ބަޔަކަށް އަދަބެއް ދޭން ބޭނުމެއް ނޫން، މައިމޫނާ ވިދާޅުވާ ގޮތަށް އަމަލު ބަހައްޓާ: ޕީޖީ ޝަމީމް
11 މެއި 2020 | ހޯމަ 00:42މީހުންގެ ސުލޫކު ވަކި ގޮތަކަށް ބައްޓަން ކުރަން ބޭނުމެއް ނޫން: ޝަމީމް
ޕީޖީ ޝަމީމް: ހުރިހާ ފަރާތްތަކުންވެސް އެޗްޕީއޭގެ އެންގުމާ އެއް ގޮތަށް އަމަލު ކުރުމަށް އިލްތިމާސް ކުރެއްވި
ރާއްޖޭގައި ކޮވިޑް-19 ފެތުރެމުންދާ މިހާލަތުގައި އެއްވެސް ބަޔަކަށް ޖިނާއި އަދުލުގެ ނިޒާމުގެ ދަށުން އަދަބެއް ދޭން ބޭނުންނުވާ ކަމަށާއި، ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރުގެ އަމުރުތަކަށް ބޯލެބުމަށް ޕްރޮސިކިއުޓަރ ޖެނެރަލް (ޕީޖީ) ހުސައިން ޝަމީމް އިލްތިމާސް ކުރައްވައިފި އެވެ.
އާދިއްތަ ދުވަހުގެރޭ ރާއްޖެޓީވީ އަށް ދެއްވި ހާއްސަ ބަސްތީގަތުމެއްގައި ޕީޖީ ޝަމީމް ވިދާޅުވީ، އެޗްޕީއޭގެ އެންގުންތަކާއި ހިލާފަށް ބައެއް ފަރާތްތަކުން އަމަލު ކުރަމުންދާކަން ފާހަގަކުރެވިފައިވާ ކަަމަށެވެ. ޕީޖީ އިޝާރާތް ކުރެއްވީ، އެއް ރަށުން އަނެއް ރަށަށް ފަތާފައި އާއި ކެނޯގައި މީހުންދާ ވާހަކައެވެ. އޭގެ ތެރެއިން ބައެއް މީހުން ފުލުހުން ވަނީ ހައްޔަރުވެސް ކޮށްފަ އެވެ.
ޝަމީމް ވިދާޅުވީ، މި ދަނޑިވަޅުގައި ޖިނާއި އަދުލުގެ ނިޒާމު ބޭނުންކޮށްގެން މީހުން ކޮންޓްރޯލްކޮށް، މީހުންގެ ސުލޫކު ވަކި ގޮތަކަށް ބައްޓަން ކުރަން ބޭނުންފުޅުވެ ވަޑައިނުގަންނަވާ ކަމަށެވެ. ނަމަވެސް އެންމެންގެ ސަލަމަތާއި ރައްކާތެރިކަމަށްޓަކައި ބަޔަކަށް އަދަބު ދޭން ޖެހިއްޖެ ނަމަ އެކަން ކުރައްވާނެ ކަމަށް އޭނާ ވިދާޅުވި އެވެ.
އެއް ރަށުން އަނެއް ރަށަށް ނުދާން އަންގާފައިވަނިކޮށް ދާ މީހުން ހައްޔަރު ކުރަން ޖެހޭ ފަދަ ގޮތަށް އަމަލުތައް ނުބަހައްޓަން ޕީޖީ ވަނީ އިލްތިމާސް ކުރައްވާފައެވެ. ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާން ކޮށްފައިވާއިރު، އެޗްޕީއޭގެ އެންގުމަށް ހިލާފަށް ކަރަންޓީނު ކޮށްފައިވާ ބައެއް ފަރާތްތަކުންވެސް ދަނީ ހިލާފުވަމުންނެވެ.
ދިވެހިރާއްޖޭގެ ޤާނޫނުލްޢުޤޫބާތުގެ 120 ވަނަ މާއްދާގެ (ހ)ގައި ބުނަނީ، މީހަކު ފަރުވާލެއްނެތި ކުރާ ޢަމަލެއްގެ ސަބަބުން، (އެހެން)މީހަކަށް، އޭނާ މަރުވެދާނެކަމުގެ ނުވަތަ އޭނާގެ ހަށިގަނޑަށް ބޮޑު އަނިޔާއެއް ލިބިދާނެކަމުގެ ބިރެއް ކުރިމަތިކުރުވައިފިނަަމަ، އެ ޢަމަލު ހިންގި މީހާ އެކުރަނީ ކުށެކެވެ. އެއީ ޖުނަހްގެ އެއް ވަނަ ދަރަޖައިގެ ކުށެކެވެ. މި ކުށުގެ އަދަބަކީ ހަތަރު މަހާއި 24 ދުވަހުގެ ޖަލަށްލުމެވެ.
