ޕީޕީއީ ލައިގެން ވައްކަން ކުރި މައްސަލައެއް ފެންމަތިވެއްޖެ
9 މެއި 2020 | ހޮނިހިރު 07:47އެމީހާ އެގެއަށް ވަނީ ޑިސްއިންފެކްޓް ކުރަން ކަމަށް ބުނެފައިވޭ
ދައުރުވަމުންދާ ވީޑިއޯގެ ސްކްރީން ޝޮޓެއް
ކޮވިޑް-19އަށް ޓެސްޓް ކުރުމަށާއި، ފްރޮޓްލައިންގައި މަސައްކަތް ކުރާ ޚިދުމަތްތެރިން ބޭނުން ކުރާ ޕާސަނަލް ޕްރޮޓެކްޓިވް އިކްއިޕްމެންޓް (ޕީޕީއީ) ފަދަ އެއްޗެއް ލައިގެން މީހަކު ގެއަކަށް ވަދެ ވައްކަން ކުރި މައްސަލައެއް ފެންމަތިވެއްޖެއެވެ.
ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަނީ ފެހި ކުލައިގެ ޕީޕީއީއެއް ލައިގެން ފިރިހެނަކު ގެއަކުން ނުކުންނަ ތަނެވެ. އޭނާގެ އަތުގައި ސްޕްރޭ ފުޅިއެއް އޮވެ އެވެ. އެމީހާ އެގެއަށް ވަނީ ޑިސްއިންފެކްޓް ކުރަން ކަމަށް ބުނެފައިވާ ކަމަށް ޕޯސްޓުގައިވެއެވެ.
މިމައްސަލަ ފެންމަތިވެފައިވަނިކޮށް ހުކުރު ދުވަހު ފުލުހުން ބުނީ މައްޗަންގޮޅި ގެއަކަށް މީހަކު ވަދެ މޯބައިލް ފޯނެއް ވަަގަށް ނަގާފައިވާ ކަމަށް މެއި 8 ވަނަ ދުވަހު 12:07 އެހާކަން ހާއިރު ފުލުހުންނަށް ރިޕޯޓުކޮށްފައިވާ ކަމަށެވެ.
މިމައްސަލައާ ގުޅިގެން މިހާތާނަށް އަދި އެއްވެސް މީހަކު ހައްޔަރު ކޮށްފައިނުވާއިރު، މިއީ ޕީޕީއީ ލައިގެން މީހަކު ވައްކަން ކުރި މައްސަލަ ކަމަކަށް ފުލުހުން ބުނެފައިނުވެއެވެ.
މިމައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
