ކޮވިޑް-19 އާގުޅިގެން މަޖިލީހުގެ ޖެންޑަރ ކޮމެޓީން ނިންމި ރިޕޯޓް، މަޖިލީހުން ފާސްކޮށްފި
ރިޕޯޓް ފާސްކުރީ 56 މެމްބަރުންގެ އަޣްލަބިއްޔަތުން
ޖެންޑަރ ކޮމެޓީގެ ބައްދަލުވުމެއްގެ ތެރެއިން: 14 ދާއިރާއަކުން 33 ހުށަހެޅުމެއް ސަރުކާރަށް ހުށަހެޅުމަށް ނިންމާފައިވޭ
ކޮވިޑް-19 ފެތުރުނަ ނުދިނުމަށް އަޅާ ފިޔަވަލުތަކާއި، އަންނަ ނުރަނގަޅު ބަދަލުތަކުން އަރައިގަތުމަށް ސަރުކާރުން އަޅާ ފިޔަވަޅުތަކާ ގުޅިގެން، ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމެޓީން ދިރާސާކޮށް ނިންމިގޮތުގެ ރިޕޯޓް، ރައްޔިތުންގެ މަޖިލީހުން ފާސްކޮށްފި އެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި ހިއުމަން ރައިޓްސް އެންޑް ޖެންޑަރ ކޮމެޓީގެ ރިޕޯޓް ފާސްކޮށްފައިވަނީ، 56 މެމްބަރުންގެ އަޣްލަބިއްޔަތުން ނެވެ. ނުފެންނަ ކަމަށް އެއް މެމްބަރަކު ވޯޓު ދެއްވި އިރު، ވަކިގޮތަކަށް ވޯޓު ދެއްވަން ބޭނުންނުވާ 4 މެމްބަރުން ތިއްބެވި އެވެ. އޭގެ ތެރޭގައި ހިމެނެނީ ޕީއެންސީ/ޕީޕީއެމް އަށް ނިސްބަތްވާ މެމްބަރުންނެވެ.
މި ރިޕޯޓަކީ، ކޮވިޑް-19 ރޯގާ ފެތުރުނަ ނުދިނުމަށް ސަރުކާރުން އަޅާ ފިޔަވަޅުތަކުގެ ސަބަބުން ޢާއިލާތަކާއި، ވިޔަފާރިތަކުގެ ޢާމްދަނީއަށް އަންނަ ނުރަނގަޅު ބަދަލުތަކުން އަރައިގަތުމަށް، ސަރުކާރުން ހިންގުމަށް ނިންމާފައިވާ ޕްރޮގުރާމު ތަންފީޒުކުރުމަށް މަޖިލީހުން ދެކޭގޮތް ކަނޑައެޅުމާ ގުޅޭގޮތުން، ރައްޔިތުންގެ މަޖިލީހުގެ މެދުހެންވޭރު ދާއިރާގެ މެންބަރު އަދި މަޖިލީހުގެ މެޖޯރިޓީ ލީޑަރު ޢަލީ ޢާޒިމް، މިއަހަރުގެ މާރޗު މަހުގެ 30 ވަނަ ދުވަހު، ރައްޔިތުންގެ މަޖިލީހަށް ހުށަހަޅާފައިވާ މައްސަލައާ ގުޅިގެން ހިއުމަން ރައިޓްސް އެންޑް ޖެންޑަރ ކޮމެޓީން ތައްޔާރުކުރި ރިޕޯޓެކެވެ.
