ސްޕެއިންގެ ދެ ޑިވިޝަނުން ފަސް ކުޅުންތެރިއަކު ކޮރޯނާވައިރަހަށް ޕޮޒިޓިވްވެއްޖެ

ސްޕެއިންގެ ފުރަތަމަ ޑިވިޝަނާއި ދެވަނަ ޑިވިޝަނުން ފަސް ކުޅުންތެރިއަކު ކޮރޯނާވައިރަސް (ކޮވިޑް-19) އަށް ޕޮޒިޓިވްވެއްޖެ އެވެ.

ކޮވިޑް-19 އާ ގުޅިގެން މިދިޔަ މާޗު މަހު ސްޕެނިޝް ލީގުގެ ކުޅުން ހުއްޓާލި ނަމަވެސް، މިމަހުގެ ހަތަރުވަނަ ދުވަހުން ފެށިގެން ކުޅުންތެރިން އެކަނި ތަމްރީނުތައް ހެދުމުގެ ހުއްދަ ސްޕެއިން ސަރުކާރުންވަނީ ދީފައެވެ. އެއާއެކު ބާސެލޯނާ އާއި އެތުލެޓިކޯ މެޑްރިޑްގެ ކުޅުންތެރިން އެކަނި ތަމްރީނުތަކަށް ނުކުމެފައިވާއިރު، ހޯމަ ދުވަހު ރެއާލް މެޑްރިޑްގެ ކުޅުންތެރިން އެކަނި ތަމްރީނުތަކަށް ނުކުންނާނެ ކަމަށް ރިޕޯޓުތައް ބުނެއެވެ.

ސްޕެނިޝް ލީގު އަލުން ފަށަން ތައްޔާރު ވަމުންދާއިރު، ސްޕެއިންގެ ފުރަތަމަ ޑިވިޝަނާއި ދެވަނަ ޑިވިޝަނުގެ ހުރިހާ ކުޅުންތެރިން ވަނީ ކޮވިޑް-19 އަށް ޓެސްޓު ކޮށްފައެވެ. އެއާއެކު ދެ ޑިވިޝަނުން ފަސް ކުޅުންތެރިއަކު ކޮވިޑް-19 އަށް ޕޮޒިޓިވްވެފައިވާ ކަމަށް ރިޕޯޓުތައް ބުނެއެވެ. އެ ކުޅުންތެރިންގެ ނަންތައް ހާމަކޮށްފައެއް ނުވި ނަމަވެސް، ހޮނިހިރު ދުވަހު އެތުލެޓިކޯ މެޑްރިޑަށް ކުޅެމުން އަންނަ ބްރެޒިލްގެ ޑިފެންޑަރު ރެނަން ލޯޑީ ކޮވިޑް-19 އަށް ޕޮޒިޓިވްވެފައިވާ ކަން އެ ކްލަބުން ވަނީ ހާމަކޮށްފައެވެ.

މެދުކަނޑާލި ސްޕެނިޝް ލީގު އަލުން ފަށަން މިހާރު ކަނޑައަޅާފައިވާ ތާރީޚަކީ އަންނަ ޖޫން މަހު 20 ވަނަ ދުވަސް ކަމަށާއި، ލީގު ނިންމަން އަމާޒު ހިފަނީ ޖުލައި މަހުގެ 26ށް ކަމަށް ރިޕޯޓުތައް ބުނެއެވެ.