ޑރ. އަފްޒަލް ގެ އިލްތިމާސް: ގޭގެއަށް ތަށިބަރި ގެންދިޔުން ހުއްޓާލާ!
8 މެއި 2020 | ހުކުރު 01:59އެއް ގެއިން އަނެއް ގެއަށް ވައިރަސް ފެތުރުމުގެ ފުރުސަތު ބޮޑު: ޑރ. އަފްޒަލް
ބުރާސްފަތި ދުވަހުގެރޭ ބޭއްވި ބައްދަލުވުމގައި ޑރ. އަފްޒަލް ވާހަކަ ދައްކަވަނީ
އެއް ގެއިން އަނެއް ގެއަށް ތަށިބަރި ނުފޮނުވުމަށް ނެޝަނަލް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފި އެވެ.
ދަރުބާރުގޭގައި ގާއިމްކޮށްފައިވާ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބުރާސްފަތި ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި އެޗްޕީއޭގެ އެޕިޑަމޮލޮޖިސްޓް ޑރ. އިބްރާހިމް އަފްޒަލް ވިދާޅުވީ، އެއް ގެއިން އަނެއް ގެއަށް ތަށިބަރި ގެންދާކަން ފާހަގަކުރެވިފައިވާ ކަަމަށެވެ.
ޑރ. އަފްޒަލް އިތުރަށް ވިދާޅުވީ، މިއާއި ގުޅިގެން ބަލިފެތުރުމުގެ ފުރުސަތު އިތުރުވެގެންދާކަމަށެވެ. އަދި މަޖުބޫރު ހާލަތެއް މެދުވެރިވެގެން މެނުވީ އެއް ގެއިން އަނެއް ގެއަށް ތަށިބަރި ފަދަ ތަކެތި ފޮނުވުން ހުއްޓާލަން ޖެހޭ ކަމަށް ވިދާޅުވި އެވެ.
މަޖުބޫރުވެގެން އެއް ގެއިން އަނެއް ގެއަށް ތަށިބަރި ފަދަ ތަކެތި ގެންދާ ހާލަތްތަކުގައި ވެސް، ފިހާރަތަކުން ގެންނަ ތަކެއްޗާއި މެދު އަމަލުކުރަން އަންގާފައިވާ ގޮތަށް އަމަލުކުރުމަށް ޑރ. އަފްޒަލް ނަސޭހަތްތެރިވެވަޑައިގެންނެވި އެވެ.
ބޭރުން އެއްވެސް އެއްޗެއް ގެންނަ ކަމުގައިވަނީނަމަ، ޑިސްއިންފެކްޓް ކުރެވޭ ތަކެތި ޑިސްއިންފެކްޓް ކުރުމަށާއި، އެހެނިހެން ތަކެތި ގޭތެރޭގައި ހިފާ ގެންގުޅޭ އެއްޗަކަށް ބަދަލުކުރުމަށް އެޗްޕީއޭއިންނާއި ޑޮކްޓަރުން ވަނީ ތަކުރާރުކޮށް އިލްތިމާސްކޮށްފަ އެވެ.
