމުން އިންޑިއާގެ ބޮޑު ވަޒީރު ނަރެންދްރާ މޯދީ ވިދާޅުވީ މި ސްޓިމިއުލަސް ޕެކޭޖަކީ އިންޑިއާގެ އުފެއްދުންތެރިކަމުގެ 10 އިންސައްތަ ކަމަށެވެ. 20 ޓްރިލިއަން ރުފީޒްގެ ރިލީފް ޕެކޭޖެއް އިއުލާނުކޮށްފައިވާއިރު، ބުދަ ދުވަހަކީ އިންޑިއާ ލޮކްޑައުން ކުރިތާ 50 ދުވަސް ފުރޭ ދުވަހެވެ.
ގައުމާ މުޚާތަބު ކުރައްވާ އަންގާރަ ދުވަހު ދެއްވި ހިތާބެއްގައި މޯދީ ވިދާޅުވީ، މި ޕެކޭޖު ވެގެންދާނީ އިންޑިއާގެ ތަރައްގީއަށާއި އަމިއްލަ މަސައްކަތުން އާމްދަނީ ހޯދޭ ބަޔަކަށް ވުމަށް ލިބިގެންދާ ބާރެއް ކަމަށެވެ. އަދި މި ޕެކޭޖަކީ ކުދި އަދި މެދު ފަންތީގެ ވިޔަފާރިތަކަށް އެހީވުމަށް ކަނޑައެޅިގެންދިޔަ ޕެކޭޖެއް ކަމަށް މޯދީ ވިދާޅުވި އެވެ.
ކޮވިޑް-19 އާއި ގުޅިގެން އިންޑިއާ ލޮކްޑައުން ކުރެވިފައިވާއިރު، އެގައުމުގެ ސަރުކާރުން ދަނީ ހަރުކަށި ފިޔަވަޅުތައް ތަންފީޒު ކުރަމުންނެވެ. މިހާތަނަށް އެގައުމުން 70،000 އަށް ވުރެ ގިނަ މީހުން ވައިރަހަށް ޕޮޒިޓިވް ވެފައިވާއިރު 2293 އަށް ވުރެ ގިނަ މީހުން ވަނީ މި ބަލީގައި މަރުވެފަ އެވެ.
ކޮވިޑުގެ ސަބަބުން އިންޑިއާގެ 10 މިލިއަނަށް ވުރެ ގިނަ މީހުންނަށް އާމްދަނީ ލިބުމުގެ ދޮރުތައް ބަންދުވެފައިވާއިރު އޭގެ ތެރޭގައި ގިނައީ، ހިޖުރަކޮށްގެން މަސައްކަތް ކުރާ މީހުންނާއި ފަގީރުންނެވެ. މި ލޮކްޑައުންއާ ގުޅިގެން އިންޑިއާގެ ގިނަ އަދަދެއްގެ މީހުންގެ އާމްދަނީ ވަނީ އެއްކޮށް ހުއްޓުމަކަށް އައިސްފަ އެވެ.
