އއ. ވެލިދޫ ކަރަންޓީން ފެސިލިޓީގައި ހިނގިކަމަށް ބުނާ އެއްވެސް މައްސަލައެއް ބަލަމުން ނުދާ ކަމަށް ފުލުހުން ބުނެފި އެވެ.
ފުލުހުން މިހެން ބުނެފައި މިވަނީ ކޮވިޑް-19 އަށް ފަރުވާ ދިނުމަށް ބޭނުން ކުރާ ވެލިދޫ ކަރަންޓީން ފެސިލިޓީގައި މަސައްކަތްކުރާ ދިވެހި އަންހެން ޑޮކްޓަރަކާއި އެ ފެސިލިޓީއާ ހަވާލުވެ ހުންނެވި ސިފައިންގެ އެންމެ އިސް އޮފިސަރު، ދަންވަރުގެ ވަގުތުގައި އެކަހެރިކޮށް ބައްދަލުކުރި ކަމަށް ބައެއް މީޑިއާތަކުގައި ރިޕޯޓުކޮށްފައި ވަނިކޮށްނެވެ.
މިމައްސަލައާ ގުޅިގެން ފުލުހުން ބުނީ ވެލިދޫ ކަރަންޓީން ފެސިލިޓީގައި ޖިނާޢީ ކުށެއް، އަދި ޖިންސީ ފުރައްސާރައިގެ މައްސަލައެއް ހިނގައިގެން ފުލުހުންނަށް ހުށަހެޅިފައި ނުވާ ކަމަށެވެ. އަދި އެފަދަ މައްސަލައެއް ތަހުޤީޤު ކުރަމުން ނުދާ ކަމަށް ވެސް ފުލުހުން ބުނެފައި ވެއެވެ.
ބައެއް މީޑިއާތަކުގައި ރިޕޯޓުކޮށްފައިވާ ގޮތުގައި އާދިއްތަ ދުވަހުގެ ރޭ ދަންވަރުގެ ވަގުތުގައި ސިފައިންގެ އޮފިސަރުގެ ކޮޓަރިން ޑޮކްޓަރު ނުކުތްތަން އެ ރަށުގެ ސެކިއުރިޓީ ބަލަހައްޓާ ފުލުހުންނަށް ފެނިފައިވެއެވެ.
ކަރަންޓީން ފެސިލިޓީތައް ބަލަހައްޓަމުންދަނީ ސިފައިންނެވެ. ފެސިލިޓީތަކުގައި އެކެއްގެ ކޮޓަރި އަށް އަނެކަކު ގޮސް އުޅުމަކީ މަނާ ކަމެކެވެ.
