ކޮވިޑް-19 އާއި ގުޅިގެން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ދޭން ނިންމާފައިވާ ކުލީގެ ލުއިކަން ހޯދުމަށް އެދޭ މީހުންގެ ތެރެއިން، މިހާތަނަށް ފޯމު ހުށަހަޅާފައި ނުވާ މީހުންނަށް އެފުރުޞަތު ހުޅުވާލައިފި އެވެ.

އެޗްޑީސީން ބުނީ ކޮވިޑް-19 އާއި ގުޅިގެން އެކޯޕަރޭޝަނުން ދިނުމަށް ހަމަޖެހިފައިވާ 2 މަސްދުވަހުގެ އިންސްޓޯލްމަންޓް ކުލީގެ 30 އިންސައްތަ ފަސްކުރުމަށް ބޭނުންވާ މީހުންގެ ތެރެއިން މިހާތަނަށް ފޯމު ހުށަހަޅާފައި ނުވާ މީހުންނަށް ފޯމު ހުށަހެޅުމަށް އިތުރު މުއްދަތެއް ދިނުމަށް ނިންމާފައިވާ ކަމަށެވެ.

އެގޮތުން މިހާތަނަށް ފޯމު ހުށަހަޅާފައިނުވާ މީހުންގެ ތެރެއިން މެއި މަހުގެ އިންސްޓޯލްމަންޓް ކުލީގެ 30 އިންސައްތަ ފަސްކުރުމަށް ބޭނުންވާ މީހުންގެ ތެރެއިން 15 މޭ 2020 ވަނަ ދުވަހުގެ ނިޔަލަށް "ކޮވިޑް-19 އާއި ގުޅިގެން ފައިސާ ދެއްކުން ލަސްކުރުމަށް ހުށަހަޅާ ފޯމު" އެކޯޕަރޭޝަނުން ޚާއްސަކޮށްފައިވާ އީމެއިލް އެޑްރެސް [email protected]އަށް ފޮނުވުން އެދޭ ކަމަށެވެ. އެޗްޑީސީން ބުނީ މިފޯމު ވެބްސައިޓުން ޑައުންލޯޑް ކުރެވެން ހުންނާނެ ކަމަށެވެ.

މިދުވަސްވަރު ކޮވިޑް-19 އާއި ގުޅިގެން މާލެ ޞަރަޙައްދު ލޮކްޑައުން ކުރެވިފައިވާތީ، ދައްކަންޖެހޭ އެންމެހާ ފައިސާ އޮންލައިންގެ ޒަރިއްޔާއިން ދެއްކޭނެ އިންތިޒާމު އެޗްޑީސީން ވަނީ ހަމަޖައްސާފައެވެ.

އެގޮތުން އޮންލައިންކޮށް ފައިސާ ދެއްކުމަށް އެކޯޕަރޭޝަންގެ ބޭންކް އޮފް މޯލްޑިވްސް އެކައުންޓް ނަންބަރު 003-134831-7701 ނުވަތަ މޯލްޑިވްސް އިސްލާމިކް ބޭންކްގެ އެކައުންޓް ނަންބަރު 100-48000439-01-9901 އަށް ފައިސާ ޓްރާންސްފަރ ކުރުމަށް އެޗްޑީސީން އެދިފައިވެއެވެ.

އެޗްޑީސީން ބުނީ ފައިސާ ދެއްކި ރިސިޓްކޮޅު، ފައިސާ ދެއްކި މީހާގެ ނަމާއި ތަނުގެ ތަފުޞީލު (އެޕާރޓްމަންޓް ނުވަތަ ލޮޓް ނަންބަރ) އެގޭނެގޮތަށް7290448 އަށް ވައިބަރ ކުރުމަށް އެދޭ ކަމަށެވެ. އަދި އިތުރު މަޢުލޫމާތެއް ބޭނުންވާނަމަ ވައިބަރ ނަންބަރު 7290448 ފޯނަށް މެސެޖްކުރުމަށް އެޗްޑީސީން އެދިފައިވެއެވެ.