ރަށަށް މީހުން ނުފޮނުވަނީ ވަސީލަތް ނެތިގެނެއް ނޫން، ރިސްކު ނަގަން ބޭނުން ނުވަނީ: އަލީ ވަހީދު
ސަރުކާރުގެ މައިގަނޑު އަމާޒަކީ އަތޮޅުތެރެއަށް ބަލި ފެތުރިޔަނުދީ ކޮންޓްރޯލް ކުރުން: އަލީ ވަހީދު
ކަރަންޓީން ފެސިލިޓީއެއްގެ މަސައްކަތް ކުރިއަށްދާ ގޮތް މިނިސްޓަރ އަލީ ވަހީދު ބައްލަވާލައްވަނީ
ރަށްރަށުން ކުރު މުއްދަތަށް މާލެ އައިސް މާލޭގައި ތާށިވެފައި ތިބި މީހުން އަނބުރާ ރަށަށް ފޮނުވުމުގައި ލަސްތަކެއް އުޅެނީ ވަސީލަތްތައް ނެތިގެން ނޫންކަމަށާއި، ބަލިމަޑުކަމެއްގެތެރޭގައި ރިސްކް ނަގަން ބޭނުން ނުވާތީކަމަށް ޓުއަރިޒަމް މިނިސްޓަރ އަލީ ވަހީދު ވިދާޅުވެއްޖެ އެވެ.
ރާއްޖެޓީވީގެ ކޮވިޑް-19 ކަވަރޭޖަށް ދެއްވި ހާއްސަ ބަސްތީގަތުމެއްގައި މިނިސްޓަރ އަލީ ވަހީދު ވިދާޅުވީ ބަލި މަޑުކަމެއް އޮތް ތަނަކުން އެ ބަލިމަޑުކަމުގެ ބިރުވެރިކަން ނެތް ތަނަކަށް މީހުން ފޮނުވުމުގައި ބަލަންޖެހޭ ކަންތައްތަކެއް އެބަހުރިކަމަށެވެ. އަދި ސަރުކާރުގެ މައިގަނޑު އަމާޒަކީ އަތޮޅުތެރެއަށް ބަލިފެތުރުނަނުދީ ކޮންޓްރޯލް ކުރުން ކަމަށްވާއިރު، ރަށަށް ދާން ބޭނުންވާ މީހެއްގެ ގައިން އެ ބަލި ރަށުތެރޭގައި ފެތުރިއްޖެނަމަ، ރަށުގައި ދިރިއުޅޭ އެންމެން ނުރައްކަލެއްގެ ތެރެއަށް ހުށަހެޅިގެންދާނެ ކަމަށް މިނިސްޓަރު ވިދާޅުވި އެވެ.
އިތުރަށް ވާހަކަ ދައްކަވަމުން މިނިސްޓަރ ވިދާޅުވީ މާލެސިޓީގައި ތާށިވެފައި ތިބި މީހުންގެ އަދަދު ދުވަހެއް ދުވަހަކަށް އިތުރުވަމުން ދާކަމަށާއި އޭގެ ތެރޭގައި މާލެ ދޫކޮށް ރަށަށް ދާން ބޭނުންވާ މީހުންވެސް އެބަތިބިކަަމަށެވެ. މި ދަނޑިވަޅުގައި މާލެ ދޫކޮށް ރަށަށް ދިއުމަށް ބޭނުންވުމަކީ މައްސަލައެއްކަމަށް ނުދެކޭކަމަށް މިނިސްޓަރ ފާހަގަކުރެއްވި އެވެ. އަދި އެ ގޮތަށް ބޭނުންވުމަކީ ކޮންމެ ރައްޔިތަކަށްވެސް ލިބިގެންވާ ހައްގެއްކަމަށާއި އެކަން މަގުފަހި ކޮށްދިނުމަކީ ސަރުކާރުގެ ޒިންމާއެއްކަމަށް މިނިސްޓަރ ވަނީ ވިދާޅުވެފަ އެވެ.
ކުރިޔަށް އޮތް ދެ ހަފުތާ ތެރޭގައި ކަރަންޓީނަށްވެސް ރަށުގައި ގާއިމްކޮށްފައިވާ ފެސިލިޓީއަކަށް ނުފޮޮނުވުމަށް ޑޮކްޓަރުން ލަފާދީފައިވާކަމަށް މިނިސްޓަރ އަލީ ވަހީދު ވިދާޅުވި އެވެ. މާލެސިޓީގައި އިއުލާންކޮށްފައިވާ ލޮކްޑައުންއާއި ގުޅިގެން ތާށިވެފައިވާ 323 މީހަކު މިހާރުވެސް ޓްރާންސިޓް ކަރަންޓީން ފެސިލިޓީތަކަށް ގެންދެވިފައިވާކަމަށް ސަރުކާރުން ވަނީ ހާމަކޮށްފަ އެވެ.
