އަތޮޅުތެރޭގައި ފުރަބަންދުގައި ތިބި މީހުންނަށް އެއްރަށުން އަނެއް ރަށަށް ދަތުރު ކުރެވޭނެ: އެލްޖީއޭ
12 މެއި 2020 | އަންގާރަ 10:47ދަތުރުކުރެވޭނީ މޮނިޓަރިންގެ ހާލަތުގައި ނެތް ރަށްތަކަށް
ކަނޑުމަތީގެ މަންޒަރު
އަތޮޅުތެރޭގައި ފުރަބަންދުގައި ތިބި ފަރާތްތަކުން އެއްރަށުން އަނެއް ރަށަށް ދަތުރުކުރެވޭނެ ކަމަށް ލޯކަލް ގަވަންމަންޓް އޮތޯރިޓީ (އެލްޖީއޭ) ގެ ޑިރެކްޓަރ ކެނެރަލް އާދަމް ޝަރީފް ވިދާޅުވެއްޖެ އެވެ.
ކޮވިޑް -19 އާ ގުޅޭ އެންމެ ފަހުގެ މަޢުލޫމާތު ހިއްސާކުރުމަށް އަންގާރަ ދުވަހު ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) އިން ބޭއްވި ނޫސްވެރިންގެ ބައްދަލުވުމުގައި ޝަރީފް ވިދާޅުވީ އަތޮޅު ތެރޭގައި ދިރިއުޅޭ ފަރާތްތަކުގެ ތެރެއިން ޒަރޫރީ ބޭނުމެއްގައި އެއްރަށުން އަނެއް ރަށަށް ދަތުރުކުރަން ބޭނުންވާ ފަރާތްތަކަށް ކައުންސިލްގެ ހުއްދައަކާއެކު އެއްރަށުން އަނެއް ރަށަށް ދަތުރު ކުރެވޭނެ ކަމަށެވެ.
އަދި އެރަށަކީ މޮނިޓަރިންގެ ޙާލަތުގައި އޮތް ރަށެއް ނޫންކަމުގައި ވަނީ ނަމަ، އެހެން ރަށެއްގައި ތާށިވެފައި ހުރި އެރަށެއްގެ ރައްޔިޔަކަށް ރަށަށް އެރުމުގެ އިންތިޒާމު ކައުންސިލްތަކުން ހަމަޖައްސައި ދިނުމަކީ ވަރަށް ބޮޑު އެދުމެއް ކަމަށެވެ.
އޭގެ މާނައަކީ ކޮންމެ ދުވަހަކު އެއްރަށުން އަނެއް ރަށަށް ދަތުރުކުރުން ނޫން ކަމަށާއި ހަމައެކަނި ހުއްދަ ދެވޭނީ އެމީހަކު ދިރިއުޅޭ ތަނެއްގައި ގޮސް ހަމަޖެހުމަށް ކަމަށެވެ. ޝަރީފް ވިދާޅުވީ އަތޮޅު ތެރޭގައި މާލޭގެ އެއްވެސް ރައްޔިތަކު ނުވަތަ މާލޭގައި ދިރިއުޅޭ ފަރާތެއް ހުރިނަމަ ފުލުހުންގެ ހުއްދައާއެކު މާލެވެސް އާދެވޭނެ ކަމަށެވެ.
މާލޭގައި އަތޮޅު ތެރޭގެ އެއްވެސް ފަރާތެއް ފުރަބަންދުވެފައި ވަނީ ނަމަ އެފަރާތްތަކަށް ސާދަ ދުވަހުގެ ކަރަންޓީން ފުރިހަމަ ކުރުމަށް ފަހުގައި އެރަށަކަށް އެނބުރި ދެވޭނެ ކަމަށާއި، އެއީ މާލޭގެ ޙާލަތު އަތޮޅު ތެރޭގެ ޙާލަތާ އަޅާބަލާއިރު ވަރަށް ބޮޑުތަން ގޯސްވެފައި އޮތުމުންކަން އޭނާ ފާހަގަ ކުރެއްވި އެވެ.
